မြန်မာ့အရေးဖြေရှင်းနိုင်ရန် ထိုင်းအစိုးရကို အောက်လွှတ်တော်နိုင်ငံခြားရေးကော်မတီက အစီရင်ခံစာတင်သွင်း

မြန်မာ့အရေးဖြေရှင်းနိုင်ရန် ထိုင်းအစိုးရကို အောက်လွှတ်တော်နိုင်ငံခြားရေးကော်မတီက အစီရင်ခံစာတင်သွင်း

**********

သံလွင်ခက်

မတ် ၁၈၊ ၂၀၂၄။

မြန်မာပြည်သူများရင်ဆိုင်နေရသည့် အကြပ်အတည်းများအားဖြေရှင်းကူညီနိုင်ရန် ထိုင်းအောက်လွှတ်တော် နိုင်ငံခြားရေးကော်မတီက မဟာဗျူဟာအစီအစဥ် ၄ ရပ်ချမှတ်ထားပြီး ယင်းအစီရင်ခံစာကိုလည်း ထိုင်းအစိုးရထံ တင်သွင်းထားသည်ဟု ယနေ့ထုတ်  Bangkok Post ဖော်ပြချက်အရသိရသည်။

အဆိုပါကော်မတီ၏ ဥက္ကဋ္ဌဖြစ်သလို ဖွေထိုင်းပါတီ၏လွှတ်တော်ကိုယ်စားလှယ်လည်းဖြစ်သော နိုပဒွန် ပတ္တမ က မိမိတို့ကော်မတီသည် မြန်မာနိုင်ငံတွင်းက အခြေအနေများကိုစောင့်ကြည့်နေပြီး အကြပ်အတည်းအား အဆုံးသတ်စေမည့် ကြိုးပမ်းမှုမှန်သမျှအားလုံးကို ထောက်ခံသည်ဟု ပြောကြားခဲ့သည်။

အောက်လွှတ်တော်နိုင်ငံခြားရေးကော်မတီအနေဖြင့်လည်း မြန်မာ့အကြပ်အတည်းဖြေရှင်းရာတွင် အထောက် အကူဖြစ်စေမည့် အချက် ၄ ချက်ပါမဟာဗျူဟာတစ်ရပ်ကို ထိုင်းအစိုးရထံတင်သွင်းထားသည်ဟုဆိုသည်။

ပထမအချက်တွင် ထိုင်းအစိုးရအနေဖြင့် မြန်မာနိုင်ငံတွင်းဖြစ်ပေါ်နေသောအခြေအနေများကိုစောင့်ကြည့်ပြီး ကျယ်ကျယ်ပြန့်ပြန့်တုံ့ပြန်ဆောင်ရွက်နိုင်ရန် လုံခြုံရေးနှင့် နိုင်ငံခြားရေးဌာနကအရာရှိများပါဝင်သည့် အထူးကော် မတီတစ်ရပ်ဖွဲ့စည်းသင့်သည်ဟု ပါဝင်သည်။

ဒုတိယအချက်မှာတော့ မြန်မာနိုင်ငံတွင်းဖြစ်ပွားနေသည့်တိုက်ပွဲများကြောင့် နယ်စပ်ဒေသများတွင်ခိုလှုံရန် နောက်ထပ်ရောက်ရှိလာနိုင်ဦးမည့် မြန်မာပြည်သူများနှင့်ပတ်သက်သော အရေးပေါ်အစီအစဥ်တစ်ရပ်ချမှတ်ထား သင့်သည်ဟုပါဝင်သည်။

လာမည့်ဧပြီလတွင်စတင်မည့် စစ်မှုမထမ်းမနေရဥပဒေကြောင့် မြန်မာနိုင်ငံတွင် တိုက်ပွဲများပိုပြီးပြင်းထန်လာလိမ့်မည်ဟု နိုပဒွန် ကဆိုသည်။

ထိုင်းအစိုးရအနေဖြင့် မြန်မာနိုင်ငံမှထွက်ပြေးလာကြသည့် ဒုက္ခသည် ၁၀,၀၀၀ အား ရွာ ၃ ရွာတွင် နေရာချထား ပေးမည်ဟု ပြောဆိုထားသဖြင့် ယင်းအစား ဒေသအသီးသီးကိုရောက်ရှိနေကြသည့် မြန်မာနိုင်ငံသားများအားလုံး အတွက် လူသားချင်းစာနာထောက်ထားမှုဆိုင်ရာအကူအညီများရောက်ရှိအောင် ဖြန့်ဝေပေးသင့်သည်ဟု တတိယအချက်တွင်ဖော်ပြထားသည်။

ယင်းသို့အကူအညီများဖြန့်ဝေရာတွင် အာဆီယံအနေဖြင့်လည်း ပါဝင်ကူညီသင့်သည်ဟု ၎င်းကပြောသည်။

“မြန်မာ့အကြပ်အတည်းကိုဖြေရှင်းတဲ့နေရာမှာ ထိုင်းနိုင်ငံက ဦးဆောင်ကဏ္ဍကနေ ပါဝင်သင့်တယ်”ဟုလည်း သူ က ပြောသည်။

နောက်ဆုံးအချက်မှာတော့ မြန်မာနိုင်ငံတွင် ရေရှည်တည်တံ့ခိုင်မြဲသောငြိမ်းချမ်းရေးရရှိရန် ထိုင်းကိုယ်စားလှယ်၊ အာဆီယံဥက္ကဋ္ဌ၊ တရုတ်နှင့် အိန္ဒိယတို့ပါဝင်သည့် “မြန်မာ့အရေး သုံးပွင့်ဆိုင်အဖွဲ့”ဖွဲ့စည်ပြီးဆောင်ရွက်သင့်သည် ဟုပါဝင်သည်။

အဆိုပါမဟာဗျူဟာ ၄ ရပ်သည် အာဆီယံကချမှတ်ထားသည် 5 PC နှင့်လည်းကိုက်ညီမှုရှိသည်ဟု သူကဆိုသည်။

ဆက်လက်ပြီး ၎င်းက “မြန်မာ့ပဋိပက္ခတွေကရှုပ်ထွေးတယ်ဆိုပေမယ့် အာဆီယံနဲ့ ထိုင်းအတွက်တော့ ခက်ခဲလွန်း တဲ့ကိစ္စတော့လည်းမဟုတ်ပါဘူး” ဟုပြောသည်။

ထိုင်းနိုင်ငံအနေဖြင့် မြန်မာနိုင်ငံကို လူသားချင်းစာနာထောက်ထားမှုဆိုင်ရာအကူအညီများ မတ်လအတွင်း ပေး အပ်မည်ဟုပြောဆိုထားပြီး လာမည့် မတ်လ ၂၅ ရက်တွင် အကူအညီပေးရေးပထမဆုံးယာဥ်တန်းသည် တာ့ခ်ခရိုင် မဲဆောက်မြို့ရှိ တံတားအမှတ် ၂ ကတဆင့် မြန်မာနိုင်ငံသို့ဝင်ရောက်မည်ဖြစ်သည်။

Ref: Bangkok Post

ဓာတ်ပုံ – သံလွင်ခက်

ပုံစာ – စစ်ရှောင်ပြည်သူများ။

************

Telegram– >  https://t.me/newstlk/3809

YouTube – > https://youtu.be/6X9AvN2FnIw?si=BGNM7eyxs7ZtJG7d

Website – >   https://thanlwinkhet.net/?p=8420