မြန်မာစစ်ဘေးရှောင်များအတွက်အကူအညီများ မတ်လဆန်းတွင်စတင်နိုင်မည်ဟု ထိုင်းနိုင်ငံမျှော်လင့်

မြန်မာစစ်ဘေးရှောင်များအတွက်အကူအညီများ မတ်လဆန်းတွင်စတင်နိုင်မည်ဟု ထိုင်းနိုင်ငံမျှော်လင့်

************************

သံလွင်ခက်

ဖေဖော်ဝါရီ ၂၆၊ ၂၀၂၄။

မြန်မာနိုင်ငံတွင်းရှိ စစ်ဘေးရှောင်ရွှေ့ပြောင်းဒုက္ခသည်များအတွက် လူသားချင်းစာနာထောက်ထားမှုဆိုင်ရာ အကူ အညီများပေးအပ်ခြင်းကို လာမည့်မတ်လ ပထမပတ်တွင်စတင်နိုင်ရန် ထိုင်းနိုင်ငံခြားရေးဝန်ကြီး ပန်ပရီ ဘာဟစ်ဒ် ဒါ-နျူကာရာ က မျှော်လင့်ထားပြီး မြဝတီ – မဲဆောက်နယ်စပ်ဖြစ်သည့် တာ့ခ်ခရိုင်ကိုအသုံးပြုကာ အကူအညီများ ပေးအပ်သွားမည်ဟု သိရသည်။

မကြာသေးမီကပြုလုပ်ခဲ့သည့် ထိုင်းသတင်းဌာန Thai PBS World နှင့်တွေ့ဆုံမေးမြန်းမှုတွင် ထိုင်းနိုင်ငံခြားရေး ဝန်ကြီးက မြန်မာနိုင်ငံအနှံ့ဖြစ်ပွားနေသည့်တိုက်ပွဲများကြောင့် ထွက်ပြေးတိမ်းရှောင်နေကြရသည့်လူအားလုံးကို အုပ်စုခွဲခြားခြင်းမပြုဘဲ လူသားချင်းစာနာထောက်ထားမှုဆိုင်ရာအကူအညီများပေးအပ်နိုင်ရေး ကြိုးပမ်းသွားမည် ဟု မစ္စတာ ပန်ပရီ က ပြောကြားခဲ့ခြင်းဖြစ်သည်။

မြန်မာစစ်ဘေးရှောင်များအတွက် အကူအညီများပေးအပ်ရာတွင် ကနဦး၌ အစားအသောက်နှင့် ဆေးဝါးပစ္စည်းများ ပါဝင်မည်ဖြစ်ပြီး ထိုင်းနှင့် မြန်မာနိုင်ငံရှိ ကြက်ခြေနီအသင်းများကကြီးကြပ်သွားမည်ဟု ၎င်းကဆိုသည်။

ထိုင်းကပေးအပ်မည့် လူသားချင်းစာနာထောက်ထားမှုဆိုင်ရာအကူအညီကို မြန်မာစစ်ကောင်စီက အပြည့်အဝ ထောက်ခံကြောင်းပြောဆိုထားပြီး မြန်မာနိုင်ငံတွင်းရှိ တိုင်းရင်းသားလက်နက်ကိုင်အဖွဲ့အစည်းများအပြင် အမျိုးသားညီညွတ်ရေးအစိုးရ – NUG နှင့်ပါ ဆွေးနွေးမှုများပြုလုပ်နေကြောင်း ၎င်းကပြောသည်။

မြန်မာစစ်ဘေးရှောင်များအတွက် အကူအညီများပေးအပ်ရာတွင် တာဝန်ခံမှုနှင့် ပွင့်လင်းမြင်သာမှုများအပေါ် စိုးရိမ်မိသည်ဟုလည်း ပန်ပရီ ကဝန်ခံထားပြီး အကူအညီများပေးအပ်ရန်သတ်မှတ်ထားသည့် မြန်မာပြည်သူလူထု ထံ အမှန်တကယ်အကူအညီများရောက်၊ မရောက်ကိုလည်း အာဆီယံအကူအညီပေးရေးစင်တာ – AHA ကစောင့် ကြည့်နေမည်ဟု ထိုင်းနိုင်ငံခြားရေးဝန်ကြီးကပြောသည်။

နောက်ပိုင်းတွင်ပေးအပ်မည့် အကူအညီပေးရေးအစီအစဥ်တွင် အပြည်ပြည်ဆိုင်ရာကြက်ခြေနီကော်မတီ – ICRC လည်းပါဝင်လာမည်ဖြစ်သောကြောင့် ယင်းအစီအစဥ်ကိုလည်းကြိုဆိုကြောင်း သူကပြောသည်။

“ICRC က အနောက်နိုင်ငံတွေကိုကိုယ်စားပြုတယ်ဆိုတဲ့အမြင်မျိုး ရှိကောင်းရှိနိုင်ပါတယ်။ ဒါကြောင့်လည်း အကူ အညီပေးအပ်ရာမှာ ဘယ်အဖွဲ့အစည်းမျိုးကိုတော့ ပိုပြီးမျက်နှာသားပေးတယ်ဆိုတဲ့ သံသယမျိုးမဖြစ်ရလေအောင် အစကတည်းက သေသေချာချာလုပ်ဆောင်စေချင်တယ်” ဟု ပန်ပရီ ကပြောသည်။

မြန်မာနိုင်ငံရှိစစ်ဘေးရှောင်များအတွက် လူသားချင်းစာနာထောက်ထားမှုဆိုင်ရာအကူအညီများ ပေးအပ်ခြင်းသည် ထိုင်းနိုင်ငံတစ်နိုင်ငံတည်း၏ကြိုးပမ်းမှုမဟုတ်ဘဲ ပြီးခဲ့သည့်လက လာအိုနိုင်ငံတွင်ကျင်းပခဲ့သည့် အာဆီယံထိပ်သီး အစည်းအဝေးတွင် အာဆီယံနိုင်ငံခြားရေးဝန်ကြီးများအားလုံးက အပြည့်အဝထောက်ခံခဲ့ခြင်းလည်းဖြစ်သည်ဟု သူကဆိုသည်။

ထိုင်းနိုင်ငံကပေးအပ်မည့် မြန်မာစစ်ဘေးရှောင်များအတွက် လူသားချင်းစာနာထောက်ထားမှုဆိုင်ရာအကူအညီ များကို အမေရိကန်၊ အီးယူ (ဥရောပသမဂ္ဂ)နှင့် တရုတ်နိုင်ငံတို့ကပါထောက်ခံကြောင်း သူကပြောသည်။

ယခုလအစောပိုင်းတွင် ထိုင်းနိုင်ငံခြားရေးဝန်ကြီးသည် ဝါရှင်တန်ဒီစီခရီးစဥ်သွားရောက်ခဲ့ပြီး အမေရိကန်နိုင်ငံ ခြားရေးဝန်ကြီး အန်တိုနီ ဘလင်ကင် နှင့်တွေ့ဆုံခဲ့သည်။

စစ်အာဏာသိမ်းပြီးနောက်ပိုင်း အာဆီယံကချမှတ်ခဲ့သည့် ဘုံသဘောတူညီချက် ၅ ရပ်အကောင်အထည်ဖော်ရာ တွင် လူသားချင်းစာနာထောက်ထားမှုဆိုင်ရာအကူအညီကို ပထမခြေလှမ်းအဖြစ် ထိုင်းနိုင်ငံခြားရေးဝန်ကြီးက ရှု မြင်ထားပြီး ယခုအစီအစဥ်များကပင် မြန်မာနိုင်ငံပဋိပက္ခတွင်းပါဝင်နေကြသည့် သက်ဆိုင်ရာအဖွဲ့အစည်းအသီး သီးများကြား ယုံကြည်မှုများယူဆောင်ပေးလိမ့်မည်ဟုမျှော်လင့်ထားကြောင်း သူကပြောသည်။

တဆက်တည်းမှာပင် သူက “အရေးအကြီးဆုံးကတော့ ကျွန်တော်တို့ပေးတဲ့အကူအညီတွေက ကျွန်တော်တို့ရည် ရွယ်ထားတဲ့လူအုပ်စုတွေဆီရောက်သွားနိုင်ဖို့ပါပဲ” ဟုပြောသည်။

မြန်မာစစ်ဘေးရှောင်များအတွက်ပေးအပ်မည့် ထိုင်းနိုင်ငံ၏ လူသားချင်းစာနာထောက်ထားမှုဆိုင်ရာအကူအညီ များ သက်ဆိုင်ရာလူအုပ်စုများထံမရောက်လာမည်ကိုလည်း မြန်မာပြည်သူများက စိုးရိမ်နေကြသည်။

Ref: Thai PBS World

ဓာတ်ပုံ – MFA

ပုံစာ – ထိုင်းနိုင်ငံခြားရေးဝန်ကြီးနှင့် စစ်ကောင်စီခန့်နိုင်ငံခြားရေးဝန်ကြီးတို့အား ၈ ကြိမ်မြောက် မဲခေါင်-လန်ချန်း ပူးပေါင်းဆောင်ရွက်မှု နိုင်ငံခြားရေးဝန်ကြီးများအစည်းအဝေးတွင်တွေ့ရစဥ်။ (၂၀၂၃ ခုနှစ်၊ ဒီဇင်ဘာ ၇ ရက်)

************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – >  https://t.me/newstlk/3532

YouTube – > https://youtu.be/eEaLA1Cu5r0

Website – > https://thanlwinkhet.net/?p=7922