ဘားအံ – မြဝတီအာရှလမ်းနှင့် ကော့ကရိတ်မြို့ပေါ် ၆၀ ရာခိုင်နှုန်းကို တော်လှန်ရေးတပ်များထိန်းချုပ်ထား

ဘားအံ – မြဝတီအာရှလမ်းနှင့် ကော့ကရိတ်မြို့ပေါ် ၆၀ ရာခိုင်နှုန်းကို တော်လှန်ရေးတပ်များထိန်းချုပ်ထား

*************************************

နန်းဆုပန်ခန့်

ဖေဖော်ဝါရီ ၂၆၊ ၂၀၂၄။

KNU တပ်မဟာ ၆ ထိန်းချုပ်နယ်မြေဖြစ်သည့် ဘားအံ – မြဝတီအာရှလမ်းနှင့် ကော့ကရိတ်မြို့ပေါ်ရှိ စစ်ကောင်စီ ၏အထိုင်စခန်းနှင့် ဂိတ်စခန်းတချို့ကို တော်လှန်ရေးတပ်ဖွဲ့များသိမ်းပိုက်နိုင်ခဲ့ပြီး ယခုအချိန်တွင် ၆၀ ရာခိုင်နှုန်း ထိန်းချုပ်နိုင်ပြီဖြစ်သည်ဟု တောင်ပိုင်းစစ်ဒေသ၏ လူမှုကွန်ရက်စာမျက်နှာကတဆင့် ယနေ့ ဖေဖော်ဝါ ရီ ၂၆ ရက် တွင် ထုတ်ပြန်ကြေညာထားသည်။

လွန်ခဲ့သည့် ၂ လ ကျော် ၂၀၂၃ ခုနှစ် ဒီဇင်ဘာလ ၁ ရက်ကစ၍ ကရင်အမျိုးသားလွတ်မြောက်ရေးတပ်မတော် – KNLA၊ ပြည်သူ့ကာကွယ်ရေးတပ်မတော် – PDF နှင့် အထူးစစ်ဆင်ရေးတပ်ဖွဲ့ – S.O.F ပူးပေါင်းတပ်များက ကော့ကရိတ်မြို့သိမ်းတိုက်ပွဲ စတင်ဆင်နွှဲခဲ့ပြီး စစ်ကောင်စီ၏အထိုင်စခန်းများနှင့် ဂိတ်စခန်း စုစုပေါင်း ၉ ခုကို သိမ်းယူနိုင်ခဲ့သည်။

တော်လှန်ရေးတပ်ဖွဲ့များသည် ဒီဇင်ဘာလ  ၁ ရက်တွင် ကော့ကရိတ်တောင်ဘက်ခြမ်းရှိ ကော့နွယ်စခန်းကုန်း၊ လှိုင်ဝတံတားဂိတ် နှင့် ကြာပန်းဂိတ်ကိုလည်းကောင်း ၊ ဒီဇင်ဘာလ ၄ ရက်တွင် ကော့ကရိတ်မြောက်ဘက်ခြမ်းရှိ စစ်ကောင်စီအထိုင်ချတပ်စွဲ ထားသည့် အမှတ် ၃ ဂိတ်ကိုလည်းကောင်း၊ ဒီဇင်ဘာလ ၆ ရက်တွင် ဘားအံ – မြဝတီ အာရှလမ်းပေါ်ရှိ ကမိုင်ကုန်း သင်္ချိုင်းကုန်းအတွင်းတပ်စွဲထားသည့် စစ်ကောင်စီအထိုင်စခန်းကိုလည်းကောင်း၊ ဒီဇင်ဘာလ ၂၇ ရက်တွင် ကော့ကရိတ်မြို့၊ ချောင်းတောင်ရပ်ကွက်ရှိ စာသင်ကျောင်းအတွင်းတပ်စွဲထားသည့်  စစ်ကောင်စီတပ်ကိုလည်းကောင်း၊ ဒီဇင်ဘာလ ၂၈ ရက်တွင် တောင်ကြာအင်းရဲစခန်း၊ ဖေဖော်ဝါရီလ ၂ ရက်တွင် ဘားအံ – မြဝတီလမ်း အာရှလမ်းပိုင်းပေါ်ရှိ စစ်ကောင်စီ၏အထိုင်စခန်းများဖြစ်သော ရေကူးကန် နှင့် ဆီဆိုင်ဂိတ် စခန်းတို့ကိုလည်းကောင်း တိုက်ခိုက်သိမ်းပိုက်နိုင်ခဲ့ခြင်းဖြစ်သည်ဟု ထုတ်ပြန်ချက်တွင် ဖော်ပြထားသည်။

အဆိုပါတိုက်ပွဲများအတွင်း စစ်ကောင်စီဘက်က ၃၀ ဦးသေဆုံး၍ ဒဏ်ရာရရှိသူအများအပြားရှိခဲ့ကာ လက်နက်ချ အညံ့ခံသူ ၁၄ ဦးနှင့် လက်နက်ကြီးငယ် ၄၆ လက်သိမ်းပိုက်ရရှိခဲ့သည်။

ကာကွယ်ရေးတပ်ဘက်ကလည်း ရဲဘော် ၇ ဦး ကျဆုံးခဲ့ပြီး လေကြောင်းဖြင့်ဗုံးကြဲတိုက်ခိုက်မှုကြောင့် အပြစ်မဲ့ ဒေသခံပြည်သူ ၃ ဦး အသက်ဆုံးရှုံးခဲ့ရသည်။

ကော့ကရိတ်မြို့တွင်းရှိ စစ်ကောင်စီတပ်စခန်းများကို တော်လှန်ရေးပူးပေါင်းတပ်များက ထိုးစစ်ဆင်နေသည့် အတွက် မကြာခဏထိတွေ့တိုက်ပွဲဖြစ်ပွားခဲ့ပြီး ယမန်နေ့ ဖေဖော်ဝါရီ ၂၅ ရက်တွင်လည်း ထိတွေ့တိုက်ပွဲဖြစ်ပွား ခဲ့သည်ဟု ကျားဖြူစစ်ကြောင်းမှူးက ပြောသည်။

ယမန်နေ့ ဖေဖော်ဝါရီ ၂၅ ရက်ကဖြစ်ပွားခဲ့သည့်တိုက်ပွဲတွင် ကျားဖြူစစ်ကြောင်း တပ်ခွဲ ၁ က ရဲဘော်စိုးမင်းနှင့် တောင်ပိုင်းတိုင်း ဗျူဟာ ၁ စစ်ကြောင်းက ရဲဘော် မြောင်းမြ တို့ကျဆုံးခဲ့ကြောင်း ၎င်းတို့နှင့်အတူ သင်တန်းတက် ခဲ့သည့် ရဲဘော် ၁ ဦး က သံလွင်ခက်ကို အတည်ပြုပြောကြားသည်။

ကော့ကရိတ်တိုက်ပွဲကြောင့် စစ်ကောင်စီဘက်က လက်နက်ကြီး၊ ဒရုန်းများနှင့် လေကြောင်းအသုံးပြုကာ နေ့စဥ် ပစ်ခတ်လျက်ရှိနေပြီး နေအိမ် ၂၀၀ ကျော် မီးလောင်ပျက်စီးခဲ့သလို ဒေသခံပြည်သူသောင်းနှင့်ချီ ထွက်ပြေးတိမ်း ရှောင်နေကြရသည်။

ဓာတ်ပုံ – အထူးစစ်ဆင်ရေးတပ်ဖွဲ့ S.O.F။

ပုံစာ – အထူးစစ်ဆင်ရေးတပ်ဖွဲ့ S.O.F ၏ အပတ်စဉ် ၅ သင်တန်းဆင်းပွဲမြင်ကွင်း။

************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – >  https://t.me/newstlk/3533

YouTube – > https://youtu.be/eEaLA1Cu5r0

Website – > https://thanlwinkhet.net/?p=7926