စကခ-၉ ကို ရက္ခိုင့်တပ်တော် ဘယ်လိုတိုက်ခိုက်ခဲ့သလဲ. . . .?
***************************
ကောင်းချစ်အောင်
ဖေဖော်ဝါရီ ၁၄၊ ၂၀၂၄။
ရက္ခိုင့်တပ်တော် – AA က ၂၀၁၆ ခုနှစ်တုန်းက ရခိုင်ပြည်မြောက်ပိုင်းမှာခြေကုပ်ယူဖို့ စစ်ဆင်ရေးတွေဖော်ဆောင်လာချိန်မှာ အဓိကရင်ဆိုင်ခဲ့ရတာက ကျောက်တော်မြို့အခြေစိုက်၊ အမှတ် ၉ -စစ်ဆင်ရေးကွပ်ကဲမှုဌာနချုပ် စကခ -၉ လက်အောက်ခံတပ်ရင်းတွေပဲဖြစ်ပါတယ်။
၂၀၂၄ ခုနှစ်ရောက်လာချိန်မှာတော့ ”၁၀၂၇ စစ်ဆင်ရေး”ရဲ့အဆက်ဖြစ်တဲ့ ရခိုင်ပြည်နယ်တွင်းကရက္ခိုင့် တပ်တော်ရဲ့ ထိုးစစ်တွေကြားမှာ စကခ-၉ လက်အောက်ခံတပ်ရင်းတွေအားလုံးရှုံးနိမ့်သွားခဲ့ရပါပြီ။
အချိန် ၁ လနီးပါးကြာမြင့်တဲ့ထိုးစစ်တွေအောက်မှာ စစ်ကောင်စီရဲ့တပ်မအဆင့်ရှိတဲ့ စကခ – ၉တစ်ခုလုံး ဘယ်လို တိုက်ခိုက်ခံရပြီး ရှုံးနိမ့်သွားရလဲ. . . . ?ဆိုတာကို အခုဆောင်းပါးမှာအသေးစိတ်ဆက်လက်ရှင်းပြသွားပါမယ်။
ရှမ်း/မြောက်ဒေသမှာ ”၁၀၂၇ စစ်ဆင်ရေး”ဖော်ဆောင်လာချိန်မှာပဲ ညီနောင်မဟာမိတ် ၃ ဖွဲ့ရဲ့အဖွဲ့ဝင်ဖြစ်တဲ့ ရက္ခိုင့်တပ်တော်ကလည်း ပြီးခဲ့တဲ့ နိုဝင်ဘာ ၁၃ ရက်မှာ ပလက်ဝမြို့နယ်ကစစ်ကောင်စီတပ်စခန်းတွေကို ပထမဆုံးပစ်မှတ်ထားပြီး စစ်ဆင်ရေးတွေဖော်ဆောင်လာခဲ့ပါတယ်။
၂၀၁၅ ခုနှစ်ကနေ စစ်တပ်အာဏာမသိမ်းခင်အထိကြားကာလမှာ ရက္ခိုင့်တပ်တော်ကပြောက်ကျားနည်းစနစ်ကို အဓိကထားအသုံးပြုခဲ့ပေမယ့် အခုတကြော့ပြန်စစ်ဆင်ရေးတွေမှာတော့စခန်းသိမ်းတိုက်ပွဲတွေအဖြစ် အသွင် ပြောင်းလာတာကိုတွေ့ရပါတယ်။
တရွန်အိုင်၊ နှုံးဘူး၊ ရှင်းလက်ဝ၊ ပွိုင့် ၃၇၇၊ ခဝဲ၊ ဆမီး၊ မီးဝ၊ နှမဒါ၊ တင်းမ၊ တောင်ရှည်စတဲ့ဗျူဟာကုန်းတွေမှာ စစ်ကောင်စီက စကခ – ၁၉၊ တပ်မ ၁၁၊ အနောက်ပိုင်းတိုင်းစစ်ဌာနချုပ် – နပခလက်အောက်ခံ တပ်ရင်းအများအပြားနဲ့ ခံစစ်ဆင်ခဲ့ပါတယ်။
ဒါပေမယ့်လည်း ပလက်ဝမြို့အခြေစိုက် ခလရ ၂၈၉ ကို ဇန်နဝါရီ ၁၄ ရက်မှာပဲ ရက္ခိုင့်တပ်တော်ကအပြီးသတ်သိမ်း ပိုက်နိုင်ခဲ့ပြီးနောက်မှာတော့ ပလက်ဝမြို့နယ်တစ်ခုလုံးရက္ခိုင့်တပ်တော်လက်အောက်ကို အလုံးစုံကျရောက်သွား ခဲ့ပါတယ်။
ပလက်ဝအောင်ပွဲအပြီးမှာတော့ ရက္ခိုင့်တပ်တော်ရဲ့ထိုးစစ်တွေက တောင်ပိုင်းကိုတဖြေးဖြေးရွေ့လာခဲ့ပြီး မယူမြစ်၊ ကုလားတန်မြစ်၊ လေးမြို့မြစ်ဝှမ်းဒေသတွေကိုထိန်းချုပ်ဖို့ကြိုးစားလာတဲ့ အသွင်ဆောင်လာခဲ့ပါတယ်။
အဲဒီလိုအသွင်ဆောင်လာတာနဲ့အမျှ အဲဒီဒေသမှာ တပ်စွဲထားတဲ့ စကခ-၉ လက်အောက်ခံတပ်ရင်းတွေကိုရက္ခိုင့် တပ်တော်က စတင်ထိုးစစ်ဆင်လာခဲ့ပါတော့တယ်။
ကျောက်တော်မြို့မှာအခြေစိုက်ထားတဲ့ စကခ – ၉ လက်အောက်မှာ ခြေမြန်တပ်ရင်း ၁၀ ရင်းရှိပြီးကျောက်တော် မြို့ မှာ ခမရ ၃၇၄၊ ၃၇၅၊ ၃၇၆၊ ၅၃၉ ဆိုတဲ့ တပ်ရင်း ၄ ရင်း၊ မြောက်ဦးမြို့မှာ ခမရ ၃၇၇၊ ၃၇၈၊ ၅၄၀ ဆိုတဲ့ တပ်ရင်း ၃ ရင်း၊ မင်းပြားမြို့မှာ ခမရ ၃၇၉၊ ၃၈၀၊ ၅၄၁ ဆိုတဲ့ တပ်ရင်း ၃ ရင်းတို့ဖြစ်ကြပါတယ်။
ရက္ခိုင့်တပ်တော်ရဲ့ထိုးစစ်တွေကြောင့် ပထမဆုံးလက်မြှောက်အရှုံးပေးသွားရတာကတော့ ကျောက်တော်မြို့နယ်၊ ကန်စောက်တောင် အခြေစိုက် ခမရ ၅၃၉ ပဲပါ။
အနီးဝန်းကျင်မှာရှိတဲ့ အမြောက်တပ် အမတ – ၃၇၇ တပ်ရင်းကို ဇန်နဝါရီလ ၁၄ ရက်မှာ ရက္ခိုင့်တပ်တော်က သိမ်းပိုက်နိုင်ခဲ့ပြီး ခမရ – ၅၃၉ က စစ်ကောင်စီတပ်သားနဲ့ မိသားစုဝင် စုစုပေါင်း ၃၀၀ ကျော်လည်း လက်နက်ချခဲ့ ကြပါတယ်။
အဲဒီနောက်မှာတော့ မင်းပြားမြို့အခြေစိုက် ခမရ – ၃၈၀ ကို လက်နက်ကြီးပစ်ကူတွေ၊ ရေတပ်သင်္ဘောတွေကနေ ပစ်ခတ်နေတဲ့ကြားက ဇန်နဝါရီ ၂၈ ရက်မှာ ရက္ခိုင့်တပ်တော်က ခဲရာခဲဆစ်သိမ်းပိုက်နိုင်ခဲ့ပါတယ်။
စစ်ကောင်စီဘက်က စစ်ကူအင်အားဖြည့်တင်းခဲ့ပေမယ့် မြောက်ဦးမြို့မှာ အခိုင်အမာတည်ဆောက်ထားတဲ့ ခမရ – ၅၄၀ တပ်ရင်းနဲ့ ကျောက်တော်မြို့နဲ့ ၁ မိုင်ဝန်းကျင်အကွာ ကစ္ဆပနဒီတံတားအရှေ့ဘက်မှာရှိတဲ့ ခမရ – ၃၇၄ တပ်ရင်း၂ ရင်းကို ဇန်နဝါရီလ ၃၀ ရက်က
သိမ်းပိုက်ခဲ့ပါတယ်။
ခမရ – ၅၄၀ တပ်ရင်းဟာ မြောက်ဦးမြို့က ရှေးဟောင်းယဉ်ကျေးမှုအမွေအနှစ်တွေကို လက်နက်ကြီးနဲ့ ပစ်ခတ်ဖျက်ဆီးနေတဲ့ တပ်စခန်း ၁ ခု ဖြစ်တယ်လို့လည်း ရက္ခိုင့်တပ်တော်က ဆိုပါတယ်။
ဖေဖော်ဝါရီလအရောက်မှာလည်း ရသေ့တောင်၊ ရမ်းဗြဲမြို့တွေကိုပါ ရက္ခိုင့်တပ်တော်ကထိုးစစ်ဆင်လာတဲ့အပြင် စကခ – ၉ လက်အောက်ခံတပ်ရင်းအားလုံးသိမ်းပိုက်နိုင်ရေးစစ်ရှိန်မြှင့်လာပါတော့တယ်။
ဖေဖော်ဝါရီ ၂ ရက်မှာ ကျောက်တော်မြို့နဲ့ ၂ မိုင်ဝန်းကျင်ဝေးတဲ့ ဒေါင်းတောင်ယိုးရွာအနီးက ခမရ -၃၇၆ နဲ့ မြောက် ဦးအခြေစိုက် ခမရ – ၃၇၈ တို့ကို ရက္ခိုင့်တပ်တော်က ဆက်တိုက်သိမ်းပိုက်နိုင်ခဲ့ပြီး လက်နက်ခဲယမ်းအများအပြား သိမ်းဆည်းရရှိခဲ့တယ်လို့ အောင်ပွဲခံထုတ်ပြန်ပါတယ်။
မင်းပြားစစ်မျက်နှာမှာတော့ ခမရ – ၃၈၀ ကိုသိမ်းပိုက်ထားနိုင်တဲ့ ရက္ခိုင့်တပ်တော်က ကပ်လျက်တည်ရှိတဲ့ ခမရ – ၃၇၉ နဲ့ ခမရ – ၅၄၁ တပ်ရင်း ၂ ရင်းကိုပါ ဖေဖော်ဝါရီလ ၆ ရက်မှာ ဆက်လက်သိမ်းပိုက်လိုက်ပါတယ်။
မင်းပြားမြို့အရှေ့ဘက် ၁၀ မိုင်ဝန်းကျင်အကွာက ကမ်းနီ အမှတ် – ၉၊ တိုင်းဗဟိုတန်းမြင့်လေ့ကျင့်ရေးကျောင်းနဲ့ ကျိန်းတောင်တပ်စခန်းတွေကျန်ရှိနေသေးပေမယ့် မင်းပြားမြို့ကို အလုံးစုံထိန်းချုပ်လိုက်နိုင်ပြီလို့ ရက္ခိုင့်တပ်တော်က ကြေညာခဲ့ပါတယ်။
ဖေဖော်ဝါရီ ၆ ရက်မှာ ကျောက်တော်မြို့ ခမရ – ၃၇၅ နဲ့ စကခ – ၉အခြေစိုက်ရုံးတွေကို ရက္ခိုင့်တပ်တော်က သိမ်းပိုက်ခဲ့ပြီး ကျောက်တော်မြို့ကိုလည်း စစ်ကောင်စီက လက်လွှတ်လိုက်ရပြန်ပါတယ်။
အဲဒီစခန်းတွေကနေ ရေကြောင်းအတိုင်းဆုတ်ခွာထွက်ပြေးသွားတဲ့ စစ်ကောင်စီတပ်သားတွေကိုရက္ခိုင့်တပ်တော် က ကုလားတန်မြစ်ကြောင်းအတိုင်း လိုက်လံတိုက်ခိုက်ခဲ့ပြီး ဇက်ကူးရေယာဉ် ၂စီးကိုပါ နှစ်မြှုပ်နိုင်ခဲ့ပါတယ်။
အဲဒီတစ်ရက်တည်းမှာပဲ ခမရ – ၃၇၇ ကိုပါသိမ်းပိုက်နိုင်ခဲ့ပြီး ၈ ရက်မှာတော့ အမှတ် – ၃၁ ရဲတပ်ရင်းကိုပါသိမ်းပိုက်လိုက်နိုင်ခဲံတဲ့အတွက် မြို့တော်ဟောင်းဖြစ်တဲ့ မြောက်ဦးမြို့ကိုပါအလုံးစုံထိန်းချုပ်သွားနိုင်ခဲ့ပါတယ်။
”၁၀၂၇ စစ်ဆင်ရေး”မတိုင်ခင်တုန်းက ရက္ခိုင့်တပ်တော်ရဲ့ အင်အားကို ၃၀,၀၀၀ နီးပါးရှိမယ်လို့ခန့်မှန်းပြောဆိုခဲ့ကြပြီး BBCနဲ့ အင်တာဗျူးမှာတော့ ရက္ခိုင့်တပ်တော်ရဲ့ စစ်ဦးစီချုပ် ဗိုလ်ချုပ်ထွန်းမြတ်နိုင် က လတ်တလောတိုက်ပွဲအတွင်း အင်အား ၈,၀၀၀ တိုးလာခဲ့တယ်လို့ဖြေကြားထားပါတယ်။
၂၀၁၆ ခုနှစ်တုန်းက ရခိုင်ဒေသတွင်းခြေကုပ်ယူဖို့ ရက္ခိုင့်တပ်တော်က အင်အားအနည်းငယ်နဲ့စစ်ဆင်ရေးတွေ စတင်ဖော်ဆောင်လာချိန်မှာ ရန်သူအဖြစ် အဓိက ရင်ဆိုင်ခဲ့ရတာက စကခ-၉လက်အောက်ခံတပ်ရင်းတွေပဲ ဖြစ်ကြပါတယ်။
လက်ရှိအချိန်မှာတော့ ၁၉၉၅ ခုနှစ်ကစတင်တည်ထောင်ခဲ့တဲ့ စကခ-၉ ဟာ ရက္ခိုင့်တပ်တော်ကြောင့် အလုံးစုံပျက်စီးသွားခဲ့ရပါပြီ။
