ကောင်းချစ်အောင်
မေ ၁၅၊ ၂၀၂၃။
ယမန်နေ့က ကျင်းပခဲ့သည့် ထိုင်းနိုင်ငံရွေးကောက်ပွဲတွင် လူငယ်များ ဦးဆောင်သည့် Move Forward Party-MFP နှင့် ထိုင်းဝန်ကြီးချုပ်ဟောင်း သက်ဆင်၏ သမီးဖြစ်သူ ပေထုံထန်ရှင်နာဝပ် ဦးဆောင်သည့် Pheu Thai-ဖျူထိုင်းပါတီနှစ်ခုက မဲအများဆုံးနှင့် ရပ်တည်အနိုင်ရနေသည်ဟု ထိုင်းရွေးကောက်ပွဲကော်မရှင်ထံက သိရသည်။
အောက်လွှတ်တော် ရွေးကောက်ခံကိုယ်စားလှယ်နေရာ ၅၀၀ ရှိသည့်အနက် MFPပါတီက ၁၅၁နေရာအနိုင်ရထားပြီး Pheu Thai ပါတီက ၁၄၁တစ်နေရာနှင့် ဒုတိယအများဆုံးရပ်တည်နေသည်ဟု ထိုင်းရွေးကောက်ပွဲကော်မရှင် ဥက္ကဌ Ittiporn Boonprakon က ယနေ့နံနက်ပိုင်းက ပြုလုပ်သည့် သတင်းစာရှင်းလင်းပွဲတွင် ပြောသည်။
MFP ပါတီခေါင်းဆောင်လည်းဖြစ်ပြီး ဝန်ကြီးချုပ်နေရာ ဝင်ရောက်ယှဉ်ပြိုင်ခဲ့သည့် လင်ဂျာရွန်ရတ်က” ဒီရွေးကောက်ပွဲဟာ အာဏာရှင်စနစ် ဆန့်ကျင်ရေးပါတီတွေနဲ့ စစ်တပ်က ထောက်ခံတဲ့ ပါတီတွေကြား ပြိုင်ဆိုင်မှု ဖြစ်ခဲ့ပြီး အစိုးရဖွဲ့ခွင့် ရခဲ့မယ်ဆိုရင် သဘောထား မှန်မှန်နှင့် ဆက်လက် ရပ်တည်သွားမယ်”ဟု ပြောသည်။
ရွေးကောက်ပွဲရလဒ်များ တရားဝင် ထွက်ပေါ်လာသေးခြင်းမရှိသေးသော်လည်း စစ်တပ်အတိုက်အခံအဖြစ်ရပ်တည်သည့် ဒီမိုကရေစီအင်အားစုပါတီများ အသာစီးရနေခြင်းဖြစ်သည်ဟု ထိုင်းရွေးကောက်ပွဲစောင့်ကြည့်လေ့လာသူတစ်ဦးက ပြောသည်။
စစ်တပ်ကျောထောက်နောက်ခံပါတီများဖြစ်သည့် လက်ရှိဝန်ကြီးချုပ်ပရာယွတ်ချန်အိုချာဦးဆောင်သည့် United Thai Nation Partyပါတီနှင့် ဒုတိယဝန်ကြီးချုပ် ပရာဝတ်ဦးဆောင်သည့် BhumJaiTai ပါတီများမှာ မျှော်မှန်းထားသည်မဲရလဒ်ကို မရရှိခဲ့ဟု ထိုင်းရွေးကောက်ပွဲစောင့်ကြည့်သူများကဆိုသည်။
ယနေ့နံနက်ဆယ်နာရီအထိစာရင်းများအရ MFPက မဲအရေအတွက် အများဆုံး ၁၄သန်းနှင့် ထိပ်ဆုံးကဦးဆောင်နေပြီး Pheu Thai ပါတီက မဲ ၁၀ သန်းကျော်နှင့် ဒုတိယနေရာတွင် ရပ်တည်နေသည်။
မဲဆွယ်ကာလတွင် ဆေးခြောက်ကို တရားဝင် လွတ်လပ်စွာသုံးစွဲခွင့်ပေးမည်ဟု ကြွေးကြော်ထားသည့် BhumJaiTai ပါတီက ၇၁ နေရာဖြင့် တတိယ၊ လက်ရှိ ဒုဝန်ကြီးချုပ် ဗိုလ်ချုပ်ကြီးဟောင်း ပရာဝိ ဦးဆောင်သည့် Palang Pracharath ပါတီက ၄၀နေရာဖြင့် စတုတ္ထ၊ လက်ရှိဝန်ကြီးချုပ် ပရာယွတ်၏ United Thai Nation ပါတီက ၃၆နေရာဖြင့် ရပ်တည်နေသည်။
ထိုင်းနိုင်ငံ၏ ဖွဲ့စည်းပုံအခြေခံဉပဒေအရ အထက်လွှတ်တော် ၂၅၀ နေရာကို စစ်တပ်ကတိုက်ရိုက်ရွေးချယ်တင်မြှောက်ပြီး အောက်လွှတ်တော် ၅၀၀ နေရာကို ရွေးကောက်ပွဲကတဆင့် ရွေးချယ်ခြင်းလည်းဖြစ်သည်။
ထို့ကြောင့် အရပ်သားများဦးဆောင်ပြီး ညွန့်ပေါင်းအစိုးရဖွဲ့နိုင်ရေးသည် အထက်လွှတ်တော်၊ အောက်လွှတ်တော်နှစ်ခုအမတ်စုစုပေါင်းဦးရေ၏ ထက်ဝက်ကျော် ၃၇၆ နေရာရရှိရန်လိုအပ်သည်။
လက်ရှိ မဲအများဆုံးအနိုင်ရထားသည့် Move Forward ပါတီခေါင်းဆောင် လင်ဂျာရွန်ရတ်မှာ ဝန်ကြီးချုပ်ဖြစ်ရန်အလားအလာကောင်းနေပြီး ဒီမိုကရေစီအားပြုသည့် စစ်တပ်အတိုက်အခံပါတီများစုပေါင်းကာ ညွန့်ပေါင်းအစိုးရဖွဲ့သွားနိုင်ချေ ရှိသည်ဟု လေ့လာသုံးသပ်သူများကပြောသည်။
သို့သော်လည်း ၂၀၁၉ ရွေးကောက်ပွဲတွင်လည်း Pheu Thai ပါတီသည် အောက်လွှတ်တော်အမတ်နေရာအများဆုံး အနိုင်ရခဲ့သော်လည်း ဝန်ကြီးချုပ်နေရာရွေးချယ်ရန် လိုအပ်သည့် အရေအတွက်မရခဲ့သည့်အတွက် အစိုးရဖွဲ့နိုင်ခဲ့ခြင်းမရှိခဲ့ပေ။
MFP ပါတီခေါင်းဆောင်လင်ဂျာရွန်ရတ်၏ ယမန်နေ့ညက သတင်းစာရှင်းလင်းပွဲတွင် Pheu Thai ပါတီနှင့် ညွန့်ပေါင်းအစိုးရဖွဲ့နိုင်ရန်အတွက်ဆွေးနွေးမှုများပြုလုပ်ရန်ရှိပြီး Pheu Thai ပါတီဦးဆောင်သူ ပေထုံထန်ရှင်နာဝပ်ကတော့ ပြည်သူ့လူထုရဲ့ဆန္ဒအသံကသာ အရေးကြီးဆုံးဖြစ်သည်ဟု ဆိုသည်။
၂၀၁၄ ခုနှစ်က အာဏာသိမ်းပြီး ထိုင်းနိုင်ငံကို ၉ နှစ်ကြာ အုပ်ချုပ်ခဲ့သည့် ဝန်ကြီးချုပ် ပရာရွတ်က ယမန်နေ့ညနေပိုင်းတွင် သူ၏ပါတီဌာနချုပ် ရှေ့က တိုးတိုးတိတ်တိတ် ထွက်ခွာသွားပြီး သူ့အနေဖြင့် နိုင်ငံ ငြိမ်းချမ်းပြီး သာယာဝပြောဖို့ကို မျှော်လင့်သလို ဒီမိုကရေစီနှင့် ရွေးကောက်ပွဲအပေါ် လေးစားအသိအမှတ်ပြုမည်ဟု မှတ်ချက်ပြုထားသည်။
Move Forward ပါတီသည် ၂၀၂၁ခုနှစ် ဖေဖော်ဝါရီ လက မြန်မာစစ်တပ်အာဏာသိမ်းမှုကို ဆန့်ကျင်ကန့်ကွက်ကြောင်းထုတ်ပြန်ခဲ့သလို မဲဆောက်တွင် ဆေးကုရန်လာရောက်သည့် PDF တပ်ဖွဲ့ဝင်သုံးဦးကို ထိုင်းရဲနှင့် တောမောင်း(လဝက)များက ဖမ်းဆီးခဲ့သည့်ကိစ္စနှင့်ပတ်သတ်ပြီး လက်ရှိထိုင်းအစိုးရအာဏာပိုင်များကို ကန့်ကွက်စာထုတ်ပြန်ခဲ့ဖူးသည်။
ဒီမိုကရေစီပါတီများ အနိုင်ရပြီး အစိုးရဖွဲ့နိုင်လျှင် မြန်မာနိင်ငံကပြည်သူများအတွက် လူသားချင်းစာနာထောက်ထားမှုအကူညီနှင့် အခြားမူဝါဒအပြောင်းအလဲများ ရှိနိင်သည်ဟု ထိုင်း-မြန်မာအရေး လေ့လာသူများက သုံးသပ်ထားသည်။
Photo – Bangkok Post
Telegram Link – https://t.me/newstlk/1055
