Saw Smith
မေ ၆၊ ၂၀၂၃။
ကရင်ပြည်နယ်အတွင်း၌ ရာဇဝတ်မှုများနှင့် ဆက်စပ်သည့် စီးပွားရေးလုပ်ငန်းများတွင် ပါဝင်ပတ်သက်နေသောခေါင်းဆောင်များကို စုံစမ်း စစ်ဆေးအရေးယူသွားမည်ဟု ကေအဲန်ယူပြောခွင့်ရ ဗဟိုအလုပ်အမှုဆောင်ကော်မတီဝင် ပဒိုစောကလယ်စေးက သံလွင်ခက်ကို ပြောသည်။
မောထိုတလေးဒေသရှိ ဟွမ်ယာ Hyunya တရုတ်မြို့သစ်စီမံကိန်း၊ တရုတ်ရာဇဝတ်ဂိုဏ်းများနှင့် ပတ်သက်နေသော KK Park လောင်းကစားရုံကိစ္စများအပါအဝင် တရားမဝင် စီးပွားရေးလုပ်ငန်းများတွင် ကေအဲန်ယူ ပါဝင်ပတ်သက်နေသည်ဟု ပြောဆိုမှုများကို ဆန့်ကျင်ကန့်ကွက်ကြောင်း ကေအဲန်ယူဗဟိုက ယနေ့တွင် ထုတ်ပြန်သည်။
တစ်ဆက်တည်း အခြေအနေမှန် သိရှိဖော်ပြနိုင်ရေးအတွက် စုံစမ်းစစ်ဆေးရန် ကေအဲန်ယူဗဟိုအဆင့်က ဦးဆောင်ကာ လွတ်လပ်ပြီး ဘက်မလိုက်သည့် စုံစမ်းစစ်ဆေးရေးအဖွဲ့များ ပါဝင်သော အဖွဲ့ကို ဖွဲ့စည်းပြီး ကေအဲန်ယူ မူဝါဒနှင့် စည်းမျဥ်းဥပဒေများအတိုင်း အကောင်အထည်ဖော်သွားမည်ဖြစ်သည်ဟု ဖော်ပြထားသည်။
“ရေးသားဖော်ပြမှုတွေက စွပ်စွဲတဲ့ ပုံစံမျိုး သက်ရောက်တဲ့ သဘော ရှိတဲ့အတွက် ကျွန်တော်တို့က အဲဒါကို ဆန့်ကျင်တာပါ။ ဒါပေမယ့် တစ်ဖက်ကလည်း အချက်အလက်တွေနဲ့ လိုင်းပေါ် တက်လာတဲ့ ဟာတွေကို ကျွန်တော်တို့က စုံစမ်းစစ်ဆေးမှု ပြုလုပ်ပါမယ်ဆိုတာကို ကျွန်တော်တို့ ပြောဆိုထားတာ ဖြစ်ပါတယ်” ဟု ကေအဲန်ယူဗဟိုအလုပ်အမှုဆောင်ကော်မတီ၏ ထုတ်ပြန်ချက်နှင့် ပတ်သက်ပြီး ပဒိုစောကလယ်စေးက သံလွင်ခက်ကိုပြောသည်။
ကေအဲန်ယူ၏ ထုတ်ပြန်ချက်တွင် မောထိုတလေးဒေသရှိ ဟွမ်ယာ Hyunya တရုတ်မြို့သစ်စီမံကိန်းနှင့် ပတ်သက်သည့် မောလောအိအလင်းကုမ္ပဏီသည် ၎င်းစီမံကိန်းမှ ၂၀၂၂ ခုနှစ် ဒီဇင်ဘာလကတည်းက နုတ်ထွက်သွားပြီ ဖြစ်သောကြောင့် စီမံကိန်းနှင့်ပတ်သက်၍ မည်သည့်ကိစ္စမဆိုသည် ကေအဲန်ယူနှင့် မပတ်သက်ကြောင်း၊ KK Park ဟုလူသိများပြီး တရုတ်ရာဇဝတ်ဂိုဏ်းများ ပါဝင်ပတ်သက်နေသော လောင်းကစားရုံသည် ကေအဲန်ယူနှင့် လုံးဝပတ်သက်မှု မရှိကြောင်း အသိပေးအပ်ပါသည်ဟု ပါရှိသည်။
သို့သော်လည်း ၂၀၂၀ ပြည့်နှစ်၊ ဖေဖော်ဝါရီလတွင် အုတ်မြစ်ချခဲ့သော မြဝတီမြို့တောင်ဘက် မောထိုတလေးနယ်မြေရှိ ဟွမ်ဟာတရုတ်မြို့သစ်စီမံကိန်း၌ ယခင် ကေအဲန်ယူဗဟိုအလုပ်အမှုဆောင်ကော်မတီဝင်နှင့်ကာကွယ်ရေးဌာနမှူး ပဒိုစောရောဂျာခင်မှ ပါဝင်လက်မှတ်ထိုးထားသည့် အထောက်အထားများဖြင့် အဆိုပါလုပ်ငန်းအပေါ် ကေအဲန်ယူ၏ ပါဝင်ပတ်သက်မှုကို ဝေဖန်ပြောဆိုနေကြခြင်းဖြစ်သည်။
ထို့ပြင် ပြီးခဲ့သော ရက်ပိုင်း၌လည်း ပဒိုစောရောဂျာခင်၊ တပ်မဟာ ၇ တပ်မဟာမှူး ဗိုလ်မှူးချုပ်စောဖော်ဒိုနှင့် KNLA စစ်ဦးစီးချုပ် ဗိုလ်ချုပ်ကြီး စောဂျော်နီ၏ သားတို့အပါအဝင် ခေါင်ဆောင် ငါးဦးအား တရားမဝင် စီးပွားရေးလုပ်ငန်းများနှင့်ပတ်သက်၍ စစ်ဆေးအရေးယူပေးပါရန် တပ်မဟာ ၅ ၏ တင်ပြလာမှုအပေါ် ကေအဲန်ယူကအရေးယူသွားမည်ဟု ကရင်ဘာသာဖြင့် ထုတ်ပြန်ချက် တစ်စောင်လည်း လူမှုကွန်ရက်တွင် ပျံ့နှံနေခဲ့သည်။
ပြီးခဲ့သော ဧပြီလ ၂၇ ရက်ပါ ရက်စွဲဖြင့် ကေအဲန်ယူ၏ တံဆိပ်နှင့် ထွက်ပေါ်လာသော အဆိုပါထုတ်ပြန်ချက်သည်၁၇ ကြိမ်မြောက် ကေအဲန်ယူကွန်ဂရက်အစည်းအဝေးအတွင်းမှ ဆွေးနွေးဆုံးဖြတ်ချက်များဖြစ်သည်ဟု ကေအဲန်ယူနှင့် နီးစပ်သည့် သံလွင်ခက်၏ သတင်းအရင်းအမြစ်က အတည်ပြုပြောသည်။
အဆိုပါ ငါးဦးနှင့် ပတ်သက်၍ ထွက်ပေါ်လာသော ထုတ်ပြန်ချက်သည် ကေအဲန်ယူဗဟိုက တရားဝင် ထုတ်ပြန်ထားခြင်း မရှိသည့်အပြင် ကေအဲန်ယူပြောခွင့်ရ ပဒိုစောကလယ်ဆေးကလည်း အတည်ပြု၍ မရကြောင်း သံလွင်ခက်ကို ပြောသည်။
သို့သော် အချက်အလက်များဖြင့် ဝေဖန်ထောက်ပြထားသည့် ခေါင်းဆောင်များကို စုံးစမ်းမေးမြန်သွားမည်ဖြစ်ကြောင်း ၎င်းက ပြောသည်။
ထိုသို့စုံစမ်းစစ်ဆေးသွားမည့် ခေါင်းဆောင် မည်မျှရှိကြောင်းမေးမြန်းရာ “အဓိကကတော့ တင်ပြခြင်း ခံရတဲ့ခေါင်းဆောင်တွေပဲ ရှိပါတယ်။ ကျန်တာကတော့ မရှိပါဘူး” ဟု ပဒိုစောကလယ်စေးက ပြောသည်။
စုံစမ်းစစ်ဆေးမှုနှင့်ပတ်သက်သည့် မေးမြန်းမှုများအား လိုအပ်သလိုထုတ်ဖော်ပြောသွားမည်ဖြစ်ပြီး ဥပဒေချိုးဖောက်မှုများ ဖော်ထုတ်တွေ့ရှိပါက လိုအပ်သလို အရေးယူမှုများ လုပ်ကိုင်သွားမည်ဖြစ်သည်ဟု ကေအဲန်ယူ ဗဟိုအလုပ်အမှုဆောင်ကော်မတီက ယနေ့တွင် ထုတ်ပြန်ထားသည်။
*****************
အောက်ဖော်ပြပါလင့်တွေမှာ သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram-> https://t.me/newstlk/944
YouTube -> https://youtu.be/zxRTM_OZtf4
Website -> https://thanlwinkhet.net/?p=4089&preview=true
Website ->https://eng.thanlwinkhet.net
