ရှမ်းမြောက် ရေအားလျှပ်စစ်စီမံကိန်းများ ရပ်တန့်ပေးရန် တောင်းဆို

ယမင်းဖူးပွင့်အောင်

ဧပြီ ၂၆၊ ၂၀၂၃။

ရှမ်းပြည်နယ် မြောက်ပိုင်းက  စစ်ကောင်စီ၏ ရေအားလျှပ်စစ်စီမံကိန်း ရပ်တန့်ပေးရန် အရပ်ဘက်အဖွဲ့အစည်းများက ယမန်နေ့က အိတ်ဖွင့်စာပေးပို့ တောင်းဆိုထားသည်။

သက်ဆိုင်ရာ လူမျိုးစုလက်နက်ကိုင် ရှမ်း တော်လှန်ရေးတပ်ဖွဲ့များနှင့် ရှမ်း နိုင်ငံရေးပါတီများထံပေးပို့တောင်းဆိုထားခြင်း ဖြစ်သည်။

ဒုဌဝတီမြစ်ပေါ်တွင် တည်ဆောက်နေသည့် အထက်ရဲရွာရေအားလျှပ်စစ်၊ နမ္မတူရေအားလျှပ်စစ်စီမံကိန်းတို့အပါအဝင် တည်ဆောက်ရန် ကျန်ရှိနေသေးသည့် အလယ်ရဲရွာရေအားလျှပ်စစ်စီမံကိန်း တည်ဆောက်မှုများရပ်တန့်သွားစေရန် မည်သည့်နည်းနှင့်မဆို တားဆီး ကူညီဆောင်ရွက်ပေးပါရန် တောင်းဆိုသည်ဟု အိတ်ဖွင့်စာတွင်ပါရှိသည်။

ရှမ်းပြည်နယ် အရပ်ဘက်အဖွဲ့အစည်းမှ တာဝန်ရှိသူတစ်ဦးဖြစ်သည့် ဗင်ဒါက “အဓိကက တိုင်းရင်းသားလက်နက်ကိုင်တွေ‌ဆိုတာက ပြည်သူတွေကိုကာကွယ်ဖို့ သူတို့ရဲ့ရည်ရွယ်ချက်ထဲမှာပါမယ်လို့ ယုံကြည်ပါတယ်။သူတို့အနေနဲ့ ကူညီပေးနိုင်ပါစေလို့ အသိပေးတဲ့‌အနေနဲ့ပေးဖြစ်တာပါ” ဟု သံလွင်ခက်ကိုပြောသည်။

ကျေးရွာအုပ်စု ၁၁ စုခန့် ရေနစ်မြုပ်နိုင်သဖြင့်  စီမံကိန်းရပ်တန့်စေရန် တားဆီးကူညီစေလိုသည်ဟု  လည်း အိတ်ဖွင့်စာတွင် ထည့်သွင်း ဖော်ပြထားသည်။

Global Shan Network၊ Tai Youth Yangon၊ Tai Youth Community South Korea၊ Tai Youths Network Japan၊Tai Youth Htong Mao၊ Tai Students’ Union၊ Namtu River Protectors၊  Progressive Youth  Network Hsipa၊Kyun Ta Htaung Myae Foundation၊  Shan Youth WingMaw၊ Shan Community in Japan၊Tai Community (Canada)၊Tai Youth Laikha စသည့် အဖွဲ့အစည်း ၁၃ ခုပူးပေါင်း၍ အိတ်ဖွင့်စာပေးပို့ခဲ့ခြင်းဖြစ်သည်။

အဆိုပါစီမံကိန်းများကြောင့် သီပေါမြို့နယ်ရှိ သမိုင်းဝင် ဘော်ကြိုဘုရားကြီး အပါအဝင် ကျေးရွာအုပ်စု ၁၁ စုနှင့်နမ့်ဆန်မြို့နယ်မှ လီလုကျေးရွာတို့ ရေအောက်သို့ နစ်မြုပ်ကာ ဒေသခံပြည်သူသောင်းချီ၏လူမှုဘ၀များကို ကိုထိခိုက်စေနိုင်သည်ဟု ဒေသခံများကပြောသည်။

ထို့ပြင် ရှမ်းပြည်အတွင်းရှိ မြစ်များပေါ်တွင် ဧရာမရေကာတာကြီး ဆယ်ခုရှိနှင့်နေပြီး အဆိုပါရေကာတာများမှထုတ်လုပ်သောလျှပ်စစ်သည် မြန်မာပြည်ရေအားလျှပ်စစ်ထုတ်လုပ်မှု၏ ထက်ဝက်ကျော်ပမာဏရှိသော်လည်းရှမ်းပြည်ရှိ ဒေသအများအပြားတွင် လျှပ်စစ်မီးကို ယခုထက်တိုင် မရရှိသေးဟု ဒေသခံတစ်ဦးကပြောသည်။

“ဘယ်တုန်းကမှတော့ အစိုးရဘက်က ပြည်သူတွေရဲ့အသံကိုနားထောင်ခဲ့တာမျိူးမရှိဘူး။ နိုင်ငံတကာ ကုမ္ပဏီတွေကိုတောင်းဆိုတဲ့အခါမှာတစ်ချို့ကတော့ နှုတ်ထွက်တာမျိုးတွေရှိတယ်” ဟု ၎င်းကဆိုသည်။

အဆိုပါ ရေအားလျှပ်စစ်စီမံကိန်းကို ၂၀၀၈  ခုနှစ်ကတည်းကစတင်ခဲ့ပြီး ၂၀၁၄ ခုနှစ်တွင် ပြည်သူများကသိရှိကာသက်ဆိုင်ရာအစိုးရကို ဆန္ဒပြကန့်ကွက်ခဲ့ဖူးသည်။

ပုံစာ– အထက်ရဲရွာ ရေအားလျှပ်စစ်စီမံကိန်းမြင်ကွင်း။

Photo -Crd

*****************

အောက်ဖော်ပြပါလင့်တွေမှာ သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – > https://t.me/newstlk/822

YouTube -> https://youtu.be/zxRTM_OZtf4

Website -> https://thanlwinkhet.net/?p=3830

Website ->https://eng.thanlwinkhet.net