စစ်ခေါင်းဆောင် မင်းအောင်လှိုင်ကို ဆန္ဒပြ၍ ထိန်းသိမ်းခံရသော ထိုင်းကျောင်းသားကို ည ၇:၁၀ နာရီတွင် ရဲများက စွဲချက်တင်အမှုဖွင့်ခြင်းမရှိဘဲ ပြန်လွှတ်ပေးခဲ့သည်ဟု ရန်နဝါရဲစခန်းရှိ ထိုင်းသတင်းထောက်များ၏ အတည်ပြုချက်အရ သိရသည်။
လူ့အခွင့်အရေးရှေ့နေများဌာနမှ စေတနာ့ဝန်ထမ်းရှေ့နေတစ်ဦးက ထိုင်းကျောင်းသား ပွမ် ရန်နဝါရဲစခန်းသို့ ရောက်ရှိလာသောအခါ သူ၏ အိတ်ကို ရှာဖွေခဲ့သောအချိန်တွင် သူက ပူးပေါင်းဆောင်ရွက်ခဲ့ပြီး ဥပဒေနှင့်မညီသော မည်သည့်အရာမျှ မရှိဟု ယုံကြည်သောကြောင့် လွှတ်ပေးခဲ့ခြင်းဖြစ်သည်ဟု သိရသည်။
ထိုင်းအာဏာပိုင်များက ဆန္ဒပြဧရိယာသည် ကြိုတင်ခွင့်ပြုချက် လိုအပ်ကြောင်း အကြောင်းပြကာ ပွမ်သည် ခွင့်ပြုချက်ရရှိထားသူ မဟုတ်ဆိုသည့် အကြောင်းပြချက်ဖြင့် ရဲစခန်းသို့ ခေါ်ဆောင်ခံခဲ့ရခြင်းဖြစ်သည်ဟု ရှေ့နေက ရှင်းပြခဲ့သည်။
သူ့အား သံသယဖြစ်ဖွယ် ပုဂ္ဂိုလ်တစ်ဦးအဖြစ် သတ်မှတ်ကာ ရန်နဝါရဲစခန်းသို့ ခေါ်ဆောင်သွားခဲ့ခြင်းဖြစ်သည်။ သို့သော် အာဏာပိုင်များသည် ယနေ့တွင် တရားဝင် စွဲချက်များ မတင်ခဲ့သော်လည်း အရာရှိများသည် သက်သေခံအထောက်အထားများ စုဆောင်းထားပြီးဖြစ်သောကြောင့် နောင်တွင် တရားစွဲဆိုမှု ဖြစ်နိုင်ချေရှိသေးသည်ဟု သိရသည်။ ဖမ်းဆီးမှုမှတ်တမ်းတွင် သူ့အား “သတင်းပေးမှုအရ ခေါ်ဆောင်လာခဲ့သည်” ဟု မှတ်သားထားကာ ပွမ်အား နောင်တွင် လှုပ်ရှားမှုများ၌ မပါဝင်ရန် ဖိအားပေးနိုင်သည်ဟုလည်း သိရသည်။
ထိုင်းနိုင်ငံ ဘန်ကောက်မြို့သို့ ရောက်ရှိနေသော စစ်ခေါင်းဆောင် မင်းအောင်လှိုင်ကို ဘန်ကောက်မြို့ ရှန်ဂရီလာဟိုတယ်တွင် တက္ကသိုလ် ပထမနှစ် ထိုင်းကျောင်းသားတစ်ဦးက ယနေ့ ညနေ ၄:၃၀ နာရီတွင် ကန့်ကွက် ဆန္ဒပြချိန်၌ ဖမ်းဆီးခံခဲ့ရခြင်းဖြစ်သည်။
