သံလွင်ခက်/ဧပြီ ၆။
ထိုင်း-မြန်မာနယ်စပ် တက်-မဲဆောက် အဝေးပြေးလမ်းမကြီးပေါ်တွင် ယနေ့ညနေပိုင်းက ခရီးသည်တင်ဗန်ကားတစ်စီးနှင့် ဆယ်ဘီးကုန်တင်ကားတို့ ပြင်းထန်စွာ တိုက်မိခဲ့ရာ လူ ၅ ဦး နေရာ၌ပင် သေဆုံးပြီး ၉ ဦး ဒဏ်ရာရရှိခဲ့သည့် ဖြစ်စဉ်တစ်ခု ဖြစ်ပွားခဲ့သည်။
ဧပြီလ ၆ ရက်၊ ညနေ ၅ နာရီ ၅၇ မိနစ်အချိန်တွင် တက်မြို့အဝင်ဘက်ခြမ်း၊ အမှတ် (၁၂) အဝေးပြေးလမ်းမကြီးပေါ်ရှိ ဘန့်ဟွေနိန်ကျေးရွာအနီးတွင် ယခုဖြစ်စဉ် ဖြစ်ပွားခဲ့ခြင်းဖြစ်သည်။
မဲထောရဲစခန်းမှ ဒုရဲမှူး ကီယာတီဆက် ဘွန်းလောင်နှင့် အဖွဲ့သည် သတင်းရရှိသည်နှင့်တစ်ပြိုင်နက် ဆွန်ဒက်ဖရာစောတက်ဆင် ဆေးရုံမှ လူနာတင်ယာဉ်များ၊ ကယ်ဆယ်ရေးအဖွဲ့များနှင့်အတူ အခင်းဖြစ်ပွားရာသို့ သွားရောက်စစ်ဆေးခဲ့သည်။
အခင်းဖြစ်နေရာတွင် လိုင်စင်နံပါတ် ၁၀-၁၅၄၀ (တက်) ပါ ခရီးသည်တင်ဗန်ကားမှာ လမ်းဘေးရပ်ထားသည့် လိုင်စင်နံပါတ် ၈၃-၄၅၄၈ (ပထုံသာနီ) ပါ ဆယ်ဘီးကုန်တင်ကား၏ နောက်ပိုင်းကို အရှိန်ပြင်းစွာ ဝင်တိုက်မိထားခြင်း ဖြစ်သည်။
ဗန်ကားယာဉ်မောင်း ဦးနီခွန် (၇၂ နှစ်) အပါအဝင် အမျိုးသား ၂ ဦးနှင့် အမျိုးသမီး ၃ ဦး စုစုပေါင်း ၅ ဦး နေရာတွင် သေဆုံးခဲ့သည်။
သေဆုံးသူများထဲတွင် ဆွန်ဒက်ဖရာစောတက်ဆင်မဟာရာဇ် ဆေးရုံတွင် တာဝန်ကျသည်မှာ ၅ ရက်သာ ရှိသေးသည့် သူနာပြုသစ်တစ်ဦး ပါဝင်နေသည်။
ခရီးသည် ၉ ဦး ဒဏ်ရာရရှိခဲ့ပြီး ၎င်းတို့အနက် ၂ ဦးမှာ စိုးရိမ်ရသည့် အခြေအနေရှိသောကြောင့် အရေးပေါ် ကုသမှုများ ခံယူနေရသည်။
မျက်မြင်သက်သေများ၏ အဆိုအရ ဆယ်ဘီးကားယာဉ်မောင်း ဦးဝိချစ် (၄၂ နှစ်) မှာ ပစ္စည်းဝယ်ရန် ကားကို လမ်းဘေးတွင် ရပ်တန့်ထားစဉ် မဲဆောက်ဘက်မှ မောင်းနှင်လာသော ဗန်ကားမှာ လမ်းပေါ်တွင် ယိုင်ထိုးလာပြီးနောက် ကုန်တင်ကားနောက်ပိုင်းကို တိုက်မိခဲ့ခြင်း ဖြစ်သည်။
ရဲတပ်ဖွဲ့၏ ကနဦးသုံးသပ်ချက်အရ ဗန်ကားယာဉ်မောင်းမှာ ငိုက်မြည်းသွားခြင်း (Micro-sleep) ကြောင့် အရှိန်မထိန်းနိုင်ဘဲ ဖြစ်ပွားရခြင်း ဖြစ်နိုင်ကြောင်း သိရသည်။
လက်ရှိတွင် ရဲတပ်ဖွဲ့က မှုခင်းသိပ္ပံဆိုင်ရာ အထောက်အထားများ စုဆောင်းနေပြီး ယာဉ်မောင်းနှစ်ဦးလုံး၏ တရားဥပဒေဆိုင်ရာ တာဝန်ရှိမှုများကို ဆက်လက်စုံစမ်း စစ်ဆေးလျက်ရှိသည်။
ရည်ညွှန်းကိုးကား – ထိုင်းသတင်းများ
#မဲဆောက် #ဗန်ကား #ကုန်တင်ကားတိုက်မိ #ThanLwinKhetNews
