မြန်မာနိုင်ငံတွင် ငလျင်ဒဏ်ခံစားနေရသော ပြည်သူများအား ကူညီရန် ဖိလစ်ပိုင်နိုင်ငံ၏ ရှာဖွေကယ်ဆယ်ရေးနှင့် ကျန်းမာရေးအဖွဲ့သည် Colonel Jesus Villamor လေကြောင်းအခြေစိုက်စခန်း Pasay မြို့မှ ဧပြီလ ၁ ရက်တွင် ထွက်ခွာခဲ့သည်။
အဆိုပါလေတပ်စခန်းတွင် ကျန်းမာရေးဝန်ကြီးဌာန အတွင်းဝန် တီယိုဒိုရို ဟာဘိုဆာ၊ ပြည်သူ့ကာကွယ်ရေးဦးစီးဌာန (OCD) အတွင်းဝန် အရီယယ် အက်ဖ် နီပိုမူဆီနိုနှင့် ဖိလစ်ပိုင်လေတပ်၏ တပ်မှူးချုပ် ဗိုလ်ချုပ်ကြီး အာသာအမ်ကော်ဒူရာ တို့ကလိုက်ပါပို့ဆောင်ခဲ့သည်။
ဖိလစ်ပိုင်ကယ်ဆယ်ရေးအဖွဲ့တွင် လေတပ်ဗိုလ်မှူး Arthur M. Cordura က ဦးဆောင်ပြီး အဖွဲ့ဝင် ၉၁ ဦးပါရှိသည်ဟု ဖိလစ်ပိုင်နိုင်ငံ လေကြောင်းတပ်ဖွဲ့က သတင်းထုတ်ပြန်ခဲ့သည်။
ကယ်ဆယ်ရေးတပ်ဖွဲ့များတွင် မြို့ပြရှာဖွေကယ်ဆယ်ရေးလုပ်ဆောင်နိုင်ရန်အတွက် ဖိလစ်ပိုင်တပ်မတော်၊ လေတပ်၊ မီးသတ်ဦးစီးဌာန၊ မက်ထရိုပိုလစ်တန်မနီလာဖွံ့ဖြိုးရေးအေဂျင်စီနှင့် သဘာဝပတ်ဝန်းကျင်ထိန်းသိမ်းရေးဌာန/ပုဂ္ဂလိကကဏ္ဍတို့က ပါဝင်ဆောင်ရွက်မည်ဟု ဖော်ပြထားပြီး
ဖိလစ်ပိုင်ဆေးဘက်ဆိုင်ရာအကူအညီအဖွဲ့တွင် ကျန်းမာရေးဝန်ကြီးဌာနနှင့် ပြည်သူကာကွယ်ရေးရုံးမှ ချိတ်ဆက်ညှိနှိုင်းရေးကိုယ်စားများ ပါဝင်ဆောင်ရွက်မည်ဟု ဆိုသည်။
အဆိုပါ ဆောင်ရွက်သူများအနက် ဧပြီလ ၁ ရက်တွင် C-130 လေယာဉ် ၂ စီးဖြင့် ၅၈ ဦး၊ ကျန်အဖွဲ့ဝင်များကို ဧပြီလ ၂ ရက်တွင် C-130 လေယာဉ်တစ်စီးဖြင့်ပို့ဆောင်မည်ဖြစ်ပြီး မြန်မာနိုင်ငံတွင် ၂ ပတ်ကြာ ကူညီကယ်ဆယ်ရေးများလုပ်ဆောင်မည်ဖြစ်သည်။
၂ ပတ်ကြာကာလအတွင်း ရှာဖွေကယ်ဆယ်ရေးပစ္စည်းကိရိယာများ၊ ဆေးဘက်ဆိုင်ရာပစ္စည်းများ နှင့်အတူ အသက်ကယ်လုပ်ငန်းများ၊ ကျန်းမာရေးဝန်ဆောင်မှုများနှင့် အရေးပေါ်အကူအညီများ ပေးအပ်သွားမည်ဟု ဖော်ပြထားသည်။
ဖိလစ်ပိုင်လေတပ်၏ တပ်ဖွဲ့၄၀ သည် လေယာဉ်မှူးများ၊ လေကြောင်းဆေးဘက်ဆိုင်ရာဝန်ထမ်းများ နှင့် လေယာဉ်လုံခြုံရေးအဖွဲ့များ အဖြစ် ပါဝင်ဆောင်ရွက်မည်ဟု ထည့်သွင်းရေးသားထားသည်
ကိုးကား/ဓါတ်ပုံ – ဖိလစ်ပိုင်လေတပ်နှင့် ဖိလစ်ပိုင် အစိုးရထုတ်ပြန်ချက်များ
