မြန်မာနိုင်ငံတွင် ယမန်နေ့ မတ်လ ၂၈ ရက်က ဖြစ်ပွားခဲ့သော အင်အားအလွန်ပြင်းထန်သည့် မြေငလျင်ကြောင့် လူသားချင်းစာနာမှု အကူအညီ တောင်းဆိုချက်အရ စင်္ကာပူအရပ်ဘက်ကာကွယ်ရေးတပ်ဖွဲ့ (SCDF) မှ သဘာဝဘေးကယ်ဆယ်ရေး လုပ်ငန်းများအတွက် Operation Lionheart (OLH) စစ်ဆင်ရေးအဖွဲ့ကို စေလွှတ်ထားပြီ ဖြစ်သည်ဟု အဆိုပါအဖွဲ့ ထုတ်ပြချက်အရ သိရသည်။
ယင်းအဖွဲ့သည် ယနေ့ မတ်လ ၂၉ ရက် နေ့လယ် ၁:၂၀ နာရီခန့်တွင် ချန်ဂီလေဆိပ်မှ ထွက်ခွာလာပြီး ၈၀ ဦးပါဝင်ကာ ဘေးအန္တရာယ်အကူအညီနှင့် ကယ်ဆယ်ရေးအဖွဲ့ (DART) မှ အထူးကယ်ဆယ်ရေးသမားများ၊ လုပ်ငန်းဆောင်ရွက်နိုင်စွမ်းရှိသည့် အမျိုးသားဝန်ထမ်းများ (ORNS)၊ ဆရာဝန်များ၊ ရှေးဦးသူနာပြုများ၊ အနံ့ခံခွေးလေးကောင်ဖြင့် ရှာဖွေရေးကျွမ်းကျင်သူများ၊ အန္တရာယ်ရှိပစ္စည်းဆိုင်ရာ ကျွမ်းကျင်သူများနှင့် ထောက်ပံ့ရေးအရာရှိများ ပါဝင်သည်ဟု သိရသည်။
ကယ်ဆယ်ရေးပစ္စည်းများဖြစ်သော ဖြတ်တောက်ရေး၊ ဖောက်ထွင်းရေးနှင့် မတင်ရေးပစ္စည်းကိရိယာများ၊ အသက်ရှာဖွေရေးကိရိယာများနှင့် ဖိုင်ဘာ-အော့ပ်တစ် ကိရိယာများကိုပါ သယ်ဆောင်လာသည်ဟု သိရသည်။ အဆိုပါပစ္စည်းကိရိယာများမှာ ဘက်ထရီဖြင့် အလုပ်လုပ်နိုင်သဖြင့် ၎င်းအဖွဲ့သည် ဘေးဒဏ်သင့်ဧရိယာများသို့ လျင်မြန်စွာ သွားရောက်နိုင်ပြီး ကယ်ဆယ်ရေးလုပ်ငန်းစဉ်များ စတင်နိုင်မည်ဟု ဆိုထားသည်။
ထို့အပြင် မြေငလျင်ဒဏ်သင့်ဧရိယာများအတွက် လိုအပ်သော အရေးကြီးအရင်းအမြစ်များကို လျင်မြန်စွာ အကဲဖြတ်ရန်နှင့် ဆုံးဖြတ်ရန် SCDF အရာရှိ သုံးဦးကိုလည်း အာဆီယံ လူသားချင်းစာနာမှုအကူအညီများအတွက် ညှိနှိုင်းရေးစင်တာ (AHA Centre) ၏ ကြီးကြပ်မှုအောက်ရှိ အာဆီယံအရေးပေါ် တုံ့ပြန်မှုနှင့် အကဲဖြတ်အဖွဲ့ (ERAT) ၏ အစိတ်အပိုင်းအဖြစ် မြန်မာနိုင်ငံသို့ စေလွှတ်ခဲ့သည်ဟု သိရသည်။
မတ်လ ၂၈ ရက် နေ့လယ်က မြန်မာနိုင်ငံကို ဗဟိုပြု လှုပ်ခတ်ခဲ့သော အင်အား အလွန်ပြင်းထန်သည့် ငလျင်ကြောင့် အလယ်ပိုင်းဒေသများတွင် လူသေဆုံးမှုနှင့် ပျောက်ဆုံးမှုများ ဆက်လက်မြင့်တက်နေဆဲဖြစ်ပြီး ပြည်တွင်းလူမှုကယ်ဆယ်ရေးအဖွဲ့များက လက်ရှိ ၂၄ နာရီကျော်အချိန်အထိ ရှာဖွေကယ်ဆယ်ရေးများ အဆက်မပြတ် လုပ်ဆောင်နေဆဲဖြစ်သည်။
Photo – Singapore Civil Defence Force
