သံလွင်ခက်
နိုဝင်ဘာ ၆၊ ၂၀၂၄။
အမေရိကန်ပြည်ထောင်စု သမ္မတရွေးကောက်ပွဲရလဒ်များကို ပြည်နယ်အသီးသီးတွင် ရေတွက်နေပြီး အဆုံးအဖြတ်ပေးနိုင်မည့် ပြည်နယ် ၇ခုတွင် အနိုင်ရလဒ်မပေါ်သေးဘဲ ဒေါ်နယ်ထရမ့်နှင့် ကမ်မလာဟဲရစ်တို့ မဲအကြိတ်အနယ်ဖြစ်နေသည်ဟု သိရသည်။
အမေရိကန်တွင် ပြည်နယ်စုစုပေါင်း ၅၀ရှိသော်လည်း ပြည်နယ် ၄၃ခုမှာ ရွေးကောက်ပွဲမတိုင်မီကတည်းက ဒီမိုကရက်တစ်နှင့် ရီပတ်ပလီကန်ပါတီနှစ်ခုအတွက် မဲရလဒ် အဖြေပေါ်ပြီးသားပြည်နယ်များ ဖြစ်သည်။
ထောက်ခံသည့် ပြည်နယ်များအရ ဒီမိုကရက်တစ်ပါတီ ကိုယ်စားလှယ်လောင်း ကမ်မလာဟဲရစ်က ၂၂၆မဲကို အခိုင်အမာရရှိမည်ဖြစ်ပြီး ရီပတ်ပလီကန်ပါတီ ကိုယ်စားလှယ်လောင်း ဒေါ်နယ်ထရမ့်က ၂၁၉မဲကို ရရှိထားပြီးဖြစ်သည်။ ကိုယ်စားလှယ်လောင်းတစ်ဦးသည် ၂၇၀မဲအထက်ရရှိမှ သမ္မတရာထူး တာဝန်ထမ်းဆောင်ရမည်ဖြစ်ပြီး အိမ်ဖြူတော်သို့ အရောက်လှမ်းခွင့်ရမည်ဖြစ်သည်။
ထို့ကြောင့် အဆုံးအဖြတ်ပေးနိုင်သည့် ပြည်နယ်(Swing States) ၇ခုတွင်ရှိသည့် ၉၃မဲအတွက် ကိုယ်စားလှယ်နှစ်ဦးက မဲအပြိုင်အဆိုင်ဖြစ်နေပြီး ပြတ်သားတဲ့ ဦးဆောင်မှုမျိုး မတွေ့ရသေးပေ။ ၉၃မဲအနက် ထရမ့်က ၅၁မဲရရှိရန်လိုအပ်ပြီး ကမ်မလာက ၄၄မဲရရှိရန်သာ လိုအပ်သည်။
အဆိုပါပြည်နယ်များအနက် ပန်ဆယ်ဗေးနီးယားပြည်နယ်သည် မဲ ၁၉မဲနှင့် အများဆုံးရှိနေပြီး အမေရိကန် အရှေ့ပိုင်းစံတော်ချိန် ည၁၀နာရီခွဲအထိ စာရင်းအရ ဒေါ်နယ်ထရမ့်က ၅၁ ဒဿမ ၂ရာခိုင်နှုန်း၊ ကမ်မလာဟဲရစ်က ၄၇ ဒဿမ ၈ရာခိုင်နှုန်း ရှိနေသည်ဟု သိရသည်။
ပြိုင်ဆိုင်မှု ပြင်းထန်သည့် ပန်ဆယ်ဗေးနီးယားပြည်နယ်၊ ဖီလာဒဲလ်ဖီးယားမြို့တွင် ကြီးကြီးမားမား မဲလိမ်မှုများ ရှိနေသည်ဟု ဒေါ်နယ်ထရမ့်ဘက်က စွပ်စွဲပြောဆိုထားပြီး ဖီလာဒဲလ်ဖီးယားရဲတပ်ဖွဲ့ဘက်က ငြင်းဆန်ထားသည်။
ဂျော်ဂျီယာ၊ နော့ခ်ကယ်ရိုလိုင်းနား၊ အရီဇိုးနား၊ ဝစ္စကိုဆင်၊ နဗားဒါး ပြည်နယ်များတွင် ထရမ့်က ရာခိုင်းနှုန်းအနည်းငယ်နှင့် မဲအသာရနေပြီး မီချီဂန်ပြည်နယ်တွင် ဟဲရစ်က အသာရနေသည်။
အဆုံးဖြတ်ပြည်နယ်အများစုတွင် ဒေါ်နယ်ထရမ့်က အသာရနေသော်လည်း မဲရေတွက်မှုမှာ မပြီးဆုံးသေးသောကြောင့် သမ္မမနေရာ ရလဒ်မှာ ပေါ်ထွက်လာခြင်းမရှိသေးပေ။
တစ်နိုင်ငံလုံးအတိုင်းအတာအရ အမေရိကန် အရှေ့လယ်ပိုင်းစံတော်ချိန် ၁၁နာရီ ၂၀အထိ ဒေါ်နယ်ထရမ့်က ၂၃၀မဲနှင့် ကမ်မလာဟဲရစ်က ၁၇၉မဲ ရရှိထားပြီးဖြစ်သည်။
Photo- USA Today Network
