မလေးရှားနိုင်ငံ၊ ကွာလာလမ်ပူမြို့၊ Jalan Raja Laut လမ်းမကြီးတွင်ရှိသော ကျန်းမာရေးစင်တာတစ်ခုကို တရားမဝင်လုပ်ငန်းများအတွက် အသုံးပြုနေသည်ဟု သံသယရှိသဖြင့် အာဏာပိုင်များက ပူးပေါင်းစစ်ဆင်ရေးတစ်ရပ် ပြုလုပ်ခဲ့ရာတွင် အမျိုးသားစုစုပေါင်း ၂၀၁ ဦးကို ထိန်းသိမ်းခဲ့သည်ဟု မလေးရှားသတင်းဌာနများတွင် ဖော်ပြထားသည်။
နိုဝင်ဘာလ ၂၈ ရက်၊ ည ၈ နာရီခန့်တွင် ကွာလာလမ်ပူရဲတပ်ဖွဲ့၊ ကွာလာလမ်ပူ မြို့တော်အုပ်ချုပ်ရေးအဖွဲ့ (DBKL) နှင့် ဖက်ဒရယ်နယ်မြေများဆိုင်ရာ အစ္စလာမ်ဘာသာရေးဌာန (Jawi) တို့ပါဝင်သော အဖွဲ့က ရှောင်တခင် ဝင်ရောက်စီးနင်းခဲ့ပြီး အသက် ၁၉ နှစ်မှ ၆၀ ကြား အမျိုးသားများကို ဖမ်းဆီးခဲ့ခြင်းဖြစ်သည်။
ထိန်းသိမ်းခံရသူများအနက် ၁၇ ဦးမှာ နိုင်ငံ့ဝန်ထမ်းများဖြစ်ကြောင်း စိစစ်တွေ့ရှိရပြီး ၎င်းတို့ထဲတွင် ခွဲစိတ်ဆရာဝန်တစ်ဦး၊ ဒုတိယအစိုးရရှေ့နေတစ်ဦး၊ အုပ်ချုပ်ရေးနှင့် သံတမန်ရေးရာအရာရှိတစ်ဦး၊ ကျောင်းဆရာတစ်ဦးနှင့် ဥပဒေစိုးမိုးရေးအရာရှိအချို့ ပါဝင်ကြောင်း သိရသည်။
ပြည်သူလူထု၏ တိုင်ကြားချက်များကြောင့် အဆိုပါ နှစ်ထပ်အဆောက်အအုံကို သတင်းရယူခြင်းနှင့် စောင့်ကြည့်စစ်ဆေးခြင်းများကို နှစ်ပတ်ကြာ ပြုလုပ်ခဲ့သည်ဟု ကွာလာလမ်ပူ ဒုတိယရဲမင်းကြီး Mohd Azani Omar က ပြောကြားခဲ့သည်။
“အမျိုးသားဖောက်သည်တွေ ပါဝင်ပတ်သက်နေတဲ့ ကိုယ်ကျင့်တရားနဲ့ မညီတဲ့ လုပ်ရပ်တွေ ဒီနေရာမှာ ဖြစ်ပွားနေတယ်လို့ စုံစမ်းစစ်ဆေးချက်တွေအရ သိရပါတယ်” ဟု ၎င်းက အခင်းဖြစ်ပွားရာနေရာတွင် ပြောကြားခဲ့သည်။
၎င်းစင်တာသည် GYM၊ SPA၊ ရေကူးကန်နှင့် အမျိုးသားများအတွက် သီးသန့် အနားယူဆောင်များပါဝင်သည့် ကျန်းမာရေးနှင့် ဝန်ဆောင်မှုဌာနအဖြစ် အသွင်ယူ ဖွင့်လှစ်ထားခြင်းဖြစ်ပြီး လွန်ခဲ့သော ၈ လခန့်ကတည်းက လည်ပတ်နေသည်ဟု ယူဆရကြောင်း ဒုတိယရဲမင်းကြီး Azani က ပြောသည်။
“ဖောက်သည်တွေကို တစ်သက်တာ အသင်းဝင်ကြေး ၁၀ ရင်းဂစ် (စင်ကာပူဒေါ်လာ ၃.၁၀ ခန့်) နဲ့ တစ်ခါလာရင် ၃၅ ရင်းဂစ် ကောက်ခံပါတယ်။ လုပ်ငန်းရှင်တွေက ဆိုရှယ်မီဒီယာကနေတဆင့် ကြော်ငြာပြီး ဖောက်သည်တွေ အချင်းချင်း ချိတ်ဆက်တွေ့ဆုံနိုင်အောင် လုပ်ပေးတယ်လို့ ယုံကြည်ရပါတယ်” ဟု ၎င်းက ဆိုသည်။
ဖမ်းဆီးခံရသူများထဲတွင် ဒေသခံများအပြင် တောင်ကိုရီးယား၊ အင်ဒိုနီးရှား၊ ဂျာမနီနှင့် တရုတ်နိုင်ငံသားများလည်း ပါဝင်သည်။
ရဲတပ်ဖွဲ့အနေဖြင့် သဘာဝနှင့်ဆန့်ကျင်သော လိင်မှုကိစ္စများနှင့် သက်ဆိုင်သည့် ပြစ်မှုဆိုင်ရာ ဥပဒေပုဒ်မ ၃၈၇-ခ (Section 387B) အရ အမှုဖွင့် စစ်ဆေးနေကြောင်း ဒုတိယရဲမင်းကြီး Azani က ပြောသည်။
Jawi အဖွဲ့ကလည်း အစ္စလာမ်ဘာသာဝင် အမျိုးသား ၈၀ ဦးကို အများပြည်သူဆိုင်ရာနေရာတွင် မသင့်လျော်စွာ ပြုမူနေထိုင်မှုအတွက် ရှာရီယာ ပြစ်မှုဆိုင်ရာ (ဖက်ဒရယ်နယ်မြေများ) ဥပဒေပုဒ်မ ၂၉ အရ ထိန်းသိမ်းခဲ့သည်။
အဆိုပါစင်တာသည် ညနေ ၅ နာရီမှ ညဥ့်နက်သည်အထိ နေ့စဉ်ဖွင့်လှစ်ပြီး အလုပ်ဆင်းချိန် အပန်းဖြေလိုသူများကို ပစ်မှတ်ထားသည်ဟု သိရသည်။ ထိန်းသိမ်းခံရသူအားလုံးကို ဆက်လက်အရေးယူဆောင်ရွက်ရန် Dang Wangi ရဲဌာနချုပ်သို့ ခေါ်ဆောင်သွားခဲ့သည်။
စစ်ဆေးချက်များအရ ဤနေရာသည် လူမှုရေးချိတ်ဆက်မှုများကို ရှာဖွေနေသော အွန်လိုင်းဂရုများကြားတွင် ကျယ်ကျယ်ပြန့်ပြန့် ဆွေးနွေးပြောဆိုနေကြပြီး၊ အချို့သော လာရောက်သူများက “အထူးဝန်ဆောင်မှုများ” ပေးသည်ဟု ပြောဆိုကြကြောင်း တွေ့ရှိရသည်။
မလေးရှားနိုင်ငံရှိ LGBTIQ နှင့် ကျား/မ ကွဲပြားမှုဆိုင်ရာ လူ့အခွင့်အရေးအဖွဲ့ဖြစ်သော Justice for Sisters က ဤစီးနင်းမှုကို ရှုတ်ချခဲ့သည်။
အဆိုပါအဖွဲ့၏ ပြောခွင့်ရပုဂ္ဂိုလ်က နိုဝင်ဘာလ ၂၉ ရက်တွင် ပြောကြားရာ၌ ဤအသိုင်းအဝိုင်းသည် မတရားခွဲခြားဆက်ဆံမှုများကို ခံနေရပြီးဖြစ်ကြောင်း၊ ယခုကဲ့သို့ ဝင်ရောက်စီးနင်းခြင်းနှင့် မီဒီယာများ၏ အရှိန်မြှင့်ဖော်ပြမှုများကြောင့် ပါဝင်ပတ်သက်သူများသည် အကူအညီရယူရန် ဝန်လေးသွားစေနိုင်ပြီး HIV ပပျောက်ရေးနှင့် လူ့အခွင့်အရေး ကာကွယ်စောင့်ရှောက်ရေး ကြိုးပမ်းမှုများကို ထိခိုက်စေနိုင်ကြောင်း ပြောဆိုခဲ့သည်။
“မီဒီယာတွေကိုပါ ဝင်ရောက်စီးနင်းမှုမှာ ပါဝင်ဖို့ ဖိတ်ခေါ်ခဲ့တာကြောင့် ဖမ်းဆီးခံရသူတွေရဲ့ ပုဂ္ဂိုလ်ရေးဆိုင်ရာ လွတ်လပ်ခွင့် (Privacy) ကို ပိုမို ချိုးဖောက်ရာ ရောက်ပါတယ်” ဟု ပြောခွင့်ရပုဂ္ဂိုလ်က ပြောသည်။
“မလေးရှားမှာ LGBTQ တွေအပေါ် ခွဲခြားဆက်ဆံမှုတွေ မြင့်တက်နေတဲ့အတွက် ပြည်သူတွေရဲ့ တိုင်ကြားစာတွေထဲမှာ ပါဝင်နေတဲ့ မလိုမုန်းထားမှု (prejudicial elements) တွေကို ရဲတပ်ဖွဲ့အနေနဲ့ ခွဲခြားသိမြင်ဖို့ အရေးကြီးပါတယ်” ဟု ၎င်းက ဆိုသည်။
PHOTO: THE STAR/ASIA NEWS NETWORK
ကိုးကား – The Straits Times
