ရွေးကောက်ပွဲ အကြောင်းပြ အာဏာသိမ်းခဲ့သည့် စစ်ကောင်စီသာလျှင် နိုင်ငံတော်ပုန်ကုန်မှု ကျူးလွန်သူဟု NLD ဆို

ရွေးကောက်ပွဲ အကြောင်းပြ အာဏာသိမ်းခဲ့သည့် စစ်ကောင်စီသာလျှင် နိုင်ငံတော်ပုန်ကုန်မှု ကျူးလွန်သူဟု NLD ဆို

******************

သံလွင်ခက်

မတ် ၂၈ ၊ ၂၀၂၄။

၂၀၂၀ ရွေးကောက်ပွဲတွင် မဲမသမာမှုပြုလုပ်သည်ဟုစွပ်စွဲကာ အဓမ္မအာဏာသိမ်းလိုက်သည့် စစ်ကောင်စီ၏ လုပ်ရပ်သည် တည်ဆဲဥပဒေများကို ချိုးဖောက်ပြီး အလွန်ကြီးမားသော ရာဇဝတ်မှုဖြစ်သည့် နိုင်ငံတော်ပုန်ကုန်မှုကို ကျူးလွန်လိုက်ခြင်းဖြစ်သည်ဟု အမျိုးသားဒီမိုကရေစီအဖွဲ့ချုပ် – NLD၊ ဗဟိုအလုပ်ကော်မတီဝင် ဦးကျော်ထွေးက သံလွင်ခက်သတင်းဌာနကို ပြောသည်။

ယမန်နေ့ ၇၉ ကြိမ်မြောက် တပ်မတော်နေ့အခမ်းအနားတွင် စစ်ခေါင်းဆောင်မင်းအောင်လှိုင် က ၂၀၂၀ ပြည့်နှစ်၌ ပြုလုပ်ခဲ့သည့် ရွေးကောက်ပွဲမဲစာရင်းများကို စိစစ်ကြည့်သောအခါ ကမ္ဘာတွင် လွန်စွာကြီးမားသည့် မဲမသမာမှုပြုလုပ်ပြီး ပါတီစုံဒီမိုကရေစီအထွေထွေရွေးကောက်ပွဲကို စည်းကမ်းမဲ့စွာဆောက်ရွက်ခဲ့ခြင်းစိစစ်တွေ့ရှိရသည်ဟု ဒေါသအပြည့်နှင့်ပြောကြားချက်အပေါ် NLD တာဝန်ရှိသူက ယခုကဲ့သို့ တုံ့ပြန်ပြောဆိုခဲ့ခြင်းဖြစ်သည်။

NLD ဗဟိုအလုပ်ကော်မတီဝင် ဦးကျော်ထွေးက ” ၂၀၂၀ ရွေးကောက်ပွဲက မဲစာရင်းမှားယွင်းမှုရှိတယ်ဆိုရင်တောင်မှပဲ ရွေးကောက်ပွဲကော်မရှင်ဥပဒေနဲ့အညီ တိုင်ကြားဖြေရှင်းရတဲ့လုပ်ငန်းစဉ်တွေရှိရဲ့သားနဲ့ မင်းအောင်လှိုင်ဦးဆောင်တဲ့ စစ်တပ်က အဓမ္မအာဏာသိမ်းလိုက်တာက အဲဒီကာလ တည်ဆဲဥပဒေတွေကိုချိုးဖောက်ပြီးတော့ အလွန်ကြီးမားတဲ့ရာဇဝတ်မှု၊ နိုင်ငံတော်ပုန်ကုန်မှုကို ကျူးလွန်လိုက်တာဖြစ်ပါတယ် “ဟု ဆိုသည်။

ထိုကဲ့သို့သောအခြေအနေများကို ကာကွယ်တားဆီးနိုင်ရန်အတွက် စစ်ကောင်စီအနေဖြင့် ၂၀၂၁ ခုနှစ် ဖေဖော်ဝါရီ ၁ ရက်တွင် နိုင်ငံတော်အာဏာကို ခေတ္တရယူထိန်းသိမ်းခဲ့ခြင်းဖြစ်သည်ဟု စစ်ခေါင်းဆောင်က ၇၉ ကြိမ်မြောက် တပ်မတော်နေ့အခမ်းအနားတွင် ထည့်သွင်းပြောကြားခဲ့သည်။

၂၀၂၀ ရွေးကောက်ပွဲတွင် မသမာမှုရှိသည်ဟူသော စွပ်စွဲပြောဆိုချက်ကို အာဏာသိမ်းစစ်ခေါင်းဆောင်က အာဏာသိမ်းချိန်ကစ၍ ယခုအချိန်ထိ အတွင်တွင်ပြောကြားနေခဲ့ပြီး ပြီးခဲ့သည့် နှစ် ၅၀ မြောက် မွန်ပြည်နယ်နေ့ အထိမ်းအမှတ်သဝဏ်လွှာ၌လည်း အဆိုပါစွပ်စွဲချက်ကို ထည့်သွင်းပြောကြားခဲ့သည်။

၂၀၂၀ ရွေးကောက်ပွဲတွင် မသမာမှုရှိသည်ဟု စစ်ကောင်စီကစွပ်စွဲကာ နိုင်ငံတော်အာဏာ အဓမ္မသိမ်းယူခဲ့သော်လည်း အမေရိကန်၊ ဗြိတိန်၊ EU – ဥ‌ရောပသမဂ္ဂအပါအဝင် နိုင်ငံတကာက နိုင်ငံခေါင်းဆောင်များနှင့် ရွေးကောက်ပွဲ လေ့လာစောင့်ကြည့်ရေးအဖွဲ့အစည်းများကတော့ အဆိုပါ ၂၀၂၀ ရွေးကောက်ပွဲကထွက်ပေါ်လာသည့် မဲရလဒ်သည် မြန်မာပြည်သူများ၏ သဘောဆန္ဒဖြစ်သည်ဟု လက်ခံထားဆဲဖြစ်ပြီး မြန်မာနိုင်ငံ၏ ရွေးကောက်ပွဲသည် လွတ်လပ်ပြီးတရားမျှတမှုရှိသည်ဟုလည်း ထုတ်ဖော်ပြောကြားမှုများ ရှိခဲ့သည်။

NLD ဗဟိုအလုပ်ကော်မတီဝင် ဦးကျော်ထွေးက ” နိုင်ငံတကာအသိုင်းအဝိုင်းက မြန်မာ့အရေးနဲ့ပတ်သက်ပြီးတော့ ပြောဆိုကြမယ်ဆိုရင် ၂၀၂၀ ရွေးကောက်ပွဲရလဒ်ပေါ်မှာ အခြေခံပြီးတော့ ချဉ်းကပ်ပြောနေတာကို ကြည့်ခြင်းအား ဖြင့် ၂၀၂၀ ရွေးကောက်ပွဲရလဒ်ဟာ လွတ်လပ်ပြီးတော့ တရားမျှတမှုရှိတယ်ဆိုတာကို အလွယ်တကူသိနိုင်ပါတယ် ” ဟု ဆိုသည်။

အရေးပေါ်ကာလဆိုင်ရာပြဋ္ဌာန်းချက်များအတိုင်းဆောင်ရွက်ပြီးစီးပါက အထွေထွေရွေးကောက်ပွဲပြုလုပ်သွားမည် ဟု စစ်ကောင်စီခေါင်းဆောင်က ပြောကြားထားသည်။

စစ်ကောင်စီက ရွေးကောက်ပွဲကျင်းပမည်ဟု ပြောဆိုနေသော်လည်း အများစုလက်မခံနိုင်သည့် အဖြေရလဒ်မျိုးထွက်လျှင် ပြည်သူများက ပြန်လည်တော်လှန်နေဦးမည်သာဖြစ်သည်ဟု နိုင်ငံရေးလေ့လာသုံးသပ်သူ ဒေါက်တာ စိုင်းကြည်ဇင်စိုးက ပြောသည်။

၎င်းက ” အများစုလက်မခံနိုင်တဲ့ အဖြေမျိုးဖြစ်နေတယ်ဆိုရင်တော့ ဘယ်လိုပုံစံနည်းနဲ့ပဲ ရွေးကောက်ပွဲလုပ်လုပ်၊ ဘယ်လိုရလဒ်မျိုးပဲ ထွက်လာထွက်လာ လူတွေက လက်ခံနိုင်မှာ မဟုတ်ဘူး။ ပူးပေါင်းကြမှာလည်းမဟုတ်ဘူး။ မတတ်သာလို့ ခေါင်းငုံ့ခံရင်ခံမယ်။ အချိန်မရွေးပေါက်ကွဲနိုင်တဲ့ မိုင်းဗုံးကြီးတစ်လုံး ရင်ဝယ်ပိုက်ထားသလို အကြောင်းတရားတစ်ခုတိုက်ဆိုင်လာရင် နာကျည်းမှုတွေက ပြန်ပွင့်ထွက်လာဦးမှာပဲ ” ဟု ဆိုသည်။

ရုရှားဖက်ဒရေးရှင်းနိုင်ငံI TAR-TASS Media က ရုရှား – မြန်မာ နှစ်နိုင်ငံ ကဏ္ဍအလိုက် ပူးပေါင်းဆောင်ရွက်မှု အခြေအနေများနှင့်ပတ်သက်၍ တွေ့ဆုံမေးမြန်းရာတွင် စစ်ခေါင်းဆောင်က နိုင်ငံတော်တည်ငြိမ်အေးချမ်းသွားပြီ ဆိုလျှင် ရွေးကောက်ပွဲကိုဥပဒေအတိုင်းမကျင်းပနိုင်ပါကလည်း တတ်နိုင်သမျှ သက်ဆိုင်ရာကဏ္ဍများတွင် ကျင်းပ သွားမည်ဟု ထည့်သွင်းပြောကြားခဲ့သည်။

ပုံစာ – ၇၉ ကြိမ်မြောက် တပ်မတော်နေ့အခမ်းအနားကို တက်ရောက်လာသော စစ်ခေါင်းဆောင်။

************

Telegram– > https://t.me/newstlk/4036

YouTube – > https://youtu.be/6X9AvN2FnIw?si=BGNM7eyxs7ZtJG7d

Website – >   https://thanlwinkhet.net/?p=8758