လေယာဥ်ဗုံးစထိမှန် နမ့်ခမ်းဒေသခံ လက်ဖြတ်တောက် ကုသဖို့ အကူအညီလိုအပ်နေ
**********************
သံလွင်ခက်
ဇန်နဝါရီ ၂၃၊ ၂၀၂၄။
ပြီးခဲ့သည့် ၂ ရက်က စစ်ကောင်စီ၏ လေကြောင်းဖြင့်
လာရောက်တိုက်ခိုက်မှုဖြစ်စဥ်အတွင်း ဒဏ်ရာရရှိခဲ့
သော နမ့်ခမ်းမြို့ ဒေသခံ အမျိုးသမီး ၁ ဦးသည်
လက်ဖြတ်တောက်ကုသရန်အတွက် အကူအညီလိုအပ်နေသည်ဟု သိရသည်။
စစ်ကောင်စီတပ်က ဇန်နဝါရီ ၂၁ ရက်၊ နံနက် ၁၀ နာရီခွဲခန့်တွင် လေယာဉ်ဖြင့် ၄ ကြိမ်တိုင်လာရောက်ဗုံးကြဲတိုက်ခိုက်သဖြင့် ရှမ်းပြည်နယ်မြောက်ပိုင်း နမ့်ခမ်းမြို့နယ်၊ နောင်မကျေးရွာရှိ ဒေသခံဇနီးမောင်နှံ ၂ ဦး ထိခိုက်ဒဏ်ရာရရှိခဲ့သည်။
စစ်ကောင်စီတပ်သည် ကချင်ပြည်နယ်၊ ဗန်းမော်ခရိုင်၊ မံစီမြို့နယ်၊ မန့်ဝိန်းကြီးကျေးရွာရှိ ၎င်းတို့၏တပ်စခန်းကို လက်လွှတ်လိုက်ရပြီးနောက် မန့်ဝိန်းကြီးကျေးရွာနှင့် မန့်ဝိန်းကြီးကျေးရွာ၏ မြစ်တစ်ဖက်ကမ်းရှိ နမ့်ခမ်းမြို့နယ် နောင်မကျေးရွာကို လေယာဉ်ဖြင့် ဗုံးကြဲတိုက်ခိုက်ခဲ့ခြင်းဖြစ်သည်ဟု ကျေးရွာဒေသခံ ၁ဦးက သံလွင်ခက်ကို ပြောသည်။
၎င်းက “အဲ့နေ့ နမ့်ခမ်းမှာ လေယာဉ်ဗုံး ၁ လုံးလာချသွားလို့ နမ့်ခမ်းဒေသခံ ပြည်သူထိခိုက်သွားတယ်။ ထိခိုက်ဒဏ်ရာရှိတဲ့ လင်မယား ၂ ယောက်မှာ အမျိုးသမီးဖြစ်သူ ညာဘက်လက်တစ်ဖက် ဖြတ်ပစ်ရမှာမို့ ငွေကြေး အခက်အခဲဖြစ်နေတာ” ဟု ပြောသည်။
လေယာဉ်ဖြင့် ဗုံးကြဲတိုက်ခိုက်စဉ် ဗုံးစထိမှန်ခဲ့သည့် ပြည်သူ ၂ ဦးမှာ စိုင်းစံထွန်းလှ နှင့်၎င်း၏ဇနီးဖြစ်သူ နန်းခမ်းအောင်တို့ဖြစ်ပြီး လက်ရှိတွင် ဆေးရုံ၌ ဆေးကုသမှု ခံယူလျက်ရှိသည်ဟု သိရသည်။
အဆိုပါ ဇနီးမောင်နှံသည် ထိခိုက်ဒဏ်ရာရရှိခဲ့သည့်အပြင် နေအိမ်လည်း ပျက်စီးဆုံးရှုံးခဲ့ရပြီး ဆေးဝါးကုသရန်အတွက်ပင် ငွေကြေးအခက်အခဲဖြစ်နေသည်ဟု အတူနေ ဒေသခံ ၁ဦးက သံလွင်ခက်ကို ပြောသည်။
ရှမ်းပြည်နယ်မြောက်ပိုင်းတွင် ဖြစ်ပွားနေသည့် စစ်ရေးအခြေအနေများနှင့်ပတ်သက်၍ တရုတ်နိုင်ငံ၏ ကြားဝင်စေ့စပ်မှုဖြင့် ဇန်နဝါရီ ၁၁ ကစ၍ နှစ်ဖက်အပစ်ရပ်သဘောတူညီထားသော်လည်း စစ်ကောင်စီတပ်က မိုးမိတ်မြို့နယ်၊ ကျောက်မဲမြို့နယ်၊ မိုးကုတ်မြို့နယ်၊နမ့်ခမ်း
မြို့နယ်နှင့် လားရှိုးမြို့နယ်တို့တွင် လက်နက်ကြီးပစ်ခတ်မှုနှင့် လေကြောင်းတိုက်ခိုက်မှုများကို အကြိမ်ကြိမ် ပြု လုပ်လျက်ရှိနေသည်။
အဆိုပါ လုပ်ရပ်များသည် အပစ်ခတ်ရပ်စဲရေးလက်မှတ်ကို အကြိမ်ကြိမ်ချိုးဖောက်ခြင်းဖြစ်သည်ဟု ညီနောင်မဟာမိတ် ၃ ဖွဲ့က သတိပေးချက်ထုတ်ပြန်ထားသည်။
*********
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/3124
YouTube- > https://youtu.be/SpxIBpTYop8
Website _> https://thanlwinkhet.net/?p=7224
