စစ်ကောင်စီက သတင်းသမားတွေကို အငြိုးအတေးဖြင့်ခြိမ်းခြောက်နေဟု သတင်းသမားများရှုမြင်
******************
မိခိုင်
ဒီဇင်ဘာ ၇၊ ၂၀၂၃။
စစ်ကောင်စီက ရခိုင်ပြည်နယ်ရှိ သတင်းသမားများအား အငြိုးအတေးဖြင့် ခြိမ်းခြောက်နေဟု သတင်းသမားများက ရှုမြင်နေကြသည်။
ရခိုင်ပြည်နယ်အတွင်း စစ်ကောင်စီ၏ စဥ်ဆက်မပြတ် စစ်ရာဇဝတ်ကျူးလွန်မှုများကို ရခိုင်ပြည်နယ်ရှိ သတင်းထောက်များက ရေးသားဖော်ပြနေသည့်အတွက် ယခုကဲ့သို့ ခြိမ်းခြောက်နေခြင်းဖြစ်ပြီး စစ်ကောင်စီအဖွဲ့ဝင် ၁ ဦး ထိန်းချုပ်ထားသည့် ရခိုင်နေ့စဥ် facebook page က သတင်းထောက်များအပေါ် ခြိမ်းခြောက်မှုများ ရှိနေခြင်းဖြစ်သည်။
ယခုကဲ့သို့ သတင်းသမားများအပေါ် အငြိုးအတေးထားနေခြင်းနှင့်ပတ်သက်ပြီး သတင်းထောက် ၁ ဦးက ” အရင်ကတည်းကလည်း ရခိုင်သတင်းဌာနတွေ၊ သတင်းသမားတွေကို သိပ်ပြီး အမြင်ကြည်တာမဟုတ်ဘူးလေ။ ဆိုတော့ သူတို့ရဲ့ ရာဇ၀တ်မှုအကြောင်း ဖော်ထုတ်ရေးသားနေတဲ့ သတင်းဌာနတွေကို ပိုပြီးတော့ အငြိုးအတေးထားလာတာပေါ့ ” ဟု ဆိုသည်။
ပြီးခဲ့သည့် ဒီဇင်ဘာလ ၅ ရက်တွင် စစ်ကောင်စီ၏ ရခိုင်နေ့စဥ် facebook page က Western News ၊ Narinjara , Development Media Group ၊ Border News Agency ၊ Arakan Bay News – ABN ၊ Cuckoo Chay Vlog ၊ Arakan Princess Media ၊ Voice Of Westland ၊ One Nation News စသည့် ရခိုင်ရှိမီဒီယာအားလုံးမှာ ရခိုင်ပြည်နယ်အတွင်း လူမျိုးရေး၊ စစ်ရေးပဋိပက္ခများဖြစ်လာစေရန် ရည်ရွယ်ချက်ရှိရှိဖြင့် သတင်းမှားများ ဖြန့်ချိလှုံ့ဆော်ရေးသားနေသည့် တရားမဝင်မီဒီယာများဖြစ်သည်ဟု စွပ်စွဲပြောဆိုခဲ့သည်။
ယင်းအပေါ် သတင်းထောက် ၁ ဦးက ” တရားမ၀င်တဲ့ အကြမ်းဖက်စစ်ကောင်စီကနေပြီးတော့ သတင်းဌာနတွေ ကို ဒီလို တရားမ၀င်ဘူးလို့ ပြောတာကတော့ ရယ်စရာဖြစ်နေတာပေါ့ဗျာ” ဟု မှတ်ချက်ပြုသည်။၊
ရခိုင်ပြည်နယ်ရှိ တိုက်ပွဲများတွင် စစ်ကောင်စီက အကြမ်းဖက်မှု၊ လူ့အခွင့် အရေးချိုးဖောက်မှုနှင့် စစ်ရာဇ၀တ်မှုများ တောက်လျှောက်ကျုးလွန်လာခြင်းဖြစ်ပြီး ၎င်းတို့၏ ရာဇ၀တ်မှုများအကြောင်း ဖော်ထုတ်ရေးသားနေသည့် သတင်းဌာနများကို ပို၍ အငြိုးအတေးထားလာခြင်းဖြစ်ကြောင်း ၎င်းက ဆက်ပြောသည်။
တစ်ဖက်တွင်လည်း စစ်ကောင်စီတပ်များသည် တစ်နိုင်ငံလုံးအတိုင်းအတာဖြင့် အဆုံးအရှုံးကြီးမားနေသည့်အတွက် သတင်းထောက်များနှင့် ပြည်သူများအား ယခုကဲ့သို့ ခြိမ်းခြောက်နေခြင်းဖြစ်ကြောင်း ရခိုင်ပြည်နယ်က အမျိုးသမီးသတင်းထောက် ၁ ဦးက ဆိုသည်။
” မြန်မာတစ်နိုင်ငံလုံးမှာ တိုက်ပွဲတွေဖြစ်နေတယ်။ ဒီလိုအချိန်မှာ စစ်ကောင်စီအနေနဲ့ တပ်စခန်းတွေဆုံးရှုံးနေတယ်။ တစ်ဖက်မှာလည်း တိုက်ပွဲတွေမှာ လူအင်အားအရကော အများကြီးဆုံးရှုံးနေတဲ့အချိန်မှာ ရရင်ရသလို စစ်ကောင်စီက လိုက်လုပ်နေတယ်။
မီဒီယာတွေကို တရားစွဲတာတင်မကဘဲ သိသင့်သိထိုက်တဲ့သတင်းမှန်တွေ လိုက် share နေတဲ့သူတွေကိုပါ ခြိမ်းခြောက်နေတာကတော့ ကျွန်မတို့သက်တမ်းတလျှောက်မှာ တစ်ခါမှမတွေ့ဖူးဘူး။ သူတို့အတွက် ကျွန်မတို့မှာ ပြောစရာမရှိတော့ဘူး။ စစ်တပ်ရဲ့လုပ်ရပ်ဖြစ်တဲ့ ကြွက်မနိုင်ရင် ကျီကို မီးတိုက်နေတာလို့ပဲ ပြောချင်ပါတယ်” ဟု ဆိုသည်။
ရခိုင်မီဒီယာများကဖော်ပြသည့် သတင်းများပြန်လည်မျှဝေသည့် ပြည်သူများကိုလည်း စစ်ကောင်စီက ခြိမ်းခြောက်နေသည်ကိုတွေ့ရသည်။
စစ်ကောင်စီက ” ရခိုင်က မီဒီယာများတွင် မှတ်ချက်ရေးသားခြင်း၊ မျှဝေခြင်း၊ Copy ယူ၍ ထပ်ဆင့်မျှဝေခြင်း ပြုလုပ်နေသူများအား အရေးယူရန် စာရင်းပြုစုနေကြောင်း သိရှိရသည် ” ဟု ဆိုထားသည်။
ယခုကဲ့သို့ စစ်ကောင်စီလုပ်ဆောင်နေသည်က ၎င်းတို့၏ဇာတ်သိမ်းခန်းရောက်ပြီဖြစ်ကြောင်း ဖော်ပြနေခြင်းဖြစ်သည်ဟု ရခိုင်ပြည်နယ်က နောက်ထပ်အမျိုးသမီး သတင်းထောက် ၁ ဦးကလည်း ဝေဖန်သည်။
” သတင်းမှန်တွေကို အမှောင်ချချင်လို့ သတင်းထောက်တွေကို လိုက်ဖမ်းရုံတင်မကဘူး။ သတင်းမှန်တွေကို sharing လုပ်နေတဲ့ ပြည်သူတွေကိုပါ ခြိမ်း ခြောက်မှုတွေဖြစ်လာတယ်။ ဒါကို ကြည့်ခြင်းအားဖြင့် စစ်ကောင်စီဟာ နောက်ဆုံးလက်နက်ကို ထုတ်သုံးနေတာလို့မြင်တယ်။ သူ့အတွက် ဇာတ်သိမ်းပိုင်းရောက်နေပြီဆိုတာကိုလည်း မပြောပေမယ့် ဖော်ပြရာရောက်နေတာလို့ မြင်တယ် ” ဟု ပြောသည်။
ပြည်ပ၌နေထိုင်သည့် သတင်းသမားများအပေါ်လည်း ဗီဇာသက်တမ်းတိုးသည့်အချိန်တွင် ဖမ်းဆီးအရေးယူရန် စီစဥ်နေကြောင်း ခြိမ်းခြောက်ထားသည်ကို တွေ့ရသည်။
စစ်ကောင်စီအဖွဲ့ဝင် ဦးလှသိန်း ကမူ ရခိုင်နေ့စဥ် facebook page မှာ မိမိတို့ page မဟုတ်ကြောင်း နီးစပ်သည့် သတင်းထောက်များအား ပြောဆိုထားသည်ဟု စုံစမ်းသိရှိရသည်။
ယခင်ကမူ စစ်ကောင်စီ၏ ရခိုင်နေ့စဥ် facebook page ပျက်သွားသည်ကိုတွေ့ရသော်လည်း လက်ရှိ ရခိုင်နေ့စဥ် facebook page တွင် ညွှန်ပြထားသည့် Telegram link နှင့် ယခင်ကရှိခဲ့သည့် ရခိုင်နေ့စဥ်ကို ညွှန်ပြထားသည့် Telegram link မှာ တူညီနေသည်ကိုတွေ့ရသည်။
*******
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/2654
YouTube- > https://youtu.be/SpxIBpTYop8
Website – https://thanlwinkhet.net/?p=6525
