စစ်ကောင်စီကပစ်ခတ်သည့်လက်နက်ကြီးကြောင့် ရခိုင်ဒေသခံ ၁ ဦး ဒဏ်ရာရ
*************
မိခိုင်
နိုဝင်ဘာ ၁၃၊ ၂၀၂၃။
ရခိုင်ပြည်နယ်၊ မင်းပြားမြို့နယ်တွင် စစ်ကောင်စီကပစ်ခတ်လိုက်သည့် လက်နက်ကြီးကျရောက်ပေါက်ကွဲမှု ကြောင့် ယနေ့ နံနက် ၈ နာရီဝန်းကျင်တွင် ဒေသခံ ၁ ဦး ဒဏ်ရာရရှိခဲ့ကြောင်း သိရသည်။
ဒဏ်ရာရရှိသူမှာ မင်းပြားမြို့နယ် ဖေသာပြင်ကျေးရွာက အသက် ၅၂ နှစ်အရွယ် လယ်သမား ၁ ဦးဖြစ်သည့် ဦးအောင်သိန်းဖြူ ဖြစ်သည်ဟု သိရသည်။
ဦးအောင်သိန်းဖြူ မှာ မိမိလယ်၌စပါးရိတ်သိမ်းနေချိန်တွင် လက်နက်ကြီး၊ လက်နက်ငယ်သံများကြားသည့်အတွက် လယ်ထဲရှိတဲကိုတက်ကြည့်ချိန်တွင် လက်နက်ကြီးထိမှန်သွားခြင်းဖြစ်ကြောင်း ကျေးရွာသား ၁ ဦးက ဆိုသည်။
“သူက စပါးရိတ်နေတာကနေ လက်နက်ကြီးသံ၊ လက်နက်ငယ်သံတွေကြားလို့ တဲပေါ်က ကြည့်တာ။ အဲဒီအချိန် မှာ မင်းပြား ကျိန်းတောင်ထက်ကပစ်လိုက်တဲ့ လက်နက်ကြီးက သူနားလာကျတယ်။ အစ ထိသွားတာ။ နောက်ကျောဘက်မှာ ဒဏ်ရာရသွားတယ်” ဟု ၎င်းက ဆိုသည်။
လက်ရှိတွင် ဒဏ်ရာရရှိသွားသည့် ဦးအောင်သိန်းဖြူ အား မင်းပြားဆေးရုံသို့ပို့ဆောင်ထားပြီး ဆေးကုသမှုခံယူ နေကြောင်း မိသားစုဝင် ၁ ဦးက ပြောသည်။
“လက်ရှိကတော့ မင်းပြားဆေးရုံမှာ ကုနေပါတယ်။ ဒဏ်ရာပြင်းပေမယ့် အသက်အန္တရာယ် မစိုးရိမ်ရပါဘူး” ဟု ၎င်းက ဆိုသည်။
နံနက် ၇ နာရီဝန်းကျင်တွင် မင်းပြားမြို့ရှိ တိုင်းဗဟို ၉ စစ်ကောင်စီလေ့ကျင့်ရေးကျောင်းမှ မင်းပြားမြို့သို့ထွက်ခွာ လာသည့် စစ်ကောင်စီကား ၂ စီးကို ဖေသာပြင်နှင့် ဖားပြိုးကျေးရွာအနီးတွင် ရက္ခိုင့်တပ်တော် – AA က မိုင်းဆွဲ တိုက်ခိုက်ခဲ့ပြီးနောက် မင်းပြားကျိန်းတောင်ထက်တွင် တပ်စခန်းချထားသည့် စစ်ကောင်စီတပ်က လက်နက်ကြီး များဖြင့် ပစ်ခတ်ခဲ့ခြင်းဖြစ်သည်။
ယင်းကဲ့သို့ပစ်ခတ်ခဲ့သဖြင့် ဖားပြိုးကျေးရွာအနီးဝန်းကျင်နှင့် ဖေသာပြင်ကျေးရွာသို့ လက်နက်ကြီးများကျရောက် ခဲ့သလို ဖေသာပြင်ဘုန်းတော်ကြီးကျောင်းအနီးကိုလည်း လက်နက်ကြီးများကျခဲ့ရောက်ခဲ့သည့်အတွက် ဦးအောင် သိန်းဖြူ မှာလည်း ဒဏ်ရာရရှိခဲ့ခြင်းဖြစ်ကြောင်းသိရသည်။
လက်ရှိအချိန်မှာတော့ လက်နက်ကြီး၊ လက်နက်ငယ်သံများတိတ်ဆိတ်နေပြီး ဒေသခံတချို့ ဘေးလွတ်ရာသို့ တိမ်းရှောင်နေကြကြောင်း ကျေးရွာသားများထံက သိရသည်။
ပုံစာ – မင်းပြားမြို့အဝင်။
