လွိုင်ကော်တွင် ယနေ့နံနက်အစောပိုင်းကတည်းကတိုက်ပွဲ ပြင်းထန်နေ

လွိုင်ကော်တွင် ယနေ့နံနက်အစောပိုင်းကတည်းကတိုက်ပွဲ ပြင်းထန်နေ

********************************

သံလွင်ခက်

နိုဝင်ဘာ ၁၄ ၊ ၂၀၂၃ ။

ကရင်နီတော်လှန်ရေးပူးပေါင်းတပ်များက မြို့သိမ်းတိုက်ပွဲဆင်နွှဲနေသည့် လွိုင်ကော်မြို့တွင် ယနေ့နံနက်အစောပိုင်းကတည်းက လက်နက်ကြီး၊ လက်နက်ငယ်သံများ ကြားနေကြရသည်ဟု ဒေသခံများထံမှသိရသည် ။

လွိုင်ကော်တွင် နောင်ယား ၊ထေးငါးလျား၊ နာနတ်တော၊ ဒေဥခူ စသည့်ရပ်ကွက်များဘက်တွင် တိုက်ပွဲများ ရက်ဆက်ဖြစ်ပွားနေသည် ။ ယမန်နေ့ ညပိုင်း၌လည်း လက်နက်ကြီးများဖြင့် တောက်လျောက်ပစ်ခတ်နေခဲ့သည်အပြင်  ယနေ့နံနက်ပိုင်းတွင်လည်း လက်နက်ကြီး၊ လက်နက်ငယ်အသံစုံကို ကြားနေရ သည်ဟု ဒေသခံအမျိုးသမီးတစ်ဦးကပြောသည်။

တိုက်ပွဲဖြစ်ပွားရာ အနီးဆုံးရပ်ကွက်များတွင် ပြည်သူတချို့သည် ပြီးခဲ့သည့် ၃ရက် နိုဝင်ဘာ ၁၁ ရက်၊ညနေပိုင်းကတည်းက ရှောင်တိမ်းကြသော်လည်း ယနေ့အထိ ပိတ်မိနေသေးသည့် ဒေသခံများလည်းရှိနေသေးသည် ။

“ကျွန်မအဒေါ်လည်းပိတ်မိနေတယ်။ စစ်ရှောင်တွေနဲ့ ။ မနေ့ညထိတော့ထွက်မရသေးဘူး ။ ကျည်တွေပါစင်တယ်အိမ်က။ ဘေးအိမ်လည်းလက်နက်ကြီးကျထားတယ် ။လောလောဆယ်ကယ်ထုတ်ဖို့လုပ်ဆောင်ကြမယ်ထင်တယ် “ဟု နောင်ကယားရပ်ကွက်တွင် ဆွေမျိုးများနှင့်စစ်ရှောင်များ ပိတ်မိနေသည့်အခြေအနေအား လွိုင်ကော်မြို့ခံအမျိုးသမီးတစ်ဦးကပြောသည်။

ပိတ်မိနေသည့် ဒေသခံများနှင့်စစ်ဘေးရှောင်များကို ကယ်ထုတ်ရန်၊ ကားများနှင့်ဆီများအဓိကလိုအပ်နေသည်ဟုလည်း နာနတ်တောရပ်ကွက်မှဒေသခံအမျိုးသမီးတစ်ဦးကပြောသည်။

” ကျွန်မတို့ဆို ဆီတွေ အကုန်ပြတ်ပြီ။ ရှာဝယ်လို့လည်းမရဘူး။ ဆိုင်တွေလည်း ပိတ်ထားကြတယ်။ ဖုန်းဘေလ်တွေပါ ပြတ်ကုန်တာ   “ဟု နာနက်ရပ်ကွက်မှ ဒေသခံအမျိုးသမီးတစ်ဦးကပြောသည် ။

ပိတ်မိနေသည့်စစ်ရှောင်များနှင့်ဒေသခံများကို လူမှုရေးအဖွဲ့များက ယနေ့နံနက်ပိုင်းတွင် ကယ်ထုတ်ပေးနေမှုများ လုပ်ဆောင်နေပြီး စက်သုံးဆီအကူအညီများလည်း အဓိကလိုအပ်နေသည်ဟု ကူညီကယ်ထုတ်ပေးနေသူတစ်ဦးကပြောသည်။

လက်ရှိတိုက်ပွဲဖြစ်ပွားရာနေရာများနှင့်နီးသည့်လွိုင်ကော်မြို့ ရပ်ကွက်များတွင် ကရင်နီအခြားမြို့နယ်များက လာရောက်ရှောင်တိမ်းနေသူများပါရှိနေသောကြောင့် လက်ရှိတိုက်ပွဲများအတွင်း၌ စစ်ရှောင်များနှင့်ဒေသခံထောင်ချီတို့သည် အကူအညီများလိုအပ်နေသည်ဟု သိရသည် ။

တိုက်ပွဲဖြစ်ပွားရာနေရာများအပြင် အရပ်သားပစ်မှတ်များကိုပါ စစ်ကောင်စီက လေကြောင်းတိုက်ခိုက်မှုနှင့် လက်နက်ကြီးပစ်ခတ်မှုများကြောင့် လွိုင်ကော်၌ ပြည်သူ ၅ ဦးထက်မနည်းသေဆုံးထားသည်ဟု သိရသည်။

လွိုင်ကော်မြို့အပါအဝင် ကရင်နီပြည်ရှိစစ်ကောင်စီတပ်စခန်းများကို ကရင်နီတော်လှန်ရေးတပ်များစုပေါင်း၍ ထိုးစစ်ဆင်တိုက်ခိုက်နေသည့် “၁၁.၁၁ စစ်ဆင်ရေး”ကို ယခုလ နိုဝင်ဘာ၁၁ ရက်တွင် စတင်ခဲ့ခြင်းဖြစ်ပြီး ယနေ့တွင်လည်း တိုက်ပွဲများဆက်လက်ပြင်းထန်နေကာ စစ်ကောင်စီက ဂျက်တိုက်လေယာဥ်ဖြင့် လာရောက်တိုက်ခိုက်နေသည်ဟု ဒေသခံများထံမှသိရသည်။

ပုံစာ-လက်ရှိလွိုင်ကော်မြို့ပေါ်တိုက်ပွဲတွင်း၌ ထိခိုက်ပျက်စီးမှုများ။

***

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – > https://t.me/newstlk/2405

YouTube- > https://youtu.be/SpxIBpTYop8

Website -> https://thanlwinkhet.net/?p=6215