ကောင်းချစ်အောင်
စက်တင်ဘာ ၁၈၊ ၂၀၂၃။
စစ်ကိုင်းတိုင်း၊ ကသာမြို့နယ်တွင် ဧရာဝတီမြစ်ကြောင်းအတိုင်း ဆန်တက်လာသည့် စစ်ကောင်စီရေယာဉ်များပစ်ခတ်ခံရပြီးနောက် မြစ်ကမ်းဘေးရှိ အရပ်သားပြည်သူ ၇ ဦးခန့်ကို စစ်ကောင်စီတပ်ဖွဲ့ဝင်များက သတ်ဖြတ်သွားခဲ့သည်ဟု ဒေသခံများထံက သိရသည်။
မန္တလေးမြို့မှဆန်တက်လာသည့် စစ်သင်္ဘော ၆ စင်း ရောက်ရှိလာမည့်သတင်းကို ကြိုတင်သိရသောကြောင့် ကာကွယ်ရေးတပ်ဖွဲ့များက ယမန်နေ့ နံနက် ၁၁ နာရီခန့်တွင် လက်နက်ကြီးများဖြင့်စောင့်ကြိုတိုက်ခိုက်ခဲ့ရာ နှစ် ဘက်ထိတွေ့တိုက်ပွဲဖြစ်ပွားခဲ့သည်ဟု မိုးတားတိုက်နယ် ပကဖ ဒုတာဝန်ခံ အိန်ဂျလာ က သံလွင်ခက် ကို ပြောသည်။
“အင်အား၂၀၀လောက်ရှိတယ်။ ၁၀၇ မမနဲ့ ၃ လုံးလောက်ထိသွားတော့ ၁ စီးက ရပ်သွားတယ်။ စစ်သင်္ဘောကနေစက်လက်တွေနဲ့ တရစပ်ပြန်ပစ်တယ်” ဟု ၎င်းက ပြောသည်။
စစ်သင်္ဘောများသည် ရေလယ်ခေါင်တွင်ကျောက်ချရပ်နားပြီး အင်အား ၄၀ ကျော်ပါ စက်လှေ ၁ စီးဖြင့် ကမ်းကပ်လာခဲ့ရာ ကာကွယ်ရေးတပ်များနှင့် ထိတွေ့တိုက်ပွဲ ဖြစ်ပွားခဲ့သည်။
စစ်ကောင်စီတပ်ဘက်က ရေယာဥ်များပေါ်မှ လက်နက်ကြီး၊ စက်လက်နက်များဖြင့် တရပ်စပ်ပစ်ကူပေးနေခြင်းနှင့်ကာကွယ်ရေးတပ်များဘက်က ကျည်အင်အားနည်းလာခြင်းတို့ကြောင့် ကာကွယ်ရေးတပ်များ ဆုတ်ခွာသွားခဲ့ပြီးနောက်ပိုင်း စစ်ကောင်စီတပ်ဖွဲ့ဝင်များ တုပ်ကြီးကျေးရွာကိုဝင်ရောက်မီးရှို့ခဲ့ရာ နေအိမ်အလုံး ၃၀ ကျော်ပျက်စီးခဲ့ပြီး ပြည်သူ ၇ ဦးသေဆုံးခဲ့သည်ဟု ဒေသခံ ၁ ဦး ကဆိုသည်။
“တုပ်ကြီးရွာကနေ လှမ်းပစ်တယ်ထင်လို့ မီးလာရှို့တာပေါ့။ မီးရှို့ခံထားရတဲ့ ၃ လောင်းတွေ့တယ်။ ရေစပ်မှာလည်းအလောင်း ၄ လောင်းကိုသတ်ဖြတ်ထားတဲ့ သွေးကွက်တွေတွေ့တယ်။ ရေထဲမျောချလိုက်တာနဲ့တူတယ်“ဟု ၎င်း ကဆိုသည်။
အဆိုပါစစ်ကောင်စီတပ်သားများသည် တုပ်ကြီးရွာထဲကပြန်လည်ထွက်ခွာချိန်တွင် ရေနီရွာဘက်ကိုလည်း လက်နက်ကြီးများဖြင့်ပစ်ခဲ့သောကြောင့် ဘုန်းကြီးကျောင်းနှင့် နေအိမ်အချို့ပျက်စီးခဲ့ရသေးသည်ဟု သိရသည်။
စစ်ကောင်စီတပ်ဖွဲ့ဝင်များသည် ပြည်သူများကိုသတ်ဖြတ်ပြီး နေအိမ်များမီးရှို့ဖျက်ဆီးခဲ့သည့်အပြင် ပြည်သူ ၅ ဦးခန့်ကိုလည်း ဖမ်းဆီးခေါ်ဆောင်သွားခဲ့သည်ဟု သိရသည်။
အဆိုပါစစ်သင်္ဘောများသည် မန္တလေးမြို့မှလက်နက်ရိက္ခာများတင်ဆောင်ကာ ဧရာဝတီမြစ်ကြောင်းအတိုင်း ဆန်တက်လာခြင်းဖြစ်ပြီး ယနေ့မှာတော့ ကချင်ပြည်နယ်၊ ရွှေကူမြို့နယ်အတွင်း ရောက်ရှိနေသည်ဟု ဒေသခံများကဆိုသည်။
ပြီးခဲ့သည့် ဇူလိုင်လဆန်းကစပြီး စစ်ကောင်စီက စစ်လက်နက်ရိက္ခာများကို ရေကြောင်းဖြင့် ကချင်ပြည်နယ်ဘက်သို့ပို့ဆောင်နေပြီး ကာကွယ်ရေးတပ်ဖွဲ့များ၏ ကြားဖြတ်တိုက်ခိုက်မှုများ မကြာခဏဖြစ်ပွားလျက်ရှိသည်။
**************
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/1975
YouTube- > https://youtu.be/SpxIBpTYop8
Website -> https://thanlwinkhet.net/?p=5634
