ဆိပ်ဖြူရှိ ကပစစက်ရုံများကို တိုက်ခိုက်ရာ ဗုံးသီးလောင်ချာထုတ်စက်ရုံနှင့် လက်နက်ဂိုထောင်များ ပျက်စီး

ကောင်းချစ်အောင်

ဇွန် ၅၊ ၂၀၂၃။

မကွေးတိုင်း၊ ဆိပ်ဖြူမြို့နယ်အတွင်းရှိ ကာကွယ်ရေးပစ္စည်းစက်ရုံ အမှတ် ၂၁ နှင့် အမှတ် ၂၂ နှစ်ခုကိုကာကွယ်ရေးတပ်ဖွဲ့များက ပစ်မှတ် ထားတိုက်ခိုက်ခဲ့ရာ စစ်ကောင်စီဘက်မှ သုံးဦးထက်မနည်းသေဆုံးခဲ့ပြီး ဗုံးသီးလောင်ချာထုတ်သည့် စက်ရုံနှင့် လက်နက်ဂိုထောင်များ ပျက်စီးမှုရှိခဲ့သည်ဟု သိရသည်။

ပြီးခဲ့သည့် မေလ ၂၄ရက်တွင် ကပစ ၂၁ရှိ လက်နက်ဂိုထောင်များကို ရှော့တိုက်ဒုံးများဖြင့် ပစ်ခဲ့ရာ ဗုံးသီးလောင်ချာထုတ်လုပ်သည့် အဆောက်အဦး ပျက်စီးဆုံးရှုံးမှုရှိခဲ့သည်ဟု ပခုက္ကူခရိုင် အမှတ် ၁၉တပ်ရင်း တပ်ရင်းမှုးဖြစ်သူ ကိုပိုင်က သံလွင်ခက်ကိုပြောသည်။

“ကျွန်တော်တို့ရင်းက ဆိပ်ဖြူဘာမထီတပ်ခွဲ ၁နဲ့ ၂တို့က သွားတိုက်တာ အဲဒီရက်မှာတော့လုံခြုံရေးနည်းတယ်လို့ပြောရတယ်။ ရန်သူ့ဘန်ကာနဲ့မီတာ၅၀၀ အကွာထိ ရောက်နိုင်ခဲ့တယ်“ဟု ဆိုသည်။

နောက်ပိုင်းရက်များတွင် စစ်ကောင်စီဘက်မှ လုံခြုံရေးတိုးမြှင့်လာခဲ့ပြီး ကပစ၂၁စက်ရုံတည်ရှိရာ ကန်ဇွန်းမကျေးရွာအနီး အနောက်ဘက် ၁မိုင်ခန့်အကွာရှိ လစခ ၉ လက်အောက်ခံ တပ်ရင်းအမှတ်– ၂၀၃၆  စစ်ကောင်စီကင်းပုန်းကို မေလ ၂၇ရက်၌ သွားရောက်တိုက်ခိုက်ခဲ့ရာ သုံးဦးထက်မနည်းသေဆုံးမှုရှိခဲ့သည်ဟု ဆိုသည်။

မေလ ၂၈ရက် ည ၁၁နာရီဝန်းကျင်တွင်လည်း ကပစ ၂၂အား ရှော့တိုက်ဒုံးအလုံးရေ ၅၀ ခန့်ပစ်ခဲ့ပြီး အထိအခိုက်မရှိဘဲ တိုက်ခိုက်နိုင်ခဲ့မှုအပေါ် အားရမှုရှိခဲ့သည်ဟု တပ်ရင်းမှူး ကိုပိုင်ကဆိုသည်။

“ဗျုဟာကျကျပဲ ကိုယ်ဘက်ကအထိအခိုက်မရှိတာပဲကြည့်ပေါ့ဗျာ။  ကာကွယ်ရေးဝန်ကြီးဌာန အမှတ် ၁စစ်ဒေသမကွေးတိုင်းရုံး အမိန့်အောက်ကနေ စုစုစည်းစည်းတိုက်ကြတာပါ“ဟု၎င်းက ဆိုသည်။

အဆိုပါတိုက်ခိုက်မှုများအတွင်း ဂန့်ဂေါခရိုင်အမှတ်–၅တပ်ရင်း၊ ပခုက္ကူခရိုင်အမှတ်–၁၉တပ်ရင်း၊ ပခုက္ကူခရိုင်အမှတ်–၄တပ်ရင်း၊ ဆိပ်ဖြူပကဖ စသည့်အဖွဲ့များ ပါဝင်ခဲ့ကြသည်။

မကွေးတိုင်းတွင် ကာကွယ်ရေးပစ္စည်းစက်ရုံ(ကပစ)စုစုပေါင်း ၉ခုရှိသည့်အနက် ဆိပ်ဖြူမြို့နယ်အခြေစိုက်စက်ရုံများဖြစ်သည့် ကပစ–၂၁မှ လေယာဉ်ဗုံးများအဓိကထုတ်လုပ်ပြီး ကပစ–၂၂မှ စစ်ကောင်စီတပ်သားအများစုကိုင်ဆောင်သည့် MAရိုင်ဖယ်သေနတ်များ ထုတ်လုပ်သည်ဟု သိရသည်။

ရုပ်သံ–ကာကွယ်ရေးတပ်ဖွဲ့ဝင်များက ရှော့တိုက်ဒုံးဖြင့် ပစ်ခတ်မှု(ပေးပို့)

*********************************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – > https://t.me/newstlk/1330

YouTube -> https://youtu.be/E95gr8vKREs

Website -> https://thanlwinkhet.net/?p=4939

Website ->https://eng.thanlwinkhet.net