သဇင်
ဧပြီ ၁၁ ၊၂၀၂၃ ။
၂၀၂၃ ခုနှစ် တော်လှန်သင်္ကြန် သံချပ်ပြိုင်ပွဲတွင် မြန်မာနိုင်ငံအထွေထွေ အလုပ်သမား သမဂ္ဂများ အဖွဲ့ချုပ်FGWM မှ “ ဒို့ လုပ်သား သံချပ်အဖွဲ့ “ အမည်ဖြင့် ပါဝင်ယှဉ်ပြိုင်သွားမည်ဟု ယင်းအဖွဲ့ထံက သိရသည်။
အဆိုပါ သံချပ်ကို ၂၀၂၂ခုနှစ် အလုပ်သမားနေ့ကတည်းက ပြုလုပ်ရန်စီစဉ်ခဲ့ပြီး အခွင့်မသင့်သည့်အတွက် ယခုမှသာ သံချပ်ထွက်ရန် စီစဉ်နိုင်ခဲ့ခြင်းဖြစ်သည်ဟု “ ဒို့ လုပ်သား သံချပ်အဖွဲ့” ၏ တာဝန်ရှိသူတစ်ဦးက သံလွင်ခက်ကိုပြောသည်။
“သံချပ်ကို လုပ်ဖို့စဉ်းစားမိတာကတော့ ၂၀၂၂ တည်းက အလုပ်သမားနေ့မှာ ထွက်ဖို့စဉ်းစားထားခဲ့တာ။ အဲ့တုန်းက အားလုံး အလုပ်တွေကကြပ်နေကြတာရယ် အစစအရာရာအဆင်သင့် မဖြစ်သေးတာရယ်ကြောင့် ကျွန်မတို့မလုပ်ဖြစ်ခဲ့ဘူး။ ဒီနှစ်မေဒေး(အလုပ်သမားနေ့)မှာတော့ သံချပ်ထွက်ဖို့ ကျွန်မတို့တိုင်ပင်ဖြစ်တယ်။ မေဒေးလဲသံချပ်ထွက်မှာဆိုတော့ သံချပ်ကိုအစပျိုးဖို့ ဝင်ပြိုင်ရခြင်းဖြစ်ပါတယ်” ဟု ၎င်းကပြောသည်။
“ ဒို့ လုပ်သား သံချပ်အဖွဲ့ “ သည် ခေတ်အဆက်ဆက် ဒီမိုကရေစီ တိုက်ပွဲတိုင်းတွင် ရှေ့ဆုံးမှ ထုထည်ကြီးမားစွာတော်လှန်ကြသည့် အမေ့လျော့ခံ အလုပ်သမားများကို ကိုယ်စားပြုသည်ဟု ဦးဆောင်သူများက ပြောသည်။
ယခု သံချပ်ကို လုပ်ငန်းခွင်များမှ ထွက်ပြေးတိမ်းရှောင် လာသော အလုပ်သမား သမဂ္ဂခေါင်းဆောင်များ နှင့်ကျောင်းသားလူငယ်မျိုးဆက်သစ်များ က ပါဝင်ဖျော်ဖြေ တင်ဆက်သွားမည် ဟုလည်း FGWM ကထုတ်ပြန်ထားသည်။
တော်လှန်သင်္ကြန် တွင်ပါဝင်နိုင်ရန်အတွက် မတူညီသည့်နေရာများမှ အဖွဲ့ဝင်များကို စုစည်းကာ သံချပ်တိုက်ရခြင်းဖြစ်သည့်အတွက် အခက်ခဲများလည်းရှိခဲ့သည်ဟု “ ဒို့ လုပ်သား သံချပ်အဖွဲ့” ၏ တာဝန်ရှိသူကပြောသည်။
“သံချပ်တိုက်တဲ့ခါမှာ အဖွဲ့သားတွေအနေနဲ့ မတူညီတဲ့နေရာတွေကနေ စုရပ်လုပ်ပြီးတိုက်ရတာဖြစ်တဲ့အတွက် တစ်ယောက်နဲ့တစ်ယောက်အချိန်ညှိရတာတွေမှာ အခက်ခဲတွေရှိခဲ့တယ်။ အချိန်မအားတဲ့ကြားက တိုက်ရတာဖြစ်တဲ့အတွက် ဆိုင်းနဲ့ဝိုင်းနဲ့သေချာတိုက်ခဲ့ရတာကတော့ အချိန်က နှစ်ရက်တည်းပဲ။အခြားအချိန်မှာတော့ စည်းနဲ့ဝါးလောက်ပဲတိုက်ခဲ့ရတယ်။ခြုံပြောရမယ်ဆိုရင် အချိန်ကတော့အရမ်းနည်းခဲ့ပါတယ်။ ဒါပေမဲ့ ကျွန်မတို့အကောင်းဆုံးဆောင်ရွက်ခဲ့ကြပါတယ်”ဟု ၎င်းကပြောသည်။
မျက်မှောက်ခေတ် စစ်အာဏာရှင်လက်အောက်တွင် ကြုံတွေ့နေရသည့် အလုပ်သမားအခွင့်အရေး ချိုးဖောက်ခံရမှု၊ လူ့အခွင့်အရေးချိုးဖောက်ခံရမှု ၊ CDM အလုပ်သမားများ၏ ကူကယ်ရာမဲ့အခြေအနေများနှင့် ခေတ်စနစ်ရိုက်ခတ်မှုများအကြောင်းကို တင်ဆက်သွားမည်ဟု အဆိုပါ သံချပ်အဖွဲ့တွင်ပါဝင်သူများက ပြောသည်။
တော်လှန်သင်္ကြန် သံချပ်ပြိုင်ပွဲကို အွန်လိုင်းမှ ဝင်ရောက်ယှဉ်ပြိုင်ရမည်ဖြစ်ပြီး အဆိုပါပြိုင်ပွဲကို Delta New Agency က ဦးစီးကျင်းပပြီး Public Voice Television(PVTV)က “ပြည်သူ့အသံအထင်ဟပ်ဆုံးဆု “အဖြစ် ဆုငွေကျပ် ၁၀သိန်း ချီးမြှင့်သွားမည်ဟု ကြေညာထားသည်။
Photo -FGWM
*********************************
အောက်ဖော်ပြပါလင့်တွေမှာ သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk
YouTube -> https://youtu.be/kazoupBwT0Y
Website -> https://thanlwinkhet.net/?p=3525
Website ->https://eng.thanlwinkhet.net
