နန်းဆုပန်ခန့်
ဧပြီ ၁၊၂၀၂၃။
ကရင်ပြည်နယ်၊ ကေအဲန်ယူထိန်းချုပ်နယ်မြေ၊ တပ်မဟာ ၁ အတွင်း စစ်ကောင်စီတပ် အမှတ်– ၃၁၄ အမြောက်တပ်ရင်း၏ လက်နက်ကြီးပစ်ခတ်မှုကြောင့် အသက် ၁၅နှစ်အောက်ကလေး ၄ ဦးအပါအဝင် ၆ ဦးထိခိုက်ဒဏ်ရာရှိခဲ့သည်ဟု ဒေသခံများထံမှ သိရသည်။
အမှတ်– ၃၁၄ အမြောက်တပ်ရင်းသည် ကေအဲန်ယူ–သထုံမြို့နယ်၊ ရွှေရောင်ပြကျေးနယ်၊ ဇီးဝန်းကျေးရွာနီး ဒေသခေါ် ထီးဖိုးညလိတွင် တပ်စွဲထားခြင်းဖြစ်သည်ဟု KNU /KNLA တပ်ဖွဲ့ဝင်တစ်ဦးကပြောသည်။
မတ်လ ၂၉ ရက်နေ့က ဒူးသထူခရိုင်၊ သထုံမြို့နယ်၊ ဒေါက်ရပ်ကျေးနယ်အတွင်းရှိ ကျေးရွာများသို့ လက်နက်ကြီးပစ်ခတ်ခဲ့ရာ တောင်ကလေးကျေးရွာရှိ လူနေအိမ် ၁ လုံးပျက်စီးခဲ့သည်။
ထို့ပြင် လက်နက်ကြီးကျည်စထိမှန်မှုကြောင့် အသက် ၇၅နှစ်အရွယ် ဒေါ်မသောင်း၊ အသက် ၄၀ နှစ်ရှိ ဒေါ်နောပျိုအပါအဝင် ညီညီဇော် အသက် ၁၄ နှစ် ၊ အသက် ၅ နှစ်အရွယ် ချစ်မိုးအောင် ချစ်မိုးသူနှင့် အသက် ၁၄ နှစ်အရွယ်ရှိ နော်စံပယ်ဖြူတို့ ထိခိုက်ဒဏ်ရာရခဲ့သည်ဟု ကရင်အမျိုးသားအစည်းအရုံး ဒူးသထူခရိုင်၏ထုတ်ပြန်ချက်တွင်ပါရှိသည်။
လက်နက်ကြီးကျရောက်ပေါက်ကွဲမှုကြောင့် ဒေသခံများ၏ ပေါင်၊ ဦးခေါင်း၊ ခြေသလုံးတွင် ထိခိုက်ဒဏ်ရာများရခဲ့သည်ဟု ယမန်နေ့က ထုတ်ပြန်သည့် ဒူးသထူခရိုင်၏ထုတ်ပြန်ချက်တွင်ပါရှိသည်။
သံလွင်ခက်မှ ပြုစုထားသည့်စာရင်းအချက်အလက်များအရ စစ်ကောင်စီတပ်၏ လက်နက်ကြီးပစ်ခတ်မှုကြောင့်တပ်မဟာ ၁ နယ်မြေတွင် မတ်လ ၁ လအတွင်း ရဟန်းသာမဏေ၊ သီလရှင်၊ ဒေသခံအပါအဝင် ၁၀ ဦးသေဆုံးပြီး ၁၅ဦး ဒဏ်ရာရရှိခဲ့သည်။
ပုံစာ–လက်နက်ကြီးထိမှန်မှုကြောင့် ပျက်စီးသွားသည့် နေအိမ်တစ်လုံးမြင်ကွင်း။
Photo-KNUDTD
