အွန်လိုင်းမှတစ်ဆင့်ပတ်စ်ပို့စ်လျှောက်ရာတွင် ကွန်ပျူတာနှင့်Wifi တို့ကိုသာအဓိကအသုံးပြုလုပ်ဆောင်နေရသည့်အတွက် မီးမမှန်မှုကလည်း အခက်အခဲတစ်ခုအဖြစ်ရှိနေသည်ဟု လျှောက်ထားသူများက ပြောသည်။
လိုင်းကြပ်မှုများကြောင့် ကွန်ပျူတာဖြင့်သာ အသုံးပြုနေကြသည့်တိုင် Website ထဲဝင်ရသည်မှာ နာရီနှင့်ချီအချိန်ကြာသည့်အပြင် မီးပျက်နေမှုကြောင့် ခဏခဏပြန်ဝင်ရသည့် ပြဿနာများလည်း ရှိနေသည်ဟု သိရသည်။
” ဖုန်းနဲ့က လျှောက်ရတာအဆင်မပြေပါဘူး။ လိုင်းကြပ်လို့ လပ်တော့တို့ကွန်ပျူတာတို့နဲ့ပဲ အဆင်ပြေတယ်။ မီးခဏခဏပျက်ရင်တော့ လပ်တော့အားမရှိတာတို့ wifi မှာ အားမရှိတာတို့ တင်ဖို့ကလုံးဝအဆင်မပြေနိုင်ပါဘူး ” ဟုရန်ကုန်မြို့မှ ပတ်စ်ပို့စ်လျှောက်ထားသူ လူငယ်အမျိုးသားတစ်ဦးက ပြောသည်။
ပစ်တ်ပို့စ်လျှောက်ထားရာတွင် ဖုန်းဖြင့်ဝင်မရ၍ ကွန်ပျူတာကိုအသုံးပြု လျှောက်ရာတွင်လည်း မီးမမှန်သည့်ပြဿနာအတွက် Power Bank ကိုဆောင်ထားရသည်ဟု သန်လျင်မှ အသက် ၁၉ နှစ်အရွယ် အမျိုးသမီးငယ်ကပြောသည်။
၎င်းက“ဖုန်းနဲ့ကဝင်လို့မရဘူး။ Laptopနဲ့မှအဆင်ပြေတာ။ မီးပျက်တဲ့အချိန်ဆို ညီမ wifi ကိုpower bank နဲ့ join လုပ်ရတာတွေတော့ရှိတယ် ” ဟုပြောသည်။
ထိုသို့ မီးအခက်အခဲ ၊ အင်တာနက်ပြဿနာများကို ဖြေရှင်း၍ လျှောက်သော်လည်း လိုင်းကြပ်မှုများကြောင့် အဆင့်တိုင်း၌ အချိန်အကြာကြီးစောင့်ရကြောင်းနှင့် ယနေ့နံနက်ပိုင်းမှသာ ရက်ချိန်းရ၍ လာမည့်လ ၈ရက်တွင် ရုံး၌ ပတ်စ်ပို့စ်သွားလုပ်ရမည်ဟု ယင်းကပြောသည်။
အွန်လိုင်းမှတစ်ဆင့် ပစ်တ်ပို့စ်လျှောက်ရာတွင် မီးမမှန်မှုကြောင့် အခက်အခဲနှင့်ကြုံတွေ့ရသည်ကိုလည်း ဂျပန်နိုင်ငံ၌ ကျောင်းသွားတက်မည့် အမျိုးသားလူငယ်တစ်ဦးက အတွေ့အကြုံကိုပြောသည်။
၎င်းက ” ၂၇ရက်နေ့တုန်းက မီးပျက်တဲ့အချိန် ဝိုင်ဖိုင်မရလို့ လက်တော့ပိတ်ပြီး ဖုန်းနဲ့ Kpayကနေ ငွေချေလိုက်တဲ့အခါမှာ QRကုတ် ကျမလာပဲနဲ့ ။သူတို့က Scanပေးထားတဲ့အတွက် ဖုန်းနှစ်လုံးရှိမှScanဖတ်လို့ရမှာလေ။
ကျနော်တို့လို ဖုန်းတစ်လုံးထဲနဲ့Kpayကနေတိုက်ရိုက်ဝင်ချေတဲ့သူတွေကျတော့ dateကနောက်ကျတာတွေ့ရတယ်။လူအယောက် တစ်သောင်းကနေ တစ်သောင်းသုံးထောင် ကျော်လောက်ထိနောက်ဆုတ်သွားတာတွေ့ရတယ်။
ဒါကြောင့် ဖုန်းနှစ်လုံးရှိတယ် လက်တော့ပါရှိတယ်ဆိုရင် လက်တော့နဲ့ပဲဖွင့်ပါ ။Website ထဲဝင်ပြီးငွေလွှဲတဲ့ခါကျလို့ရှိရင် ဖုန်းနဲ့scanဖတ်ပြီးငွေချေပါ။အဲ့ဒါက ပိုပိုမြန်ဆန်ပါတယ်လို့ အကြံပြုချင်ပါတယ် “ဟု ပြောသည်။
လျှောက်ထားသူများသည် ကွန်ပျူတာများရှိနေ၍ မီး၊ အင်တာနက်လိုင်းပြဿနာတို့ ဖြေရှင်းနိုင်လျှင်တောင် နည်းပညာအခက်အခဲကြောင့် တချို့လျှောက်ထားသူများ အဆင်မပြေဖြစ်နေသည်ကို တွေ့ရှိရကြောင်း နည်းပညာကျွမ်းကျင်သူ တစ်ဦးကပြောသည်။
ထိုပြဿနာများတွင် အွန်လိုင်းစနစ်ကိုစတင်အကောင်အထည်ဖော်သည့် တာဝန်ရှိသူများအနေဖြင့် သေချာသုတေသနာပြုလုပ်သင့်ကြောင်းနှင့် အင်တာနက်ဒေတာစျေးနှုန်းကြီးမြင့်နေရာတွင်လည်း အခမဲ့ လျှောက်ထားနိုင်ရန်ပြုလုပ်ပေးသင့်ကြောင်း ၎င်းကဆင်လက်ပြောကြားသည်။
ပတ်စ်ပို့စ်ကိုအွန်လိုင်းမှလျှောက်ရသည့် စနစ်သစ်တွင် တာဝန်ရှိသူများ၏ လိုအပ်ချက်များကြောင့်လည်းအခက်အခဲများစွားဖြစ်နေရခြင်းဟု ကျွမ်းကျင်သူများက ပြောသည်။
” Website တစ်ခုRunနိုင်ဖို့ဆိုရင် လိုအပ်တဲ့အရင်းအမြစ် ဆာဗာ၊အင်တာနက်တွေ ပြည့်စုံလုံလောက်ဖို့လိုတယ်။အဲ့တာတွေ ပြည့်စုံလုံလောက်မှုမရှိလို့ အခုလိုပြဿနာတွေဖြစ်တာပါ။
ပတ်စ်ပို့စ်လျှောက်ထားတဲ့ Platform ရဲ့ဆာဗာပိုင်းကဝင်လာတဲ့သူတွေကိုမနိုင်တာပေါ့။တစ်နေ့ကို အလွန်ဆုံးဝင်တာ နှစ်သောင်းလောက်ပဲရှိတယ်။ အဲ့လောက်ပမာဏကိုတောင်မှ မနိုင်ပဲနဲ့ ဆာဗာပြုတ်ကျသွားတယ်။ဆိုလိုရင်းသဘောကIT Platformအတွက် ရှိသင့်ရှိထိုက်တဲ့ အရင်းမြစ်ကို သူတို့မထုတ်ပေးနိုင်တာပေါ့။အဲ့တာကြောင့် ကျကျသွားတာဖြစ်ဖို့များပါတယ်။
ကမ္ဘာပေါ်မှာ Website တော်တော်များများက သန်းဂဏန်းလောက်ထိကြည့်ကြတာ အဲ့လိုအခြေနေမှာမှ သောင်းဂဏန်းလောက်ကြည့်တာနဲ့ ကျတာဆိုတော့ တော်တော်လေးအခြေနေဆိုးနေလို့ပါ “ဟု IT နည်းပညာကျွမ်းကျင်သူတစ်ဦးက ပြောသည်။
ယခုလ ၂၄ ရက်တွင်စတင်ခဲ့သော အွန်လိုင်းမှတစ်ဆင့် နိုင်ငံကူးလက်မှတ်များ လျှောက်ထားခြင်းစနစ်သစ်တွင်စနစ်မှာယွင်းမှုများကြောင့် လျှောက်ထားမှုများကို နှစ်ကြိမ်တိုင် ရပ်ဆိုင်းခဲ့ရပြီး ယမန်နေ့ ည ၆ နာရီခွဲမှစ၍ ပုံမှန်အတိုင်း ပြန်လျှောက်၍ ရကြောင်း စစ်ကောင်စီ ပြောခွင့်ရ ဗိုလ်ချုပ်ဇော်မင်းထွန်းက ကြေညာခဲ့သည်။
ထိုသို့ အကြိမ်ကြိမ်ပြုပြင်မှုများပြုလုပ်ထားသော်လည်း ယနေ့အထိ အွန်လိုင်းမှလျှောက်သူများသည် ငွေပေးချေပြီး QR ကုတ်မရသည့်ပြဿနာ၊ Website ထဲဝင်ရန် အချိန်အကြာကြီးစောင့်ရသည့်ပြဿနာများအပါအဝင်အခက်အခဲအမျိုးမျိုး နှင့် ရင်ဆိုင်နေကြရဆဲဖြစ်သည်။
