ဗယ်လင်တိုင်းယဉ်ကျေးမှုဟာ အင်္ဂလန်မှာ အရင်ဦးဆုံးပေါ်ထွန်းခဲ့တာဖြစ်ပြီး (၂ဝ) ရာစုနဲ့ (၂၁) ရာစုမှာတော့ ဒီဓလေ့ဟာ တခြားနိုင်ငံတွေကိုပါ တဖြည်းဖြည်းပျံ့နှံ့သွားပါတယ်။
မြန်မာနိုင်ငံမှာလည်း ဗယ်လင်တိုင်းယဉ်ကျေးမှုဟာ လူငယ်တွေအကြား ရေပန်းစားပါတယ်။
စစ်တပ်က အာဏာသိမ်းပြီးနောက်မှာတော့ မြန်မာနိုင်ငံက လူငယ်အများစု နွေဦးတော်လှန်ရေးမှာ ပါဝင်ခဲ့ပါတယ်။
အရင်က မြို့ပေါ်မှာ ချစ်သူခင်သူတွေနဲ့ ဗယ်လင်တိုင်းနေ့ ဖြတ်သန်းကြတဲ့ လူငယ်တွေဟာ အခုအခါမှာတော့ လက်နက်ကိုင်ရင်း နေရာဒေသအသီးသီး ရောက်ရှိနေကြပါတယ်။
ဗယ်လင်တိုင်းနေ့ဟာ ရောမခေတ်အတွင်းက လက်ထပ်ထိမ်းမြှားမှုကို တားမြစ်ခံရတဲ့ စစ်သားတွေကို ထိမ်းမြှားလက်ထပ်မှုပြုလုပ်ပေးခဲ့တာကြောင့် ထောင်သွင်းအကျဉ်းချခံရတဲ့ စိန့်ဗယ်လင်တိုင်း အမည်ရ သူတော်စင်တစ်ပါးနဲ့ ဆက်စပ်ပတ်သက်ပါတယ်။
သူဟာ အကျဉ်းချခံနေရစဉ်မှာ ထောင်မှူးရဲ့သမီးဖြစ်သူကို ဆေးကုသပေးခဲ့ပြီး သူကွပ်မျက်ခြင်းမခံရခင်အချိန်မှာ “သင့်ရဲ့ဗယ်လင်တိုင်း” (Your Valentine) လို့ လက်မှတ်ရေးထိုးထားတဲ့ နှုတ်ဆက်စာကို သူ(မ)အတွက် ရေးထားခဲ့တယ်လို့ ဆိုပါတယ်။
ဖေဖော်ဝါရီလ ချစ်သူများနေ့မတိုင်ခင် ရက်သတ္တပတ်အလိုမှာတော့ ကရင်အမျိုးသားအစည်းအရုံးKNU နယ်မြေထဲမှာ တော်လှန်ရေး စုံတွဲ ၅ တွဲကို တာဝန်ရှိသူတွေက လက်ထပ်ထိမ်းမြားပေးခဲ့ပါတယ်။
Cobra Column တပ်ခွဲ – ၃က ပြည်သူ့ကာကွယ်ရေးတပ်ဖွဲ့ဝင် တော်လှန်ရေး စုံတွဲ ၅ တွဲကို ကော်ဘရာစစ်ကြောင်းမှူး ဗိုလ်ကြီးဒါဘော က မင်္ဂလာလက်စွပ် ဆင်မြန်းပေးခဲ့ပါတယ်။
မင်္ဂလာပွဲကို Cobra Column တပ်ခွဲ ၃ ရဲ့ ဌာနချုပ်အတွင်း ကျင်းပပေးခဲ့တာလည်း ဖြစ်ပါတယ်။
အခက်အခဲ အကြပ်တည်းကြားက ချစ်ခြင်းမေတ္တာကို တော်လှန်ရေး ရဲဘော်တွေကလည်း အပြန်အလှန် အသိအမှတ်ပြုခဲ့ကြပါတယ်။
” ရဲဘော်ကို ချစ်သူမလုပ်နဲ့ ချစ်သူကို ရဲဘော်လုပ်ဆိုသလိုပဲ ကိုယ့်ကြောင့် ဒီတောထဲထိ ပါလာတယ် ။ ဆိုးအတူ ကောင်းအတူ ရင်ဆိုင်ဖြတ်သန်းပေးတဲ့အတွက် ပိုပြီး ကြည်နူးရတယ်။ ရိုးရှင်းတဲ့ တကယ်အချစ်ကို ထိတွေ့ခွင့်ရတယ်လို့ ” တော်လှန်ရေးနယ်မြေထဲက တပ်ဖွဲ့ဝင်လူငယ်တစ်ဦးက ပြောပါတယ်။
ဒါပေမယ့် တောထဲက သူချစ်ရတဲ့သူကို ချောကလက် လက်ဆောင်မပေးနိုင်တာကိုတော့ အားနာမိတယ်လို့ သူက ဆက်ပြောပါတယ်။
ချစ်သူများနေ့နဲ့ပတ်သက်တဲ့ ဒဏ္ဍာရီလည်း ရှိနေပါတယ်။ ရောမဘုရင်တစ်ပါးရဲ့လက်ထက်မှာ စစ်ထွက်တဲ့ စစ်သည်တော်တွေဟာ ချစ်သူရည်းစားနဲ့ ဇနီးမယားတွေကို တမ်းတအမှတ်ရတဲ့စိတ်တွေဖိစီးနေတာကြောင့် စစ်ပွဲတိုင်းမှာ ရှုံးနိမ့်နေခဲ့ကြပါတယ်။
ဒီအကြောင်းကို ဘုရင်ကြီးသိတဲ့အခါ ရောမမြို့မှာချစ်သူရည်းစား လုံးဝမထားဖို့နဲ့ ဘုန်းတော်ကြီးတွေကိုလည်း ထိမ်းမြှားပေးတာ လုံးဝမပြုလုပ်ရလို့ အမိန့်ထုတ်ခဲ့ပါတယ်။
ဘုန်းတော်ကြီး စိန့်ဗယ်လင်တိုင်းဟာ ချစ်သူတွေရဲ့ ဘဝချစ်ခြင်းနိယာမကို နားလည်စာနာတတ်သူဖြစ်တဲ့အတွက် ဘုရင်ထုတ်ပြန်ထားတဲ့အမိန့်ကို ဂရုမပြုဘဲ အရဲစွန့်တဲ့ ချစ်သူနှစ်ဦးကို လက်ထပ်ပေးလိုက်ပါတယ်။
ဒါကြောင့်ပဲ ဘုရင်က အမျက်ရှပြီး ဖေဖော်ဝါရီ (၁၄) ရက်မှာ ဘုန်းတော်ကြီးစိန့်ဗယ်လင်တိုင်းကို ကွပ်မျက်ပစ်လိုက်ပါတယ်။
ချစ်သူနှစ်ဦးပေါင်းစပ်နိုင်ဖို့အတွက် အသက်ကိုစတေးပေးခဲ့သူ ဘုန်းတော်ကြီး စိန့်ဗယ်လင်တိုင်းကို ဂုဏ်ပြုတဲ့အနေနဲ့ ဗယ်လင်တိုင်းနေ့ ပေါ်ပေါက်လာခဲ့တာ ဖြစ်တယ်လို့လည်း ဆိုကြပါတယ်။
လက်ရှိ မြန်မာနိုင်ငံကလူငယ်တွေကို ချစ်ခြင်းနဲ့ပတ်သတ်ပြီး ကန့်သတ်မထားပေမယ့် ပုခုံးပေါ်က ဒီမိုကရေစီအရေးနဲ့ လွတ်လပ်ခွင့်အတွက် တာဝန်တွေ များစွာရှိနေပါတယ်။
လက်နက်ကိုင်တော်လှန်နေတဲ့ လူငယ်တွေဟာတစ်နေရာတည်းမှာ အားလုံးက အတူရှိနေကြတာတော့မဟုတ်ပါဘူး။ မိသားစုနဲ့ချစ်ရခင်ရသူတွေကို ထားခဲ့ပြီး တိုက်ပွဲဝင်နေကြသူတွေပါ။
နယ်မြေမတူတဲ့ဒေသမှာ တာဝန်ထမ်းဆောင်နေတဲ့ ကာကွယ်ရေးတပ်ဖွဲ့ဝင်အမျိုးသမီးကတော့ သူချစ်ရတဲ့သူကို တော်လှန်ရေးနယ်မြေထဲက အထီးကျန်မှုတွေကို ရင်ဖွင့်ပြောပြချင်တယ်လို့ ဆိုပါတယ်။
” အပြေးတွေ့ပြီး ကျနော်ဘယ်လောက်တောင် အထီးကျန်ဆန်ပြီး ဖြတ်သန်းခဲ့ရလဲဆိုတာတွေပြောပြချင်တယ်။ သူရော ဘယ်လောက်အထိ အလွမ်းကြောင့် ခံစားခဲ့ရလဲဆိုတာကို နားထောင်ချင်တယ် ” လို့ သူမက ပြောပါတယ်။
အခက်အခဲအကြပ်အတည်းတွေကြားထဲမှာ ရုန်းကန်နေကြပေမယ့် လူငယ်တွေကြားမှာ ချစ်ခြင်းနဲ့ မေတ္တာက ရှင်သန်နေဆဲဖြစ်ပါတယ်။
တော်လှန်ရေးနယ်မြေထဲမှာ အတူရှိနေတဲ့ လူငယ်တစ်ဦးကတော့ သူ့ချစ်ရသူကို တောပန်းလေးတစ်ပွင့် ခူးပေးဖို့ရည်ရွယ်ထားတယ်လို့ ဆိုပါတယ်။
” Vday ကတော့ အခြားပုံမှန်နေ့တွေလိုပဲ ဖြစ်မယ်ထင်တယ်ဗျ။နှစ်ယောက်လုံး တာဝန်ကိုယ်စီနဲ့ဆိုတော့သူလည်း သူအလုပ်နဲ့သူ ကိုယ်လည်း ကိုယ်အလုပ်နဲ့ကိုယ်ပါပဲ၊အဆင်ပြေမယ်ဆိုရင်တာ့ တောပန်းလှလှလေး တစ်ပွင့်လောက် ခူပြီး ပေးဖြစ်မယ်ထင်ပါတယ် ” လို့ သူကပြောပါတယ်။
ဒီမိုကရေစီအရေးနဲ့ လွတ်လပ်ခွင့်အတွက် တိုက်ပွဲဝင်နေကြတဲ့ ပြည်သူ့ကာကွယ်ရေးတပ်ဖွဲ့ဝင်လူငယ်ရဲဘော်တွေရဲ့ ချစ်ခြင်းနဲ့သစ္စာရတု အဆက်ဆက် ခိုင်မြဲပါစေသတည်း။
