ကမ္ဘာ့ဖလားအိမ်ရှင်မြို့များကိုယ်စားပြုသည့် ဒေသန္တရအရာရှိများက ပြီးခဲ့သည့် အင်္ဂါနေ့တွင် လွှတ်တော်သို့ တင်ပြရာ၌ လုံခြုံရေးဆိုင်ရာ စိန်ခေါ်မှုများ၊ အေဂျင်စီများအကြား ပူးပေါင်းဆောင်ရွက်မှု အားနည်းခြင်းနှင့် ရန်ပုံငွေ မလုံလောက်မှုတို့ကြောင့် ပြိုင်ပွဲကျင်းပချိန်တွင် ဆိုးရွားသော ဖြစ်ရပ်များ ဖြစ်ပွားနိုင်ခြေရှိကြောင်း သတိပေးခဲ့ကြသည်။
အထူးသဖြင့် ပြည်တွင်းလုံခြုံရေးကော်မတီဝင်များက အိမ်ရှင်မြို့များအတွက် သတ်မှတ်ထားသော FEMA ( ပြည်ထောင်စု အရေးပေါ်စီမံခန့်ခွဲမှုအေဂျင်စီ) ရန်ပုံငွေများကို အမြန်ဆုံးပြန်လည် ထုတ်ပေးရန် လိုအပ်နေကြောင်း ထောက်ပြခဲ့ကြသည်။
လွှတ်တော်တွင် ထွက်ဆိုချက်ပေးခဲ့သည့် အရာရှိများ၏ အဆိုအရ ဒေသန္တရအေဂျင်စီများသည် သယ်ယူပို့ဆောင်ရေး၊ ဟိုတယ်များ၊ ပရိသတ်ဖျော်ဖြေပွဲများနှင့် လေ့ကျင့်ရေးကွင်းများအတွက် ရှုပ်ထွေးလှသော လုံခြုံရေးအသေးစိတ်အချက်အလက်များကို ဖက်ဒရယ်အစိုးရနှင့် ပေါင်းစပ်ညှိနှိုင်းရာတွင် ပျက်ကွက်မှုများရှိနေကြောင်း သိရသည်။
ထို့ပြင် ဒရုန်း (Drone) ခြိမ်းခြောက်မှုများ၊ လူကုန်ကူးမှု ပြဿနာများနှင့် မက္ကဆီကိုနိုင်ငံအတွင်း ဖြစ်ပွားနေသည့် မူးယစ်ဂိုဏ်းများ၏ အကြမ်းဖက်မှုများကလည်း လုံခြုံရေးအတွက် စိုးရိမ်စရာ အချက်များ ဖြစ်လာနေသည်။
မင်နီယာပိုလစ်မြို့တွင် ICE အရာရှိများ၏ ပစ်ခတ်မှုကြောင့် အမေရိကန်နိုင်ငံသားများ သေဆုံးခဲ့ရပြီးနောက် ပြည်တွင်းလုံခြုံရေးဝန်ကြီးဌာန၏ ရန်ပုံငွေများကို ၁၁ ရက်ကြာ ပိတ်ဆို့ထားခြင်းကြောင့် ယခုကဲ့သို့ အခက်အခဲဖြစ်နေရခြင်းဖြစ်သည်။
အစိုးရအနေဖြင့် အမေရိကန်အိမ်ရှင် ၁၁ မြို့အတွက် လုံခြုံရေးအဆင့်မြှင့်တင်ရန် ဒေါ်လာ ၆၂၅ သန်းနှင့် ဒရုန်းကာကွယ်ရေးအတွက် ဒေါ်လာ ၂၅၀ သန်း လျာထားသော်လည်း ရန်ပုံငွေများ ထိန်းသိမ်းခံထားရမှုကြောင့် စီမံချက်များမှာ ရှေ့မတိုးနိုင်ဖြစ်နေသည်။
ကမ္ဘာ့ဖလားပြိုင်ပွဲကို ဇွန်လ ၁၁ ရက်နေ့တွင် မက္ကဆီကိုစီးတီး၌ စတင်ဖွင့်လှစ်မည်ဖြစ်ပြီး အမေရိကန်နိုင်ငံ၏ ပထမဆုံးပွဲစဉ်ကို ဇွန်လ ၁၂ ရက်တွင် လော့စ်အိန်ဂျလိစ်၌ ကျင်းပကာ ဗိုလ်လုပွဲကို ဇူလိုင် ၁၉ ရက်တွင် နယူးယောက်မြို့၌ ကျင်းပရန် စီစဉ်ထားသည်။
သို့သော်လည်း အိမ်ရှင်အဖြစ် ပူးတွဲကျင်းပမည့် မက္ကဆီကိုနိုင်ငံ ဂွါဒါလာဟာရာမြို့အနီးတွင် ဖြစ်ပွားနေသော ဂိုဏ်းစတားအကြမ်းဖက်မှုများကြောင့် မက္ကဆီကိုဘက်တွင်လည်း လုံခြုံရေးပေးနိုင်စွမ်းအပေါ် သံသယများ မြင့်တက်လာနေသည်။
အမျိုးသားပေါင်းစပ်ညှိနှိုင်းရေးဗဟိုဌာန (National Fusion Center Association) ၏ ဥက္ကဋ္ဌ မိုက်ခ်ဆီနာက ယခုကဲ့သို့ ဆွေးနွေးမှုမျိုးကို လွန်ခဲ့သည့် နှစ်နှစ်ကတည်းက လုပ်ဆောင်ခဲ့ပါက ပိုမိုကောင်းမွန်မည်ဖြစ်ကြောင်းနှင့် လက်ရှိတွင် လိုအပ်သည့် လုံခြုံရေးစွမ်းဆောင်ရည်နှင့် အလှမ်းဝေးနေသေးကြောင်း ထွက်ဆိုခဲ့သည်။
၎င်းက ယခုပြိုင်ပွဲသည် ဆယ်စုနှစ်များစွာအတွင်း အမေရိကန်ပြည်တွင်းလုံခြုံရေးအတွက် အကြီးမားဆုံး စမ်းသပ်ချက်ဖြစ်လာမည်ဟု ဆိုသည်။
မိုင်ယာမီမြို့ ကမ္ဘာ့ဖလားကျင်းပရေးကော်မတီမှ ရေးမာတီနက်ဇ်က အစိုးရထံမှ ရန်ပုံငွေ ဒေါ်လာ ၇၀ သန်းခန့် မရရှိပါက မတ်လကုန်တွင် လုံခြုံရေးမလုံလောက်မှုကြောင့် ပရိသတ်ဖျော်ဖြေပွဲများကို စတင်ဖျက်သိမ်းရတော့မည်ဖြစ်ကြောင်း သတိပေးခဲ့သည်။
“ပြိုင်ပွဲကျင်းပဖို့ ၁၀၇ ရက်ပဲ လိုတော့ပေမဲ့ ပွဲပြင်ဆင်မှုတွေအတွက်ကတော့ ရက် ၇၀ ကျော်ပဲ လိုပါတော့တယ်၊ ရန်ပုံငွေမရရင် စီမံကိန်းတခုလုံး ပျက်စီးသွားနိုင်ပါတယ်” ဟု ၎င်းက ဆိုသည်။
ကင်းဆက်စီးတီးနှင့် မေရီလန်းပြည်နယ်တို့မှ လုံခြုံရေးအရာရှိများကလည်း လုံခြုံရေးဝန်ထမ်းအသစ်များ ခန့်အပ်ရန်နှင့် လက်ရှိဝန်ထမ်းများ၏ လစာပေးရန်အတွက် ထိုရန်ပုံငွေများမှာ အလွန်အရေးကြီးကြောင်း ပြောကြားခဲ့သည်။
မေရီလန်းပြည်နယ် လုံခြုံရေးအကြံပေး ထရာဗစ်နယ်လ်ဆင်က ယခုအခြေအနေကို “ဂျန်ဂါ (Jenga)” ကစားနည်းနှင့် နှိုင်းယှဉ်ကာ အမှားတချက်တည်းနှင့် စီမံချက်တခုလုံး ပြိုလဲသွားနိုင်ကြောင်း တင်စားပြောဆိုခဲ့သည်။
Ref: ESPN News
World Cup host cities warn Congress over security concerns by Shwetha Surendran
