အမီးလေး
စစ်ကိုင်းတိုင်း၊ ဒီပဲယင် းမြို့နယ်၊ အိုးတိန်တွင်းကျေးရွာအား စစ်ကောင်စီတပ်၏ လေယာဉ်ဗုံးကြဲ တိုက်ခိုက်မှုကြောင့် မေလ ၁၃ ရက်တွင် အသက် ၈ နှစ် အရွယ် ကျောင်းသားတစ်ဦးနှင့် ယနေ့ မေ ၁၄ ရက်တွင် အသက် ၁၁ နှစ်အရွယ် ကျောင်းသူ တစ်ဦးတို့ ထပ်မံသေဆုံးခဲ့ရသည်ဟု ဒီပဲယင်းမြို့နယ် ပြည်သူအုပ်ချုပ်ရေးအဖွဲ့မှ ထုတ်ပြန်ထားသည်။
မေလ ၁၂ ရက်က စစ်ကောင်စီ၏ လေကြောင်းတိုက်ခိုက်မှုကြောင့် ယခုဆိုလျှင် သေဆုံးသူ စုစုပေါင်း ၂၄ ဦး ရှိပြီဖြစ်ပြီး ထိခိုက်ဒဏ်ရာရသူ ၁၀၂ ဦး ရှိသည်ဟုလည်း သိရသည်။
ယင်းဒေသတွင် ကူညီကယ်ဆယ်ရေးများလုပ်ဆောင်နေသည့် CDM ကထိက ဒေါ်ရတီအုန်းက “မိသားစုတွေမှာ ဖုန်းလာမှာကိုတောင် ကြောက်နေကြပြီ။ ဖုန်းသံကြားရင် ဒဏ်ရာရထားတဲ့ သားသမီးလေးတွေ ဆုံးသွားပြီဆိုတဲ့ အသံကြားရမှာကြောက်ပြီး ဖုန်းလာမှာကို ကြောက်နေကြတာ” ဟု ပြောသည်။
ထို့အပြင် ထိခိုက်ဒဏ်ရာရှိသူများသည် ဆေးဝါးကုသမှု ခံယူနေရသည့်အချိန်တွင်ပင် စစ်ကောင်စီ၏ လေကြောင်းတိုက်ခိုက်မှုများကို ဆက်တိုက်ခံနေရသည်ဟုလည်း ဒီပဲယင်းကာကွယ်ရေးဖွဲ့တပ်ရင်းမှူးက ဆိုသည်။
လက်ရှိတွင် ထိခိုက်ဒဏ်ရာရရှိသူများအား ဆေးကုသပေးနိုင်ရန် ငွေကြေးလိုအပ်ချက်များ ရှိနေသည်ဟု သိရသည်။
လေကြောင်းတိုက်ခိုက်မှုကြောင့် သေဆုံးသူများသည် အိုးတိန်တွင်းကျေးရွာ စာသင်ကျောင်းသို့ ကျောင်းလာတက်သည့် အသက် ၅ နှစ်မှ ၁၅ နှစ်ကြား အရွယ်ကလေးငယ်များနှင့် ဒေသတွင်း ပရဟိတ ဆရာမ နှစ်ဦးတို့ ဖြစ်သည်။
ယင်းစာသင်ကျောင်းသည် အမျိုးသားညီညွတ်ရေးအစိုးရမှ ဖွင့်လှစ်ထားသည့် ကျောင်းဖြစ်ပြီး မြေပြင်မှ ထိုးလာသည့် စစ်ကြောင်းများနှင့် လေကြောင်းရန် အခြေအနေများအား စောင့်ကြည့်၍ အချိန်ညှိနှိုင်းကာ ကျောင်းဖွင့်ချိန်အား သတ်မှတ်ထားသည်ဟု သိရသည်။
မေလ ၁၂ ရက်က စစ်ကောင်စီမှ လေယာဉ်ဖြင့် ကြဲချလိုက်သည့် ဗုံးသည် စာသင်ကျောင်းတည့်တည်ပေါ်သို့ ကျရောက် ပေါက်ကွဲခဲ့သောကြောင့် သေဆုံးသူဦးရေ များသလို ထိခိုက်ဒဏ်ရာရရှိသူဦးရေလည်း မြင့်မားခဲ့ခြင်းဖြစ်သည်။
ယခုတစ်ကြိမ်သည် စစ်ကိုင်းတိုင်းအတွင်း စာသင်ကျောင်း ဗုံးကြဲတိုက်ခိုက်ခံရမှုများထဲမှ ဒုတိယမြောက် ကလေးသေဆုံးမှု အများဆုံးဖြစ်စဉ်လည်း ဖြစ်သည်။ ပြီးခဲ့သည့် ၂၀၂၃ ခုနှစ် ဇန်နဝါရီ ၁ ရက်မှ ၂၀၂၅ မေ ၁၂ ရက်အထိ နှစ်နှစ်ကျော် အတွင်းမှာ လေကြောင်းက အကြိမ်ရေ ၂၆၀၀ တိုက်ခိုက်ခဲ့ပြီး စာသင်ကျောင်းပေါင်း ၂၄၀ ပျက်စီးဆုံးရှုံးခဲ့ရသည်ဟု အမျိုးသားညီညွတ်ရေးအစိုးရ လူ့အခွင့်အရေးဆိုင်ရာဝန်ကြီးဌာနက ထုတ်ပြန်ထားသည်။
