ယမန်နေ့ ဒီဇင်ဘာလ ၂၇ရက်တွင် တစ်နေကုန် နီးပါးတိုက်ပွဲပြင်းထန်ခဲ့သည့် ကရင်ပြည်နယ်၊ ကော့ကရိတ်တိုက်ပွဲ၌ စစ်ကောင်စီတပ်ဘက်မှ ၂၀ ဦးထက်မနည်းသေဆုံးခဲ့သည်ဟု ပူးပေါင်းတပ်ဖွဲ့များထံမှသိရှိရသည်။
ကော့ကရိတ်မြို့အနီးရှိ ကော့နွဲကျေးရွာနှင့်ရွာသစ်ကျေးရွာ အနီးတဝိုက်တွင် စစ်ကောင်စီတပ်နှင့်KNLA ပူးပေါင်းတပ်တို့အကြား ယမန်နေ့ နံနက် ၇နာရီမှစ၍ ညနေပိုင်းအထိ တိုက်ပွဲဖြစ်ပွားခဲ့သည်။
” ၇ နာရီကနေ ညနေ၃ နာရီအထိပစ်တယ်။ နားပြီးတဲ့အခါကျတော့ လက်နက်ကြီးတွေနဲ့ ထုနေတုန်းပဲပေါ့နော် ။နာရီဝက်ကြားတစ်ခါ၊ တစ်နာရီကြားတစ်ခါ အဲလိုမျိုးထုနေတာ “ဟု ကျားဖြူစစ်ကြောင်းတပ်ခွဲ ၁မှ ဗိုလ်မှူးဝင်းဇော်လေးက သံလွင်ခက်ကိုပြောသည်။
အဆိုပါတိုက်ပွဲအတွင်း၌ နှစ်ဖက်ထိခိုက်မှုများရှိခဲ့ပြီး စစ်ကောင်စီတပ်ဘက်မှ ၂၀ ဦးထက်မနည်းသေဆုံး၍ ပူးပေါင်းတပ်ဖွဲ့ဘက်မှလည်း ရဲဘော်တစ်ဦး ကျဆုံးကာ ၅ ဦး မစိုးရိမ်ရဒဏ်ရာရရှိခဲ့သည်ဟု ၎င်းကပြောသည်။
“ တပ်ရင်း ၂၇ က တစ်ယောက်ကျတယ် ။ နောက်ထိခိုက်ဒဏ်ရာရသူတွေက မစိုးရိမ်ရဘူးပေါ့။ ရန်သူဘက်ကတော့ ၂၀ နဲ့အထက်သေဖို့များတယ်။ အလောင်းတွေ သူတို့မကောက်နိုင် သေးဘူး “ဟု ဗိုလ်မှူးဝင်းဇော်လေးကသံလွင်ခက်ကိုပြောသည်။
အထိနာခဲ့သော စစ်ကောင်စီတပ်သည် ယမန်နေ့ နံနက် ၁၁နာရီနှင့် နေ့လည် ၁နာရီခွဲခန့်တို့၌ ရဟတ်ယာဥ်ဖြင့် လာရောက်ပစ်ခတ်တိုက်ခိုက်ခဲ့ပြီး ည ၆နာရီတွင် ဂျက်ဖိုက်တာဖြင့် ထပ်မံလာရောက်တိုက်ခိုက်ခဲ့သည်ဟု သိရသည်။
ထို့ပြင်ယနေ့ နံနက်အစောပိုင်း ၂နာရီကျော်အချိန်တွင်လည်း စစ်ကောင်စီတပ်မှလေယာဉ်ဖြင့်လာရောက်ဗုံးကြဲခဲ့သည်ဟု ကော့ကရိတ်တိုက်ပွဲတွင်းရောက်ရှိနေသည့် PDF ရဲဘော်တစ်ဦးကပြောသည်။
၎င်းက” မနေ့ကနဲ့ဒီမနက်ထိကို ဂျက်ကနှစ်ခါ ။ တိုက်လေယာဥ်နဲ့က သုံးခါရှိပြီ “ဟု စစ်ကောင်စီတပ်က ယမန်နေ့နှင့်ယနေ့နံနက်အစောပိုင်းတို့၌ လေကြောင်းမှ လာရောက်တိုက်ခိုက်သည့် အကြိမ်ရေကိုပြောသည်။
ယမန်နေ့ ကော့ကရိတ်တိုက်ပွဲအတွင်း၌ စစ်ကောင်စီတပ်က လက်နက်ကြီးပစ်ကူ၊ လေယာဥ်ပစ်ကူများဖြင့်တိုက်ခို က်ခဲ့သည့်အပြင် ကရင်နယ်ခြားစောင့်တပ် BGF မှလည်း စစ်ကားအစီး ၂၀ဖြင့် စစ်ကူပေးခဲ့သည်ဟု သိရသည်။
” မနေ့က တစ်နေ့ကုန်လုံးပစ်နေကြတာ။ BGF က ကားအစီး၂၀နဲ့ စစ်ကူလာတယ်။ သူတို့ (စစ်ကောင်စီတပ်များ)ကအင်အားနဲ့လာဖိတာ “ဟု KNLA တပ်ဖွဲ့ဝင်များနှင့်နီးစပ်သူ ထောက်ပို့ PDF ရဲဘော်တစ်ဦးကပြောသည်။
ဒီဇင်ဘာလ ၁၆ရက်နေ့ကတည်း တိုက်ပွဲများဖြစ်ပွားနေ့သည့် ကော့ကရိတ်တိုက်ပွဲ၌ ယမန်နေ့တွင်စစ်ကောင်စီတပ်က အင်အားအလုံးအရင်းဖြင့် ထိုးစစ်ဆင်ခဲ့သော်လည်း တပ်ပြန်ဆုတ်ခဲ့ရသည်ဟု သိရသည်။
” ကော့ကရိတ်တိုက်ပွဲသို့ နေ့စဉ်ရက်ဆက် လက်နက်ကြီးများ၊ ရဟတ်ယာဉ်ပစ်ကူများဖြင့် ထိုးစစ်ဆင်နေသော်လည်း အထိနာနေသော စကစသည် ရှေ့ဆက်မတိုးနိုင်သည့်အပြင် တပ်ဆုတ်နေရသည့်အတွက် ယနေ့တွင်တိုက်လေယာဉ်များပါ အသုံးပြုပြီး ဝေဟင်မှ ဗုံးကြဲ တိုက်ခိုက်နေသည်။ တပ်ဆုတ်ရာတွင် ကျေးရွာများက်ို မီးရှို့ဖျက်ဆီးသွားရန်အမိန့်ပေးထားကြောင်း သိရသည်“ဟု ယမန်နေ့တွင် ကျားဖြူစစ်ကြောင်းက ဖော်ပြထားသည်။
ယမန်နေ့တွင် စစ်ကောင်စီတပ်ဖွဲ့ဝင်များက ကော့နွဲကျေးရွာရှိ နေအိမ်များကို မီးရှို့ဖျက်ဆီးခဲ့ပြီး ၁၀ ရက်ကျော်ကြာလာသည့်ကော့ကရိတ်တိုက်ပွဲတွင်း၌ လက်န က်ကြီးပစ်ခတ်မှု၊ လေကြောင်းမှတိုက်ခိုက်မှုများကြောင့် သံဃာတော်များအပါအဝင် ဒေသခံပြည်သူ ၁၀ ဦးထက်မနည်း ထိခိုက်ဒဏ်ရာရမှုနှင့်သေဆုံးမှုများရှိနေကာ နေအိမ်အဆောက်အဦးများစွာလည်း ပျက်စီးနေသည်ဟု သိရသည်။
