မြင်းခြံမြို့နယ်ရှိ ပျူရွာကို မဟာမိတ်တပ်များ ပူးပေါင်းတိုက်ခိုက်
**************************
ဒီဇင်ဘာ ၂၈၊ ၂၀၂၂။
မန္တလေးတိုင်းဒေသကြီး၊ မြင်းခြံမြို့နယ် ဆုံရွာတွင် တပ်စွဲထားသည့် စစ်ကောင်စီတပ် လက်အောက်ခံ ပျူစောထီးအဖွဲ့ဝင်များကို ယမန်နေ့နံနက် အစောပိုင်း ၁ နာရီခွဲခန့်က မြင်းခြံမဟာမိတ်ပူးပေါင်းတပ်ဖွဲ့ဝင်များ တိုက်ခိုက်ခဲ့ရာ ပျူစောထီးတပ်ဖွဲ့ဝင်တစ်ဦး သေဆုံးခဲ့သည်ဟု သိရသည်။
ထိုကျေးရွာရှိ ပျူစောထီးအဖွဲ့ဝင်များကို စစ်ကောင်စီတပ်က လက်နက်များ တပ်ဆင်ပေးထားပြီး အဆိုပါ ပျုစောထီးအဖွဲ့ဝင်များသည် ထိုလက်နက်များဖြင့် ဆက်ကြေးကောက်လေ့ရှိသောကြောင့် တိုက်ခိုက်ခဲ့ခြင်းဖြစ်ကြောင်း မြင်းခြံခရိုင်တပ်ရင်း ၂ ၏ ပြောရေးဆိုခွင့်ရှိသူက သံလွင်ခက်ကို ပြောသည်။
” ပျူဘက်က တစ်ယောက်သေတယ်၊ ကျန်တာတော့ အတိအကျမသိရသေးဘူး။ သူတို့က အဲဒီ့လက်နက်တွေနဲ့ သူတို့ရွာကို မလာရဘူး မဖြတ်ရဘူးပြောတယ်။ လာရင် ပစ်သတ်မှာဆိုပြီး ခြိမ်းခြောက်မှုတွေရှိတယ် ဆက်ကြေးတောင်းတာတွေရှိတယ် ” ဟုပြောသည်။
တိုက်ပွဲတွင် ဒေသခံကာကွယ်ရေးတပ်ဖွဲ့ဝင် ရဲဘော်တစ်ဦးလည်း ပေါင်တွင် ထိခိုက်ဒဏ်ရာရရှိခဲ့ပြီး အဆိုပါ ဒဏ်ရာအခြေအနေပြင်းထန်သောကြောင့် တပ်ဆုတ်ခဲ့ကြသည်ဟု ၎င်းက ဆက်ပြောသည်။
မဟာမိတ် ရဲဘော်များတပ်ဆုတ်စဉ် ဆုံရွာသို့ နဘူးအိုင်ကျေးရွာက စစ်ကောင်စီတပ်ဖွဲ့ဝင်များ စစ်ကူလာရာ နံနက် ၂ နာရီခန့်တွင် ပင်လယ်ကျေးရွာနှင့် ကန်ရွာကျေးရွာကြား၌ စစ်ကောင်စီတပ်သားများ စီးနှင်လာသည့် ကားကို အဆိုပါ ရဲဘော်များ မိုင်းဆွဲတိုက်ခိုက်ခဲ့ကြောင်း သိရသည်။
မိုင်းဆွဲတိုက်ခိုက်ခဲ့သောကြောင့် စစ်ကောင်စီ၏ ကားပျက်စီးကာ တပ်ဖွဲ့ဝင်အချို့လည်း ထိခိုက်ဒဏ်ရာ ရရှိခဲ့ကြောင်း မြင်းခြံခရိုင်တပ်ရင်း ၂ ၏ ပြောရေးဆိုခွင့်ရှိသူက ပြောသည်။
အဆိုပါ စစ်ဆင်ရေးကို myingyan 21 guerrilla force အပါအဝင် မဟာမိတ် ၇ ဖွဲ့က ပူးပေါင်းလုပ်ဆောင်ခဲ့ခြင်းဖြစ်ကြောင်း သိရသည်။
မြောင်မြို့နယ် ကျောက်ရစ်အထိုင်စခန်းမှ စစ်ကောင်စီတပ်ဖွဲ့ဝင်များသည် မြင်းခြံမြို့နယ် ရွှေဘုံသာကျေးရွာသို့ စစ်ကြောင်းထိုးဝင်ရောက်ချိန် ဒီဇင်ဘာ ၆ ရက်နေ့ကလည်း ဒေသခံကာကွယ်ရေးတပ်ဖွဲ့ဝင်များနှင့် တိုက်ပွဲဖြစ်ပွားပြီး စစ်ကောင်စီတပ်ဖွဲ့ဝင် ခုနှစ်ဦး သေဆုံးခဲ့သည်ဟု သိရသည်။
