စစ်ကိုင်းတိုင်းဒေသကြီး၊ ဒီပဲယင်းအရှေ့ခြမ်းကျေးရွာများသို့ စစ်ကောင်စီတပ်က လက်နက်ကြီးများဖြင့် အကြောင်းမဲ့ပစ်ခတ်တိုက်ခိုက်ခဲ့သည်ဟု ဒေသခံများထံမှသိရသည်။
ယနေ့ ဒီဇင်ဘာလ၁၇ရက်၊ နံနက် ၁၀ နာရီခန့်တွင် ရေဦးမြို့မှ ကားကြီး ၂ စီးဖြင့် ကုက္ကိုစုရွာ သာလေးကျေးရွာဘက်ထွက်လာသော အင်အား ၆၀ ဝန်းကျင်ရှိ စစ်ကောင်စီတပ်ဖွဲ့ဝင်များက ၁၂၀ မမ လက်နက်ကြီးဖြင့် ပစ်ခတ်တိုက်ခိုက်ခဲ့ခြင်းဖြစ်သည်။
” ၇ ချက်အပစ်ခံရတာ ။ ဆက်တိုက်ပစ်တော့ ပထမက ညောင်လှရဲ့မြောက်ဘက်က ဆေးနီးကုန်းလို့ခေါ်တဲ့ သုဿာန်ကိုကျတယ်။ နောက် လေးလုံးက ရွာထဲကိုကျတယ် “ဟု ဒီပဲယင်းမြို့နယ်စစ်ရှောင်ထောက်ပံ့ရေးအဖွဲ့တာဝန်ရှိသူက သံလွင်ခက်ကိုပြောသည်။
လက်နက်ကြီး ကျရောက်ပေါက်ကွဲမှုကြောင့် အသက် ၄၀ အရွယ် ညောင်လှ ဒေသခံအမျိုးသမီးတစ်ဦးခြေထောက်ထိမှန် (လတ်တလော မစိုးရိမ်ရ) ဒဏ်ရာရရှိခဲ့ပြီး အနီးနားရှိ နေအိမ်၅ လုံးခန့်ထိမှန်ပျက်စီးခဲ့သည်ဟုသိရသည်။
လက်နက်ကြီးဖြင့် ပစ်ခတ်တိုက်ခိုက်မှုကြောင့် ဒေသခံ ပြည်သူအများအပြားလည်း ဘေးလွတ်ရာထွက်ပြေးတိမ်းရှောင်ခဲ့ရသည်ဟုသိရသည်။
ဒီပဲယင်းအရှေ့ခြမ်းရှိကျေးရွာများကို စစ်ကောင်စီတပ်များက စစ်ကြောင်းထိုးခြင်းနှင့် လက်နက်ကြီးများပစ်ခတ်ခြင်းတို့ဖြင့် နေအိမ်များစွာကို ဖျက်ဆီးနေသည်။
ယခုလ ဒီဇင်ဘာ၁ရက်မှ ၁၀ရက်အတွင်း စစ်ကောင်စီတပ်များ စစ်ကြောင်းထိုးမီးရှို့ဖျက် ဆီးမှုကြောင့် ဒီပဲယင်းအရှေ့ခြမ်းရှိကျေးရွာ ၁၉ရွာမှနေအိမ် ၁၇၀၀ ကျော်အထိမီးလောင်ပြာကျခဲ့ရပြီး ညောင်လှကျေးရွာ၌လည်းအိမ်ခြေ ၂၀၀ ဝန်းကျင်အထိ မီးလောင်ပျက်စီးခဲ့ရသည်။
” ဒေသခံတွေက ရွာတွေထဲကို ပြန်ကပ်နေကြတာ သိပ်မကြာသေးဘူး။ အခု လက်နက်ကြီးပစ်တော့ထပ်ပြေးကြရတယ် “ဟု ဒီပဲယင်းမြို့နယ် စစ်ရှောင်ထောက်ပံ့ရေးအဖွဲ့တာဝန်ရှိသူက သံလွင်ခက်ကိုပြောသည်။
ယခုလအစောပိုင်း၌ စစ်ကောင်စီတပ်များ၏ ၁၀ရက်ဆ က်တိုက်မီးရှို့ဖျက်ဆီးမှု ကြောင့် အိုးအိမ်မဲ့ဖြစ်သွားသည့်မီးဘေးသင့်စစ်ဘေးရှောင် များသည် ဘုန်းကြီးကျောင်းများနှင့်စာသင် ကျောင်းများတွင် ခိုလှုံနေကြရပြီး စားသောက် ရေးအတွက်ကိုပင် အခက်အခဲများကြုံနေကြရသည်ဟု ကူညီပေးနေသူများထံမှသိရသည်။
ဒီပဲယင်းမြို့နယ်တွင် လက်ရှိအာဏာသိမ်းကာလအတွင်း၌ စစ်ကောင်စီတပ်များ၏ မီးရှို့ဖျက်ဆီးမှုကြောင့် နေအိမ်၃၀၀၀ ကျော်အထိပျက်စီးဆုံးရှုံးထားခဲ့ရသည်ဟု ဒီပဲယင်းညီနောင် များအဖွဲ့ကဖော်ပြထားသည်။
