ကချင်ပြည်နယ်က စစ်ကောင်စီတပ်စခန်း ၁၀ ခုကို တစ်ရက်တည်းမှာပဲ KIA သိမ်းပိုက်
********
ထွယ်
ဇွန် ၁၂၊ ၂၀၂၄။
ကချင်ပြည်နယ်ရှိ စစ်ကောင်စီတပ်၏ စခန်းကြီး တစ်ခုအပါအဝင် ကာကင်းစခန်းနှင့် တပ်စခန်းငယ် စုစုပေါင်း ၁၀ ခု ကို ကချင်လွတ်မြောက်ရေးတပ်မတော် – KIA နှင့် ပူးပေါင်းတပ်က ယမန်နေ့ တစ်နေ့တည်းမှာပင် တိုက်ခိုက်သိမ်း ပိုက်နိုင်ခဲ့သည်ဟု ကချင်လွတ်မြောက်ရေးအဖွဲ့ – KIO ပြန်ကြားရေးတာဝန်ခံ ဗိုလ်မှူးကြီး ဦးနော်ဘူက သံလွင်ခက်ကို ပြောသည်။
ကချင်ပြည်နယ်တွင် ယမန်နေ့ တစ်နေ့တည်းပင် ဝိုင်းမော်မြို့နယ်နှင့် ဆဒုံး – ကန်ပိုက်တီ လမ်းပိုင်းက စစ်ကောင်စီတပ် စခန်းများဖြစ်သည့် ဆဒုံးဗျူဟာကုန်းအပါအဝင် နယ်စပ်ကုန်သွယ်ရေးစခန်းရှိသော ကန်ပိုက်တီမြို့အနီးက လဖိုင်နယ် ခြားစောင့်တပ်စခန်း၊ ဝိုင်းမော် – ဆဒုံးလမ်းပိုင်းက ဘွမ်တောင်ကာကင်းတပ်စခန်းနှင့် ဝိုင်းမော်မြို့နယ် ဝါးရှောင်ကျေးရွာ အထက်က ၁၃ မိုင်စုပေါင်းဂိတ်ကို KIA ပူးပေါင်းတပ်က တိုက်ခိုက်သိမ်းပိုက်ရရှိခဲ့ခြင်းဖြစ်သည်ဟု KIO ပြန်ကြားရေး တာဝန်ခံ ဗိုလ်မှူးကြီး ဦးနော်ဘူက ပြောသည်။
၎င်းက “ဝိုင်းမော် – ကန်ပိုက်တီ – ဆဒုံး လမ်းကြောင်းတစ်လျှောက်က စခန်းအများပိုင်းတော့ မနေ့တုန်းက အားလုံး သိမ်းလိုက်ရှင်းလိုက်ပြီ” ဟု ပြောသည်။
သံလွင်ခက်သတင်းဌာနက ကောက်ယူထားသည့် အချက်အလက်များအရ ကချင်ပြည်နယ်ရှိ စစ်ကောင်စီတပ်စခန်း များကို KIA ပူးပေါင်းတပ်များက တစ်ပြိုင်တည်း ထိုးစစ်ဆင်တိုက်ခိုက်ခဲ့သည့် မတ်လ ၇ ရက်မှ ယနေ့ချိန်ထိ စစ် ကောင်စီ၏တပ်စခန်း ပျမ်းမျှ ၁၀၀ ခန့်ကို KIA နှင့် ပူးပေါင်းတပ်က တိုက်ခိုက်သိမ်းပိုက်ထားသည်။
အဆိုပါ သုံးလတာ ကာလအတွင်း KIA နှင့် ပူးပေါင်းတပ်သည် စစ်ကောင်စီ၏ တပ်စခန်းများကို ပျမ်းမျှ တစ်နေ့လျှင် တပ်စခန်း တစ်ခုခန့် သိမ်းပိုက်လျက်ရှိသည်။
ထို့ပြင် နယ်ခြားစောင့်တပ် – BGF နှင့် ပြည်သူ့စစ်များ တပ်စွဲသည့် နရူကောင် – Na Ru Kawng၊ အင်ဝမ်ယန် – N Wan Yang BGF တပ်စခန်း၊ ခရုန် – Hka Rum ကာကင်း၊ ဘူရော်ဘွမ် – Wu Raw Bum ကာကင်း၊ ကော့နန် – Gaw Nan ကာကင်းနှင့် လုကျီ – Lu Gyi ကာကင်း စခန်းက တပ်ဖွဲ့ဝင်များသည် ၎င်းတို့ကိုယ်တိုင် စခန်းစွန့်ခွာထွက်ပြေး သွားသဖြင့် တပ်စခန်းကို သိမ်းဆည်းရမိခဲ့သည်ဟု KIO ပြန်ကြားရေးတာဝန်ခံက ပြောသည်။
ယမန်နေ့နံနက်ဖြစ်ပွားသည့် တိုက်ပွဲကြောင့် ဝိုင်းမော်မြို့နယ် ဝူယန်ကျေးရွာတွင် ဝူယန်ပြည်သူ့စစ်တပ်ဖွဲ့ဝင်များနှင့် စစ်ကောင်စီတပ်ဖွဲ့ဝင်များက ကားလမ်းများ ပိတ်ထားပြီး ကန်ပိုက်တီအဆင်းကားများကိုလည်း ကန်ပိုက်တီ – ဆဒုံး ကားလမ်းပေါ်ရှိ ပန်ရှန်ကျေးရွာတွင် KIA နှင့် ပူးပေါင်းတပ်က ယနေ့ချိန်ထိ လမ်းပိတ်ထားဆဲဖြစ်သည်ဟု ကားလိုင်းပြေးဆွဲနေသည့် ကားဆရာတစ်ဦးက ပြောသည်။
ကချင်ပြည်နယ် ဝိုင်းမော်မြို့နယ်တွင် စစ်ကောင်စီ၏ ခြေလျင်တပ်ရင်း ခလရ – ၅၈ နှင့် ဝူယန်ပြည်သူ့စစ်စခန်းသာ ကျန်ရှိပြီကာ စစ်ကောင်စီက ဝိုင်းမော်မြို့နယ်ကို လက်မလွှတ်ရရေးအတွက် မြစ်ကြီးနားရှိ မြောက်ပိုင်းတိုင်းစစ်ဌာနချုပ် – မပခ မှ နေ့စဉ် လက်နက်ကြီးများ ပစ်ခတ်နေသည့်အပြင် လေယာဉ်နှင့် ဗုံးကြဲတိုက်ခိုက်မှုနှင့် ဒရုန်းများဖြင့် ဗုံးကြဲတိုက်ခိုက်မှုများကို နေ့စဉ် ပြုလုပ်လျက်ရှိကာ လက်နက်ကိုင် အဖွဲ့အစည်း နှစ်ခုအကြားတွင်လည်း ယနေ့ချိန်ထိ စစ်ရေးတင်းမာလျက်ရှိသည်ဟု KIO ပြန်ကြားရေးတာဝန်ခံက ပြောသည်။
