ကောင်းချစ်အောင်
ဧပြီ ၇၊ ၂၀၂၄။
စစ်ကိုင်းတိုင်း၊ တန့်ဆည်မြို့နယ်မြောက်ခြမ်းကရွာတွေကို စစ်ကောင်စီနဲ့ ပျူစောထီးပြည်သူ့စစ်တပ်ဖွဲ့ဝင်တွေက အင်အားအလုံးအရင်းနဲ့ အခုရက်ပိုင်းအတွင်း စစ်ကြောင်းထိုးနေပါတယ်။ ကန့်ဘလူနဲ့ တန့်ဆည်မြို့နယ်အစပ်က ရွာ ၆ ရွာထက်မနည်းကို စီးနင်းဝင်ရောက်ကာ မီးရှို့ဖျက်ဆီးခဲ့သလို ပြည်သူတွေကို ဖမ်းဆီးသတ်ဖြတ်မှုတွေလည်း လုပ်ဆောင်နေပါတယ်။
မတ်လ ၁၉ ရက်မှာ သာကေတကျေးရွာမှာနေထိုင်တဲ့ အသက် ၅၀ အရွယ် ဦးဇော်ဦး ဆိုသူရဲ့ဗိုက်ခွဲ၊ အူတွေဆွဲနှုတ် ပြီးသတ်ဖြတ်ခဲ့တယ်လို့ ဒေသခံတွေကဆိုပါတယ်။ အဲဒီလို မီးရှို့မှုတွေ၊ သတ်ဖြတ်မှုတွေ ကျူးလွန်နေသူတွေဟာ အမှတ် ၃၆၁ ခြေမြန်တပ်ရင်းနဲ့ ၅၅၀ ဆရာတော် ဦးဝါသဝရဲ့ ကန့်ဘလူပြည်သူ့စစ် သင်တန်းဆင်းအသစ်တွေ ဖြစ် တယ်လို့ သိရပါတယ်။
ခမရ ၃၆၁ တပ်ရင်းဟာ အခုကာလမှသာ စစ်ရာဇဝတ်မှုတွေ ကျူးလွန်တာမျိုးမဟုတ်ဘဲ အရင်ကတည်းက စစ်ကိုင်းတိုင်းအတွင်း လှည့်လည်သွားလာ လုပ်ဆောင်နေတာဖြစ်ပါတယ်။
အမှတ် ၃၆၁ ခြေမြန်တပ်ရင်းဟာ ကလေးမြို့အခြေစိုက် တပ်ရင်းပါ။ မုံရွာမြို့အခြေစိုက် အနောက်မြောက်ပိုင်း တိုင်း စစ်ဌာနချုပ် – နမခ လက်အောက်မှာရှိတဲ့ အမှတ် ၁၀ စစ်ဆင်ရေးကွပ်ကဲမှုဌာနချုပ် ( စကခ-၁၀) ကွပ်ကဲမှု အောက်မှာရှိပါတယ်။ တပ်ရင်းမှူးကတော့ DSA အပတ်စဉ် ၄၇ သင်တန်းဆင်း ဗိုလ်မှူးကျော်နိုင် ဆိုသူ ဖြစ်ပါတယ်။
ကလေးမြို့မှာ ဒေသကွပ်ကဲမှုစစ်ဌာနချုပ်နဲ့ စကခ-၁၀ ဌာနချုပ်နှစ်ခုလက်အောက်ခံ ခြေလျင် ၄ ရင်း၊ ခြေမြန် ၄ ရင်း စုစုပေါင်း ၈ ရင်းအထိ တပ်စွဲထားပါတယ်။ အာဏာသိမ်းမှုအလွန်ကာလမှာ ခမရ ၃၆၁ နဲ့ ခမရ ၃၆၈ တို့ဟာ အထိုင်အဖြစ်မနေရဘဲ စစ်ကိုင်းတိုင်းအတွင်း ရွေ့လျားတပ်ရင်းတွေအဖြစ် စစ်ရေးတာဝန်တွေ ထမ်းဆောင်နေရပါတယ်။
လေကြောင်းကနေပစ်ချပြီး နယ်မြေရှင်းလင်းရေးတွေ လုပ်ဆောင်ရသလို သူတို့ကြောင့် အရပ်သားပြည်သူအများ အပြား အသက်နဲ့နေအိမ်ဆုံးရှုံးမှုတွေ ကြုံတွေ့ခဲ့ရပါတယ်။
၂၀၂၂ ဩဂုတ်လမှာတော့ ခမရ ၃၆၁ ရဲ့ ရက်စက်ကြမ်းကြုတ်မှုတွေကို စတင်မြင်တွေ့လာခဲ့ရပါတယ်။
ရေဦးမြို့နယ်မှာ စစ်ကိုင်း PDF ခရိုင်တပ်ရင်း ၃ အဖွဲ့က ဩဂုတ် ၂၀ ရက်မှာ စစ်ကောင်စီတပ်သား ၄ ယောက်ကို အရှင်ဖမ်းဆီးရမိခဲ့တာပါ။ အဲဒီတပ်သား ၄ ယောက်ဟာ ခမရ ၃၆၁ ကဖြစ်ပြီး မင်းကင်းမြို့နယ်အတွင်း စစ်ကောင်စီက လေယာဉ်နဲ့လာချသွားတဲ့ တပ်သားတွေထဲက ဖြစ်ပါတယ်။
မင်းကင်းမြို့နယ်နဲ့ ရေဦးမြို့နယ်တလျှောက် သူတို့တပ်ရင်းရဲ့ အကြမ်းဖက်မှုတွေကို နားမလည်နိုင်တော့တဲ့ အတွက် ထွက်ပြေးလာရင်း အဖမ်းခံခဲ့ရတာ ဖြစ်ပါတယ်။ သူတို့ရဲ့ထွက်ဆိုချက်အရ ရွာတွေကိုစစ်ကြောင်းထိုးရာ မှာ အမျိုးသမီးတွေကို မုဒိန်းကျင့်မှုတွေလုပ်ဆောင်ခဲ့တယ်လို့ သိရပါတယ်။ PDF အမျိုးသမီးရဲဘော် ၃၀ ကို အုပ်ချုပ်နေတဲ့ အမျိုးသမီးခေါင်းဆောင် ၁ ဦးကိုလည်း မုဒိန်းကျင့်သတ်ဖြတ်ခဲ့တယ်လို့ ဝန်ခံထားပါတယ်။
၂၀၂၃ နှစ်ဆန်းပိုင်းမှာ အစုလိုက်အပြုံလိုက် သတ်ဖြတ်မှုတွေကျူးလွန်ခဲ့တဲ့ တပ်မ ၇၇ လက်အောက်ခံ ဘီလူးစစ် ကြောင်းလိုပဲ ခမရ ၃၆၁ နဲ့ ခမရ ၃၆၈ တပ်ရင်းတွေဟာလည်း ၂၀၂၃ မေလ တတိယအပတ်အတွင်း ကန့်ဘလူမြို့ နယ်ထဲက ကျေးရွာ ၁၅ ရွာထက်မနည်းကို မီးရှို့ပစ်ခဲ့တာပါ။
အခုနှစ် ဖေဖော်ဝါရီ ၂၁ ရက်ကနေ မတ်လ ၁ ရက်အတွင်း တန့်ဆည်မြို့နယ်၊ အနောက်ပိုင်းကျေးရွာတွေမှာ အရပ်သား ၁၁ ဦးကို အပိုင်းပိုင်းဖြတ်၊ ခုတ်ထစ်သတ်ဖြတ်ခဲ့တယ်လို့ တန့်ဆည်မြို့နယ်ပြည်သူ့အုပ်ချုပ်ရေးအဖွဲ့ (တန့်ဆည်-ပအဖ) က မတ်လ ၄ ရက်မှာ ထုတ်ပြန်လာပါတယ်။ အဲဒီသတ်ဖြတ်မှုတွေအတွက် ခမရ- ၃၆၁ အပြင် ခမရ – ၁၁၊ ခမရ – ၇၀၈နဲ့ ပျူစောထီးတွေမှာ အဓိကတာဝန်ရှိတယ်လို့ဆိုထားပါတယ်။
သတ်ဖြတ်ခံရသူတွေအနက် ၁ ဦးသာ သေနတ်နဲ့ပစ်သတ်ခံခဲ့ရပြီး မသေမချင်း မီးရှို့သတ်ဖြတ်ခံရသူတွေလည်း ပါဝင်ခဲ့ပါတယ်။ ဦးခေါင်း၊ လိင်အင်္ဂါနဲ့ခြေလက်တွေကိုဖြတ်ပြီး အလောင်းတွေကို အပြောင်အပျက်ပုံစံမျိုး ပြုလုပ်ခဲ့ ကြတယ်လို့လည်း ဆိုပါတယ်။
အင်အား ၂၀၀ ဝန်းကျင်ပါဝင်တဲ့ ခမရ – ၃၆၁ နဲ့ ပျူစောထီးပူးပေါင်းစစ်ကြောင်းဟာ မတ်လ ၁၄ ရက်မှာ ကန့်ဘလူ မြို့နယ် ပေကြီးရွာကိုရောက်လာပြီး နယ်မြေရှင်းလင်းရေး ထပ်မံလုပ်ဆောင်ခဲ့ပါတယ်။ ရွာထဲမှာ အမျိုးသား ၁ ဦး ကို ခေါင်းဖြတ်သတ်ခဲ့ပြီး ပေကြီးရွာကနေ ငှက်ပျောတိုင်းရွာဘက်သွားတဲ့လမ်းမှာလည်း နောက်ထပ်အမျိုးသား ၁ ဦးကို ဖမ်းဆီးသတ်ဖြတ်ခဲ့ပါတယ်။
အသတ်ခံရတဲ့ အမျိုးသား ၂ ဦးဟာ ပေကြီးရွာခံတွေဖြစ်ကြတဲ့ ကိုမျိုးမျိုးသိန်းနဲ့ ကိုခင်မောင်ဦးတို့ ဖြစ်ကြတယ်လို့ ဆိုပါတယ်။ သူတို့၂ ဦးဟာ ရွာမှာပစ္စည်းလာသယ်ရင်း ဖမ်းဆီးအသတ်ခံခဲ့ရတာပါ။
အဲဒီစစ်ကြောင်းဟာ တန့်ဆည်မြို့နယ် မြောက်ခြမ်းကရွာတွေကိုလည်း ဆက်လက် စစ်ကြောင်းထိုးခဲ့ပါတယ်။ မြောက်အင်း၊ ညောင်လေးပင်၊ အိုးသည်ကုန်း၊ တုတ်တလုပ်၊ ညံသာ၊ သာကေတ စတဲ့ ရွာ ၆ ရွာမှာ အိမ်ခြေ ၁၀၀ ထက်မနည်း မီးလောင်ပြာကျခဲ့ရပါတယ်။
မြောက်အင်းကျေးရွာမီးရှို့ခံရချိန်မှာ ကျန်းမာရေးကြောင့် မတိမ်းရှောင်နိုင်ခဲ့တဲ့ အသက် ၄၂ နှစ်အရွယ် ဒေါ်အေးတီ နေအိမ်အတွင်းသေဆုံးခဲ့ပြီး သာကေတရွာသား အသက် ၅၀ အရွယ် ဦးဇော်ဦးမှာလည်း နှိပ်စက်အသတ်ခံထား ရတယ်လို့ ဆိုပါတယ်။ အလောင်းကိုတွေ့ရှိချိန်မှာ ရင်ဘတ်ကနေ ဗိုက်အထိ အခွဲခံထားရပြီး ခေါင်းလှီးဖြတ် ထားတဲ့ ဓားဒဏ်ရာကိုလည်း တွေ့ခဲ့ရပါတယ်။
ခမရ- ၃၆၁ ကျူးလွန်ခဲ့တဲ့ စစ်ရာဇဝတ်မှုတွေကို NUG လူ့အခွင့်အရေးဝန်ကြီး ဌာနက မှတ်တမ်းတင်ထားပြီး အပြစ်ပေးအရေးယူနိုင်ရေး အစွမ်းကုန်တာဝန်ယူဆောင်ရွက်သွားမယ်လို့ ထုတ်ပြန်ထားပါတယ်။
အာဏာမသိမ်းခင်က စစ်တပ်အတွက် အဓိကတပ်သားသစ်အရင်းအမြစ်ဖြစ်ခဲ့တဲ့ စစ်ကိုင်းတိုင်းလို အညာဒေသရဲ့ လက်နက်ကိုင်ခုခံတော်လှန်မှုကို အာဏာ သိမ်းစစ်ခေါင်းဆောင်တွေဟာ မကြုံစဖူးရင်ဆိုင်နေရပါတယ်။
ခုခံမှုလျော့ကျသွားအောင် ရွာလုံးကျွတ်မီးရှို့မှုတွေ၊ သတ်ဖြတ်မှုတွေကို ပြုလုပ်ခဲ့ပြီး အကြောက်တရားရိုက်သွင်းခဲ့ ပေမယ့် သူတို့မျှော်မှန်းထားသလိုဖြစ်မလာဘဲ တော်လှန်မှုက ဆက်လက်အားကောင်းနေဆဲပါပဲ။
