လူထုအခြေပြု အစိုးရပေါ်ပေါက်ရေးအတွက် TNLA အဆင့်ဆင့်ဆောင်ရွက်သွားမည်

လူထုအခြေပြု အစိုးရပေါ်ပေါက်ရေးအတွက် TNLA အဆင့်ဆင့်ဆောင်ရွက်သွားမည်

***********************************

ယမင်းဖူးပွင့်အောင်

ဖေဖော်ဝါရီ ၂၃၊ ၂၀၂၄။

ရှမ်းပြည်နယ်မြောက်ပိုင်းတွင် တအာင်းအမျိုးသားလွတ်မြောက်ရေးတပ်မတော် – TNLA က လူထုဆန္ဒအခြေခံသည့် လူထုအုပ်ချုပ်မှု အစိုးရပေါ်ပေါက်လာရန် ရွေးကောက်ပွဲမဟုတ်သည့်တိုင်အောင် အဆင့်ဆင့်ဆောင်ရွက်သွားမည်ဖြစ်သည်ဟု TNLA နှင့် နီးစပ်သူများထံက သိရသည်။

၁၀၂၇ စစ်ဆင်ရေးအတွင်း TNLA က သိမ်းပိုက်ထားသည့် မြို့ကြီး ၇ မြို့အပါအဝင် TNLA တပ်မတော်အခြေစိုက်ထားသော နယ်မြေဒေသများတွင် လုံခြုံရေး၊ တရားဥပဒေစိုးမိုးရေး၊ ပညာရေး၊ ကျန်းမာရေးနှင့် လူမှုဘဝဖွံ့ဖြိုးရေးကိစ္စရပ်များ ပိုမိုတိုးတက်ကောင်းမွန်လာစေရန် ဦးဆောင်စီမံအုပ်ချုပ်သွားမည်ဖြစ်ပြီး လာမည့် ၂၀၂၅ ခုနှစ်တွင် လူထုဆန္ဒအခြေခံသည့် လူထုအုပ်ချုပ်မှုအစိုးရပေါ်ပေါက်လာရန် ကြိုးစားသွားမည်ဟု TNLA က ဖေဖော်ဝါရီ ၂၂ ရက်တွင် ထုတ်ပြန်သည်။

အစိုးရဖွဲ့စည်းရေးအတွက် ကျေးရွာအုပ်ချုပ်ရေးမှူး၊ မြို့နယ်အုပ်ချုပ်ရေးမှူးများမှ ခရိုင်အဆင့်အထိ တဆင့်ချင်းဆောင်ရွက်သွားမည်ဖြစ်ပြီး တအာင်းလူမျိုးအပြင် အခြားလူမျိုးများပါဝင်လာရန်လည်း လုပ်ဆောင်သွားမည်ဟု TNLA နှင့် စစ်ရေးနီးစပ်သူ ၁ ဦးက ဆိုသည်။

၎င်းက “ တချို့နေရာတွေက သမိုင်းအစဉ်အလာအရ အတူယှဉ်တွဲနေထိုင်ခဲ့တဲ့လူမျိုးတွေရှိမယ်။ စစ်အာဏာ ရှင်လက်အောက်ပြန်မသွားရဖို့ လူမျိုး ၁ မျိူးထဲနဲ့အုပ် ချုပ်လို့မရဘူးဆိုတာ တအာင်းနိုင်ငံရေးအသိုင်းအဝိုင်းက နားလည်တယ်” ဟု ဆိုသည်။

တအာင်းနယ်မြေအတွင်း ပဋိပက္ခအခင်းအကျင်းများကို ရှောင်လွှဲနိုင်ရန် လိုအပ်သည်ဟုလည်း ၎င်းက ဆက်လက်ပြောဆိုသည်။

TNLA နှင့် စစ်ရေးနီးစပ်သူ ၁ ဦးက “လူမျိူးရေး ပဋိပက္ခရှောင်လွှဲဖို့ဆိုရင် မိမိလူမျိုးကိုသာ မိမိတပ်သားသစ်စုဆောင်းရမယ်။ မိမိတို့လှုပ်ရှားရာနယ်မြေအတွင်း သီး သန့်လှုပ်ရှားကြမယ်ဆိုရင် လူမျိူးရေးပဋိပက္ခရော၊ လက်နက်ကိုင်ပဋိပက္ခရော ရှောင်ရှားနိုင်မယ်လို့ ရှုမြင်ပါတယ်” ဟုဆိုသည်။

TNLA ထိပ်ပိုင်းခေါင်းဆောင်များ လူထုတွေ့ဆုံပွဲပြုလုပ်သည့်အချိန်တွင် ရပ်မိရပ်ဖများက TNLA ထိန်းချုပ်နယ်မြေအတွင်း အခြားတိုင်းရင်းသားလက်နက်ကိုင်တပ်ဖွဲ့များ ဝင်ရောက်၍ တပ်သားစုဆောင်းခြင်းကို ကာကွယ်ပေးနိုင်ရန် မျှော်လင့်သည်ဟု ပြောဆိုမှုများလည်းရှိသည်။

ရှမ်းလူမျိုး ၁ ဦးအနေဖြင့် TNLA ထိန်းချုပ်နယ်မြေများတွင် တိုင်းရင်းသားတိုင်းကို တန်းတူညီမျှမှုပေးရန် တောင်းဆိုလိုပြီး တိုက်ပွဲများဖြစ်ပွားလာမည်ကိုလည်း စိုးရိမ်မိသည်ဟု မူဆယ်ဒေသခံ ရှမ်းအမျိုးသား ၁ဦးက ဆိုသည်။

၎င်းက“ ရှမ်းမြောက်မှာက SSPP ရော TNLA ရော KIA ရော တပ်သားသစ်တွေအတင်းစုဆောင်းနေကြပြီ။ အားမရတာထက် ကောင်းရင်တော့ လက်ခံပေးလို့ရတယ်။ ဒီဘက်မှာလည်း SSPP က သူ့ထိန်းချုပ်မှုနယ်မြေလို့ သတ် မှတ်နေတုန်း။ တိုက်ပွဲတွေဖြစ်လာမှာကိုပဲ ကြောက်နေရတာ။ သူတို့ လူထုအုပ်ချုပ်ရေး ဘယ်လိုလာမလဲ။ ဘယ်ပုံစံနဲ့အုပ်ချုပ်မလဲဆိုတာတော့ စောင့်ကြည့်ရမှာပေါ့” ဟုဆိုသည်။

တအာင်းဒေသအတွင်း အခြားလူမျိုးအဖွဲ့အစည်းများက အတင်းအဓမ္မ တပ်သားသစ်စုဆောင်းခြင်း၊ အခွန်ကောက်ခံခြင်း၊ TNLA ၏ လူထုစီမံအုပ်ချုပ်ရေးလုပ်ငန်းများကို ဝင်ရောက်စွက်ဖက်နှောင့်ယှက်ခြင်းများ မပြုနိုင်အောင် လူမျိုးစုံမိဘပြည်သူများနှင့်အတူတကွ လက်တွဲကာကွယ်သွားမည်ဟုလည်း TNLA၏ထုတ်ပြန်ချက်တွင် ဖော်ပြထားသည်။

၂၀၂၃ ခုနှစ်၊ အောက်တိုဘာ ၂၇ ရက်တွင် စတင်ခဲ့သည့် ၁၀၂၇ စစ်ဆင်ရေးအတွင်း TNLA က ရှမ်းမြောက်ရှိ နမ့်ခမ်းမြို့၊ နမ့်ဆန်မြို့၊ မန်တုံမြို့၊ မိုင်းလုံမြို့၊ နမ္မတူမြို့၊  မိုင်းငေါ့မြို့နှင့် ကွတ်ခိုင်မြို့များကို သိမ်းပိုက်ထားနိုင်ခဲ့ပြီး အုပ်ချုပ်ရေးယန္တရားများ ဆက်လက်ဖော်ဆောင်လျက်ရှိသည်။

ဓာတ်ပုံ – PSLF\TNLA

************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – > https://t.me/newstlk/3487

YouTube – > https://youtu.be/eEaLA1Cu5r0

Website – >  https://thanlwinkhet.net/?p=7855