ကောလင်းကို စစ်ကောင်စီပြန်ထိန်းချုပ်ပြီးတစ်မြို့လုံးနီးပါး မီးရှို့ဖျက်ဆီး
****************************
သံလွင်ခက်
ဖေဖော်ဝါရီ ၂၄ ၊ ၂၀၂၄ ။
စစ်ကောင်စီတပ်များ၏ ထိန်းချုပ်မှုအောက်ပြန်ရောက်ရှိသွားသည့် ကာလင်းမြို့သည် ၈၀ ရာခိုင်းနှုန်းခန့်ပျက်စီးသွားပြီးဖြစ်သည်ဟု ဒေသခံများထံကသိရသည်။
ကောလင်းမြို့ကို စစ်ကောင်စီတပ်က ပြန်လည်ထိန်းချုပ်ခဲ့သည့် ၁၀ ရက်ကျော်အတွင်း မီးရှို့ဖျက်ဆီးမှုများဆက်တိုက်ပြုလုပ်နေခဲ့ရာ ပျက်စီးသွားသည့် မြို့၏ ၈၀ ရာခိုင်းနှုန်းခန့်သည် အကုန်နီးပါးပြာကျနေပြီဖြစ်သည်။
” မီးလောင်တဲ့ရပ်ကွက်က မြိုပေါ် (8) ရပ်ကွက်အကုန်လောင်ပါတယ် ကံကောင်းပြီးကျန်ရင်နည်းနည်းပါ။
ပြီးတော့ မြို့နားကပ်တဲ့ရွာတွေဖြစ်တဲ့ ကျွန်းလှခုံ၊ခွင့်တောင်း၊လက္ပံကွေ့၊ကျူတော၊ရွာမ၊စံတော်ရာကုန်း၊ဆေးမင်းခုံ၊ဆိုင်ဒူး၊ဝါးရုံခုံ၊ ဇီးခုံ သည်ရွာတွေဟာ မီးလောင်ထားတဲ့ရွာတွေပါ “ဟု ကောလင်း KR-Teams က ယမန်နေ့ညပိုင်း၌ ဖော်ပြထားသည်။
ကောလင်းမြို့သတင်းများကို မပြတ်အသိပေးနေသည့် KR-Teams ၏ ဖော်ပြချက်အရ စစ်ကောင်စီတပ်များသည် ၎င်းတို့ထိန်းချုပ်လိုက်သည့် ဖေဖော်ဝါရီ ၁၂ ရက်မှစပြီး မြို့ပေါ် ၈ ရပ်ကွက်ကို မီးရှို့ဖျက်ဆီးသည့်အပြင် ခံစစ်ကိုလည်းအခိုင်အမာတည်ဆောက်ထား
သည်ဟု သိရသည် ။
” မြို့ကိုခံစစ်ပြင်တယ်။အခိုင်အမာရှိတဲ့အထပ်မြင့်တိုက်တွေကို အမာခံယူပြီး သူတို့ယူထားတဲ့နေရာတွေကိုမြင်ကွင်းဖုံးနေတဲ့ နေရာတွေကိုအကုန် ဖျက်ဆီးတယ်။ သူတို့ကိုပြန်လာတိုက်ရင် တိုက်ရတာခက်ခဲသွားအောင်သူတို့ခံစစ်ကို ထိပါးလာမယ့် အရာမှန်သမျှအကုန်ဖြိုချဖျက်ဆီးနေတယ် “ဟု KR-Teams ကဖော်ပြထားသည်။
စစ်ရေးအရအရေးပါပြီး ခရိုင်မြို့ကြီးတစ်ခုဖြစ်သော ကောလင်းမြို့ကို ပြီးခဲ့သည့် နိုဝင်ဘာလ ၆ ရက်တွင် ပြည်သူ့ကာကွယ်ရေးပူးပေါင်းတပ်များက ပိုက်သိမ်းခဲ့ရာ စစ်ကောင်စီက ယခုဖေဖော်ဝါရီ ၃ ရက်တွင် ဝေဟင်၊ မြေပြင်တို့မှ အင်အားအလုံးအရင်းဖြင့် ထိုးစစ်ဆင်ခဲ့သည်။
မြို့၏တောင်ဘက်တွင် အင်အား ၅၀၀ နီးပါးရှိ စစ်ကြောင်းများ နှင့် မြို့၏မြောက်တွင် အင်အား ၃၀၀ ကျော်ရှိ စစ်ကြောင်းများအပြင် လက်နက်ကြီးပစ်ကူ၊ လေကြောင်းပစ်ကူများစွာဖြင့် ထိုးစစ်ဆင်ခဲ့ခြင်းဖြစ်သည်။
စစ်ကောင်စီတပ်များသည် ၁၀ ရက်အကြာ ထိုးစစ်ဆင်၍ မြို့ကိုသိမ်းပိုက်ပြီးနောက် မီးရှို့ဖျက်ဆီးမှုများဆက်တိုက်ပြုလုပ်နေခဲ့သည်ဟု ဒေသခံကာကွယ်ရေး ရဲဘော်တစ်ဦးက ပြောသည်။
၎င်းက ” စရှို့တဲ့နေ့က အဲ့အနီးမှာ ကျွန်တော်ရှိတယ်ဗျ။ အနားတော့ ကပ်မရဘူး ဟောင်ဝစ်ဇာနဲ့ တောက်ရှောက်ပစ်ခတ်နေတာ “ဟု ပြောသည်။
ကောလင်းမြို့ကို စစ်ကောင်စီက အင်အားအလုံးအရင်းဖြင့် ပြန်လည်ထိုးစစ်ဆင်လာခဲ့သောကြောင့် ဖေဖော်ဝါရီလ ၁ ရက်မှစပြီး ကောလင်းမြို့အနီးဝန်းကျင်နှင့် ကောလင်းမြို့အပါအဝင် ရွာပေါင်း ၂၀ ကျော်မှ ဒေသခံ ၂၅၀၀၀ ခန့်ထိ စစ်ရှောင်နေကြရသည်ဟု KR-Teams ကဖော်ပြထားသည်။
” ကောလင်းကနေ စစ်ရှောင်လာတဲ့ အမျိုးသားတစ်ယောက် ဒီနေ့ကသာမြို့မှာ အဖမ်းခံလိုက်ရတယ် “ဟု
ကသာမြို့ခံတစ်ဦးက ယမန်နေ့ညပိုင်းတွင်ပြောသည်။
ကောလင်းမှ စစ်ရှောင်နေရသည့်ပြည်သူများသည် ဖမ်းဆီးခံရမှုများကြုံနေရသလို လမ်းကြောပိတ်ဆို့မှုများကြောင့်လည်း စားနပ်ရိက္ခာအခက်အခက်အခဲများရှိနေသည်ဟု ဒေသခံများနှင့် စစ်ရှောင်ကူညီပေးနေသူများထံက သိရသည်။
************
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/3489
YouTube – > https://youtu.be/eEaLA1Cu5r0
Website – > https://thanlwinkhet.net/?p=7876
