ကယန်းဖိုက်တာ ဘရော်နီကာ ထိုင်းဘုရင့်ဖလားချန်ပီယံ နှစ်နှစ်ဆက်ဖြစ်

ကယန်းဖိုက်တာ ဘရော်နီကာ ထိုင်းဘုရင့်ဖလားချန်ပီယံ နှစ်နှစ်ဆက်ဖြစ်

*******************************

သံလွင်ခက်

ဒီဇင်ဘာ ၂၆ ၊ ၂၀၂၃ ။

အိမ်ရှင် ထိုင်းနာမည်ကြီးဖိုက်တာ ဖရာဆင်းကို ပထမအချီမှာပင် ဒိုင်ပွဲရပ်ဖြင့်အနိုင်ယူပြီး ထိုင်းဘုရင့်ဖလား ချန်ပီယံဆုကို ကယန်းလက်ဝှေ့မယ် ဘရော်နီကာက

နှစ်နှစ်ဆက်တိုက် ရယူနိုင်ခဲ့သည် ။

ယမန်နေ့ ဒီဇင်ဘာ ၂၄ ရက် ညပိုင်းတွင် ထိုင်းနိုင်ငံ၊ အယုဒ္ဓယမြို့၌ ကျင်းပခဲ့သည့် ထိုင်းဘုရင့်ဖလား မွေထိုင်းချန်ပီယံ ၅၄ ကီလိုတန်း  ဗိုလ်လုပွဲအဖြစ် ဘရော်နီကာက ပြိုင်ဘက်ဟောင်း ဖရာဆင်းနှင့် ယှဥ်ပြိုင်ခဲ့ခြင်း ဖြစ်သည်။

ပထမပွဲစဥ်တွင်အမှတ်ဖြင့် ရှုံးနိမ့်ထားခဲ့သည့် ဖရာဆင်းသည် ယခုပွဲစဥ်၌ ပွဲစသည်နှင့် ဘရော်နီကာကို လက်သီး ဘယ်၊ညာ တွဲလုံး ၊ ခြေကန်ချက်များဖြင့် တိုက်စစ်ဆင်ခဲ့သည်။

ဖရာဆင်း၏ အားပါသည့် ဘယ်လက်သီးတစ်ချက် ဘရော်နီကာ၏ မေးအောက်ဘက်ကိုချော်ခဲ့သဖြင့် ဘရော်နီကာ ကံကောင်းခဲ့သလို ဘရော်နီကာ၏ ညာခြေကန်ချက်ကိုလည်း ဖရာဆင်းက လက်ဖြင့်ဖမ်းထိန်းထားပြီး ကျန်ခြေတစ်ဖက်ကို ဝှိုက်သိမ်းကန်ခဲ့ရာမှာ ဘရော်နီကာလှဲကျခဲ့ရသည်။

ပွဲစစချင်း စက္ကန့်ပိုင်းအတွင်း၌ ဖြစ်ပျက်သွားသည့် အခြေအနေများကြောင့် ဘရော်နီကာသည် ဖရာဆင်းအတင်းဝင် အတင်းထိုးသလို လိုက်မထိုးတော့ဘဲ သူအားသာသည့် ဘယ်ညာ ထောက်လက်သီး ၊ ထောက်ခြေများကို အသုံးပြီး တိုက်ခိုက်ခဲ့သည်။

ဘရော်နီကာ၏ တိုက်ကွက်ပြောင်းသည့်နည်းစနစ်က မှန်ကန်ခဲ့ပြီး ဘယ်၊ညာ လက်သီးတွဲလုံးများနှင့် ဗိုက်ကိုနင်းကန်ခဲ့သည့်ထောက်ခြေတို့က ထိချက်မပိုင်ခဲ့သော်လည်း ဖရာဆင်း ဟန်ချက်ပျက်သည့် အနေအထားအထိ ဖြစ်ခဲ့ရသည်။

သို့သော် ဖရာဆင်းက ချက်ချင်းဆိုသလို လက်သီးဖြင့် ဟန်ရေးပြပြီး ထိုးဖို့ပြင်နေချိန်တွင် ဘရော်နီကာ၏ ထောက်အားပြင်းသည့် ဘယ်ခြေနင်းချက်က မေးကိုထိမှန်၍ ဖရာဆင်းလှဲကျခဲ့သည် ။

ထို့ကြောင့် ဖရာဆင်းအမှတ်စဥ်ရည်တွက်ခံရပြီး အမှတ် စဥ် ၈ လောက်ထိ ကောင်းကောင်းမရပ်နိုင်သေးသော်လည်း ဒိုင်က ပွဲပြန်တည်ပေးခဲ့သည်။

ပွဲပြန်အတည်တွင် ဘရော်နီကာ၏ ညာခြေ ဝှိုက်ကန်ချက်၊ ဘယ်ခြေထောက်ကန်ချက်တို့ကြောင့် ဖရာဆင်း ကြိုးဝိုင်းဘေးအထိထိုးကပ်သွားပြီး ဟန်ချက်ပျက်နေချိန် ဘရော်နီကာက ဘယ်၊ညာ လက်သီး၊ တံတောင်တွဲလုံးများအပြင် ဒူးဖြင့်ပါ အဆက်မပြတ်ထိုးသတ်ခဲ့သည်။

၅ စက္ကန့်လောက်အတွင်း ဘရော်နီကာ၏ ၁၅ ချက်မနည်းရှိသည့် တွဲလုံးအစုံထိုးသတ်မှုများကြောင့် ဒိုင်ကအတင်းဝင်တားပြီး ပွဲကိုရပ်ခဲ့သဖြင့် ပထမအချီ ၁ မိနစ်နှင့် ၁၄ စက္ကန့်အတွင်းမှာပင် ဘရော်နီကာအနိုင်ရရှိခဲ့သည် ။

မြန်မာ့ရိုးရာလက်ဝှေ့ ချန်ပီယံတစ်ဦးဖြစ်သည့် ကယန်းလက်ဝှေ့မယ် ဘရော်နီကာသည် အာဏာသိမ်းကာလတွင် မွေထိုင်းဘက်ကူးပြောင်းလေ့ကျင့်ပြီးနောက် ၂၀၂၂ ခုနှစ်၊ ဇန်နဝါရီလတွင် စတင်ထိုးသတ်ခဲ့သည့် ပထမဆုံး ပွဲစဥ်တစ်ပွဲသာရှုံးနိမ့်သည်။

ပြီးခဲ့သော၂၀၂၂ ခုနှစ်စပိုင်းမှ ယခု၂၀၂၃ နှစ်ကုန်ပိုင်းထိ ဘရော်နီကာသည် ထိုင်းအပါအဝင် နိုင်ငံတကာ နာမည်ကြီး ဖိုက်တာများနှင့် မွေထိုင်း ၁၇ ပွဲ ယှဥ်ပြိုင်ထိုးသတ်ထားခဲ့ပြီး ၁၆ ပွဲဆက် ရှုံးပွဲမရှိမှတ်တမ်းကို ရယူထားနိုင်ခဲ့သည်။

******

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – > https://t.me/newstlk/2783

YouTube – > https://youtu.be/LsSx5mAIttA?si=cQ389gohgAYNfmVR

Website – >  https://thanlwinkhet.net/?p=6689