ရမ်းဗြဲတွင် စစ်ကောင်စီက လက်နက်ကြီးများရမ်းသမ်းပစ်ခတ်နေ

ရမ်းဗြဲတွင် စစ်ကောင်စီက လက်နက်ကြီးများရမ်းသမ်းပစ်ခတ်နေ

********************

မိခိုင်

ဒီဇင်ဘာ ၂၂၊ ၂၀၂၃။

ရခိုင်ပြည်နယ်၊ ရမ်းဗြဲမြို့တွင် စစ်ကောင်စီက လက်နက်ကြီးများဖြင့် ရမ်းသမ်းပစ်ခတ်နေကြောင်း ရက္ခိုင့်တပ်တော် –  AA က ထုတ်ပြန်သည်။

ရမ်းဗြဲတွင် ဒီဇင်ဘာလ ၁၈ ရက်ကစတင်၍ ရက္ခိုင့်တပ်တော် – AA နှင့် စစ်ကောင်စီတပ်တို့ မြို့မစျေးကြီးအနီးတွင် ထိတွေ့တိုက်ပွဲဖြစ်ပွားခဲ့သည့်အပြင် စစ်ကောင်စီဘက်က ရမ်းသမ်းပစ်ခတ်မှုများရှိနေပြီး ယမန်နေ့ ဒီဇင်ဘာ ၂၁ ရက်၊ မနက် ၉ နာရီခန့်တွင်လည်း ပစ်ခတ်မှုဖြစ်ပွားခဲ့ကြောင်း သိရသည်။

ရက္ခိုင့်တပ်တော် –  AA ၏ ထုတ်ပြန်ချက်တွင်လည်း ” ယမန်နေ့ နံနက် ၉ နာရီ ၁၉ မိနစ်အချိန်တွင် ရမ်းဗြဲမြို့နယ်၊ သရက်တောကျေးရွာ၏ အရှေ့မြောက်ဘက် မီတာ ၁၀,၀၀၀ ကျော်အကွာအဝေး၌ရှိသော စစ်ကောင်စီတပ်စခန်းက လက်နက်ကြီးများဖြင့် အကြိမ် ၂၀ တိုင်တိုင် ၃ နာရီကျော်နီးပါး ရမ်းကားပစ်ခတ်ခဲ့သကဲ့သို့ နေ့လယ် ၁ နာရီအချိန်ခန့်ကလည်း အဆိုပါစခန်းကပင် ရမ်းဗြဲမြို့နယ်၊ ကြက်သရေ‌ကျေးရွာ၏ အနောက်မြောက်ဘက် တောင်ကုန်းဘက်ကို လက်နက်ကြီးများဖြင့် ၈ ကြိမ်တိုင် ပစ်ခတ်ခဲ့သည်” ဟု ဖော်ပြထားသည်။

ထို့ပြင် ညနေ ၅ နာရီကျော်တွင်လည်း ရမ်းဗြဲမြို့၏ အနောက်ဘက်တောင်ကုန်းနှင့် သရက်တော‌ကျေးရွာ၏ အရှေ့မြောက်ဘက်ရှိ စစ်ကောင်စီစခန်းက ၆၀ မမ လက်နက်ကြီးဖြင့် ၁၃ ကြိမ်ထိ ပစ်ခတ်ခဲ့ကြောင်း သိရသည်။

” ကြက်သရေကျေးရွာနှင့် အနီးအနားတောင်ကုန်းများသို့ ၁ နာရီခွဲနီးပါးကြာမြင့်သည်အထိ အဆက်မပြတ် ပစ်ခတ်တိုက်ခိုက်ခဲ့သည့်အပြင် ကလိန်တောင်မြစ်ရှိ စစ်ကောင်စီ၏ ဇက်ရေယာဉ်ကလည်း မြို့ပေါ်ရပ်ကွက်များနှင့် အနီးအနား‌ ကျေးရွာများကို လက်နက်ကြီးများဖြင့် စုပြုံပစ်ခတ်ခဲ့သည် “ဟု ရက္ခိုင့်တပ်တော် –  AA ကဆိုသည်။

လက်ရှိတွင် ရမ်း​ဗြဲဒေသခံများအနေဖြင့် မြို့ကိုစွန့်ခွာပြီး နီးစပ်ရာကျေးရွာများတွင် ခိုလှုံနေကြရပြီး ရမ်း​ဗြဲဒေသခံ ၁ ဦးကလည်း” မြို့ပေါ်မှာ လူ ၅၀ လောက်ပဲ ကျန်ခဲ့တယ်။ အိမ်စောင့်လောက်ပဲ ကျန်ခဲ့တာပါ။ ဘေးလွတ်ရာကို ထွက်ပြေးနေရတယ်။ အဖမ်းခံရမှာ စိုးရိမ်တယ်။ အခုကတော့ ​မြို့ပေါ်မှာ လူတွေ သိပ်မကျန်တော့ပါဘူး ” ဟု သံလွင်ခက် ကို ပြောသည်။

စစ်ကောင်စီတပ်များသည် အမ်းမြို့နယ်တွင်လည်း ကဇုကိုင်း‌ကျေးရွာ၏ အရှေ့မြောက်ဘက် မီတာ ၁,၄၀၀ ကျော်အကွာအဝေး၌ရှိသော စစ်ကောင်စီအခြေစိုက်စခန်းတစ်ခုဖြစ်သည့် “ခမရ – ၅၄၃ တပ်ရင်းက အမ်းမြို့နယ်၊ စွိချောင်းကျေးရွာနှင့် ဆင်ဦးတိုက်‌ကျေးရွာများဘက်ကို ၈၁ မမ၊ ၁၂၀ မမ လက်နက်ကြီးများဖြင့် အကြိမ် ၂၀ ထက်မနည်း အဆက်မပြတ်ပစ်ခတ်တိုက်ခိုက်ခဲ့သည့်အပြင် ဂျက်တိုက်လေယာဉ်ပေါ်ကလည်း စစ်သေနတ်များဖြင့် ပစ်ခတ်ပြီး ဗုံးကြဲတိုက်ခိုက်ခဲ့သည်ဟု သိရသည်။

ဓာတ်ပုံ – လူမှုကွန်ယက်

ပုံစာ – ရမ်းဗြဲ မြို့ရှိ စစ်ကောင်စီတပ်သားများအား တွေ့ရစဥ်။

******

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – > https://t.me/newstlk/2781

YouTube – > https://youtu.be/LsSx5mAIttA?si=cQ389gohgAYNfmVR

Website – >  https://thanlwinkhet.net/?p=6685