Saw Smith
ဧပြီ ၂၁ ၊ ၂၀၂၃ ။
ကရင်နီပြည် ဒီးမော့ဆိုအရှေ့ခြမ်းတွင် ယခုလတတိယအပတ်တွင်း၌ ပြန်လည်ဖြစ်ပွားနေသည့်တိုက်ပွဲများ၌ စစ်ကောင်စီတပ်ဘက်က အထိနာပြီး လက်နက်၊ ခဲယမ်းများစွာ သိမ်းဆည်းရမိထားသည်ဟု ကရင်နီစစ်ဘက်ဆိုင်ရာဗဟိုသတင်းထုတ်ပြန်ရေးအဖွဲ့ KnMIC တာဝန်ခံခူးညေးရယ်က သံလွင်ခက်ကိုပြောသည်။
ပြီးခဲ့သောမတ်လတွင် အင်အား၃၀၀ ဝန်းကျင် ဖြင့်ဒီးမော့ဆိုအရှေ့ခြမ်း ဒေါတမကြီးကျေးရွာအုပ်စု ကျေးရွာများသို့ စစ်ကြောင်းထိုး၍ တပ်စွဲထားသောစစ်ကောင်စီတပ်များကို ကရင်နီပူးပေါင်းတပ်က တိုက်ခိုက်နေရာ စစ်ကောင်စီတပ်များ ထိခိုက်ကျဆုံးမှုများနေသည်။
မတ်လ၇ရက်မှစ၍ စစ်ကြောင်းထိုးလာသောစစ်ကောင်စီတပ်များကို ကရင်နီပူးပေါင်းတပ်များတိုက်ခိုက်ခဲ့ရာ ၉၀ကျော်သေဆုံးခဲ့သည့်အပြင် ယခုဧပြီလ တတိယအပတ်၌ ပြန်စနေသည့်တိုက်ပွဲများအတွင်း၌လည်း စစ်ကောင်စီတပ်က ၄၀ ဝန်းကျင်ခန့်သေဆုံးထားသည်ဟုခူးညေးရယ်ကပြောသည်။
” အရှေ့က ၃ရက်တိုက်ပွဲမှာ ၃၀ ကျတယ်။ မနေ့ကတိုက်ပွဲမှာ ၈ ယောက်ကျပြီး တစ်ယောက်ဖမ်းမိတော့ ၄၀လောက်ရှိပြီပေါ့ ။ လက်နက်က ၆၀ မမတစ်လက်နဲ့ MA1 ၊ MA2 ၊ RPG 7 တို့၊ ငါးကြင်းမှီးတို့ လက်နက်မျိုးစုံ ၁၉လက်ရတယ်။ ကျန်တာ့တော့ ကျည်တို့၊ ဗုံးသီးတို့၊ လပ်တော့တစ်လုံး၊ ဖုန်းငါးလုံး၊ မိုင်းရှာစက်တို့ မိုင်းတို့ ဆက်စပ်ပစ္စည်းတွေရတယ် “ဟု KnMIC ခူးညေးရယ်က ယမန်နေ့တွင် သံလွင်ခက်ကိုပြောသည်။
ဒီးမော့ဆိုအရှေ့ခြမ်းတွင် ယခုလအတွင်း၌ သင်္ကြန်ပြီးခါနီးဧပြီ ၁၆ရက်မှစ၍ ၁၉ရက်နေ့အထိ စစ်ကောင်စီတပ်များကို ကရင်နီပူးပေါင်းတပ်များတိုက်ခိုက်ခဲ့ရာမှ ၄ ရက်ဆက်တိုက်ပွဲဖြစ်ပွားခဲ့သည်။
ဧပြီ ၁၉ရက်တွင် ကရင်နီပြည်ဒေါညေးခူကျေးရွာနှင့်ဘောလခဲသို့သွားရာလမ်းအပိုင်းတွင် စစ်ကောင်စီတပ် ခလရ(၈၀)နှင့် ကရင်နီတပ်မတော် KA ၊ KNDF တပ်ရင်း ၂၁ ပူးပေါင်းတပ်တို့တိုက်ပွဲဖြစ်ပွားခဲ့ပြီး စစ်ကောင်စီတပ်မှ(၈)ဦးသေဆုံးခဲ့ပြီးတစ်ဦးကိုအရှင်ဖမ်းမိခဲ့သည်။
” ရှေ့၃ရက်ဆက်တိုက်ပွဲမှာ ထိခိုက်များတော့ သူတို့လူနာလာကြိုတာလား ရိက္ခာပို့တာလား အဲ့ကားလာတဲ့အချိန်ကားမိုင်းနင်းတာ ကားမှောက်သွားတယ်။ ပြီးတော့တိုက်ပွဲဆက်ဖြစ်တာ “ဟု KnMICတာဝန်ခံကပြောသည်။
ပြီးခဲ့သည့်ရက်ပိုင်းတိုက်ပွဲအတွင်း၌ စစ်ကောင်စီတပ်က တိုက်လေယာဥ်များဖြင့် အစောပိုင်းနေ့၃ရက်ဆက်လာရောက်တိုက်ခိုက်ခဲ့သည်။
ဒီးမော့ဆိုအရှေ့ခြမ်းသို့ ရှမ်းပြည်နယ်တောင်ပိုင်း စကခ ၂ ( စစ်ကောင်စီ၏အမှတ်၂စစ်ဆက်ရေးကွပ်ကဲမှုဌာနချုပ်)လက်အောက်ခံ ခလရ ၁၂ ၊ ခမရ ၅၁၅ ၊ ၅၁၆ တပ်ရင်းများက မတ်လ ၇ရက်တွင် အင်အား၇၀ ၊ မတ်လ၉ရက်တွင် အင်အား ၂၀၀ တို့ဖြင့်စစ်ကြောင်းထိုးခဲ့သည်။
ထို့နောက် ယခုဧပြီလ ပထမအပတ်တွင်း၌ တပ်မ၆၆ လက်အောက်ခံခလရ ၈၀ တပ်ရင်းမှ အင်အား ၇၀ ခန့်ရှိစစ်ကြောင်းတစ်ခုထပ်မံရောက်ရှိလာသည်ဟု ကရင်နီပူးပေါင်းတပ်များထံမှ သိရသည်။
အဆိုပါစစ်ကောင်စီတပ်ရင်းများကို ကရင်နီတပ်မတော် KA ၊ KNDF B/10 ၊ B/05၊ B/06 ၊ B/01 ၊ B/16 ၊B/15 ၊KNDF ETD ၊ လွိုင်ကော် PDF နှင့်အခြားကရင်နီတပ်များကပူးပေါင်းတိုက်ခိုက်နေသည်။
ပုံစာ – ယခုဧပြီလ တတိယအပတ်တွင်း ဒီးမော့ဆိုအရှေ့ခြမ်း တိုက်ပွဲတွင် သိမ်းဆည်းရမိသော လက်နက်ခဲယမ်းများနှင့် စစ်ကောင်စီသုံ့ပန်း။
*****************
အောက်ဖော်ပြပါလင့်တွေမှာ သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk
YouTube -> https://youtu.be/zxRTM_OZtf4
Website -> https://thanlwinkhet.net/?p=3690
Website ->https://eng.thanlwinkhet.net
