၂၀၂၃ ခုနှစ်အတွင်း တိုင်းရင်းသားနယ်မြေများကို ထိုးစစ်ဆင်မှုမြင့်လာနိုင်
************************************
ဖေဖော်ဝါရီ ၉၊၂၀၂၃။
၂၀၂၃ ခုနှစ်အတွင်း တိုင်းရင်းသားနယ်မြေများကို ထိုးစစ်ဆင်မှုများ မြင့်လာနိုင်သည်ဟု လေ့လာသူများက သံလွင်ခက်ကို ပြောသည်။
တစ်နိုင်ငံလုံးက စစ်ကောင်စီ ထိန်းချုပ်ရခက်နေသည့် ဒေသများကိုပါ ထိုးစစ်ဆင်လာနိုင်သည့်အတွက် လေကြောင်းတိုက်ခိုက်မှုများအတွက်ပါ ကြိုတင်ပြင်ဆင် ဆောင်ရွက်ထားသင့်သည်ဟု ကရင်အမျိုးသားအစည်းအရုံး KNU တပ်မဟာ၅ ပြောခွင့်ရ ပဒိုမန်းမန်းကပြောသည်။
၎င်းက “ ဘယ်ပြည်နယ်ရယ်လို့တော့ပြောလို့မရဘူး။စစ်ကောင်စီဘက်ကတော့ ဘယ်တော့မှလျှော့မှာမဟုတ်ဘူး။ တိုင်းပြည်ကိုဆက်ပြီးတော့အုပ်ချုပ်ဖို့ ထိန်းချုပ်နိုင်ဖို့အတွက် ဘယ်ပြည်နယ်၊ဘယ်ဒေသဆိုတာထက်၊နိုင်ငံတ၀န်းမှာ စစ်ကောင်စီက ကြမ်းကြုတ်မှုကို ဒီတစ်နှစ်အတွင်းမှာတော့ မီးကုန်ယမ်းကုန်လုပ်ဖို့ရှိနိုင်တယ် ” ဟုပြောသည်။
၂၀၂၃ ခုနှစ်ကို တော်လှန်ရေးအဆုံးအဖြတ်နှစ်ဖြစ်အောင် ကြိုးပမ်းဆောင်ရွက်မည်ဟု အမျိုးသားညီညွတ်ရေးအစိုးရက ထုတ်ဖော်ပြောဆိုထားသည်။
NUG အစိုးရက မြန်မာတစ်နိုင်ငံလုံးအတိုင်းအတာဖြင့် နယ်မြေ ၅၀ ရာခိုင်နှုန်းကျော်ကို စိုးမိုးထိန်းချုပ်ထားနိုင်ပြီး စစ်ကောင်စီအနေဖြင့် မြန်မာနိုင်ငံက ၁၅၇ မြို့နယ်ကို အရေးတကြီး ထိန်းချုပ်ရန်လိုအပ်သည်ဟု စစ်ကောင်စီခေါင်းဆောင်က ဖေဖော်ဝါရီ ၁ ရက်နေ့တွင် ထုတ်ဖော်ပြောဆိုထားသည်။
စစ်ကောင်စီနှင့် ပြည်သူ့ကာကွယ်ရေးတပ်ဖွဲ့ဝင်များအပါအဝင် တိုင်းရင်းသားလက်နက်ကိုင်အဖွဲ့အစည်းများ၏ ထိပ်တိုက်တွေ့ဆုံ ထိုးစစ်ဆင်မှုများမြင့်တက်လာနိုင်သည်ဟု မြန်မာ့အရေးလေ့လာ သုံးသပ်သူများက လည်း သုံးသပ်ထားကြသည်။
အရပ်သားများအနေဖြင့် မိမိကိုယ်ကို ကာကွယ်ရန် ဗုံးခိုကျင်းများတူးကြရန် တိုင်းရင်းသားလက်နက်ကိုင်ခေါင်းဆောင်များက ပြောဆိုထားမှုများလည်းရှိသည်။
စစ်ရေးအရှိန်မြင့်လာနိုင်သည့်အတွက် တာ၀န်ရှိအဖွဲ့အစည်းများနှင့် ကာကွယ်ရေးတပ်ဖွဲ့၀င်များက ပြည်သူများကို လေကြောင်းရန်ကာကွယ်နည်းများကို လက်တွေ့ပညာပေးရန် လိုအပ်သည်ဟု နိုင်ငံရေးအကျဉ်းသားဟောင်း ဦးထွန်းကြည်က ဆိုသည်။
“ ပြည်သူလူထုက တာ၀န်ကျေနေတဲ့အတွက် ပြည်သူလူထုနဲ့သင့်တော်တဲ့ နေရာတွေမှာ ဗုံးခိုကျင်းတူးပြီးတော့ ကိုယ့်ရဲ့လုံခြုံရေးကိုကာကွယ်ပေးထားဖို့။ နောက်တစ်ခုက ပြည်သူလူထုတွေအပေါ် ဘာလုပ်ပေးနိုင်မလဲ။ NUG ၊ MOD (ကာကွယ်ရေးဝန်ကြီးဌာန)၊ EROs(တိုင်းရင်းသားလက်နက်ကိုင်အဖွဲ့အစည်းများ)တွေ အနေနဲ့ ဘာတွေလုပ်ပေးနိုင်မလဲ။ အဲ့ဒါတွေကိုလည်း ထိရောက်တဲ့ဆောင်ရွက်မှုမျိုးတွေကို လုပ်ပေးဖို့လည်းတိုက်တွန်းတောင်းဆိုချင်တယ် ” ဟု ဦးထွန်းကြည်ကပြောသည်။
အမျိုးသားညီညွတ်ရေးအစိုးရအနေဖြင့် နိုင်ငံရေးအဆုံးအဖြတ်နှစ်ဖြစ်သည်ဟု ထုတ်ပြန်ထားသည့်အတွက် ပြည်သူများအနေဖြင့် သတိပြုပြင်ဆင်ထားရန်လိုအပ်သည်ဟု တောင်ပိုင်းတိုင်းစစ်ဒေသမှ ပြည်သူ့ကာကွယ်ရေးတပ်ဖွဲ့၀င်တစ်ဦးကပြောသည်။
“ ကျွန်တော်တို့အနေနဲ့ကတော့ဒီနှစ်ဟာအဆုံးအဖြတ်ပေးနိုင်မယ့်နှစ်တစ်နှစ်လို့ထင်တယ်။တိုက်ပွဲတွေလည်းရှေ့လျှောက်ပိုပြီးပြင်းထန်လာနိုင်မယ်။ တိုက်ပွဲတွေများလာတာနဲ့အမျှ ထိခိုက်ဆုံးရှုံးမှုတွေလည်းပိုများနိုင်တဲ့ အတွက်ကြောင့် ပြည်သူတွေအနေနဲ့ ပိုပြီးသတိထားရမယ်။ ပြင်ဆင်သင့်တာတွေ၊စားနပ်ရိက္ခာတွေပြင်ဆင်ထားကြပါ ” ဟု ပြောသည်။
NUG အစိုးရကလည်း ပြည်သူများအနေဖြင့် စစ်ကောင်စီက လက်နက်ကြီးနှင့် လေကြောင်းတိုက်ခိုက်မှုများကို ကာကွယ်နိုင်ရန် ဗုံးခိုကျင်းတူးရာတွင် လိုအပ်မည့်အကြံပြုချက်များကို ယခုလ အစောပိုင်းတွင် ထုတ်ပြန်ထားသည်။
စစ်ကောင်စီက အာဏာသိမ်းကာလကို ၆ လသက်တမ်း ထပ်မံတိုးခဲ့ပြီးနောက် မြို့နယ် ၃၇ မြို့နယ်ကို စစ်အုပ်ချုပ်ရေး မာရှယ်လောအာဏာကျင့်သုံးရန် ဖေဖော်ဝါရီ ၂ ရက်နေ့က ထုန်ပြန်ကြေညာထားသည်။
ပုံစာ – စစ်အုပ်ချုပ်ရေးကြေညာထားသည့် မြို့နယ်တွင် ပြင်ဆင်ထားသည့် ဗုံးခိုကျင်း။
ဓာတ်ပုံ − MOHADM၊
