အစည်းအဝေးပြုလုပ်နေသည့် လဝကအရာရှိများ အပစ်ခံရ
***********************
သံလွင်ခက်။
ဇန်နဝါရီ ၂၆၊ ၂၀၂၃။
ပဲခူးတိုင်း၊ ဒိုက်ဦးမြို့နယ်ရှိ လူဝင်မှုကြီးကြပ်ရေးရုံး ယမန်နေ့ ဇန်နဝါရီ ၂၅ ရက် ည ၇ နာရီခွဲ အချိန်တွင် အပစ်ခံခဲ့ရသည်ဟု ဒေသခံများက သံလွင်ခက်သတင်းဌာနကို ပြောသည်။
လူဝင်မှုကြီးကြပ်ရေးရုံး ဌာနအရာရှိများ အစည်းအဝေးလုပ်နေချိန် အပစ်ခံခဲ့ရခြင်းဖြစ်သည်ဟု ဒေသခံအမျိုးသားတစ်ဦးက သံလွင်ခက်ကို ပြောသည်။
၎င်းက “ ညဘက် အစည်းဝေးလုပ်နေချိန်မှာ ပစ်ခံရတာ။ မိုင်းထောင်ခဲ့တယ်လို့ သူတို့ (စစ်ကောင်စီတပ်ဖွဲ့ဝင်တွေ) ယူဆပြီး အစည်းဝေးခန်းထဲကသူတွေကို မိုင်းမရှင်းခင်ထိ အပြင်ပေးမထွက်ဘူးလို့လည်း ပြောတယ် ” ဟု ဆိုသည်။
အဆိုပါဖြစ်စဉ်ကြောင့် လဝက ဦးစီးမှူးနှင့် ရုံးဝန်းထမ်း အမျိုးသမီးတစ်ဦး ထိခိုက်ဒဏ်ရာရရှိခဲ့သည်ဟု ဒေသခံများက ဆိုသော်လည်း ထိခိုက်ပျက်စီးမှု အသေးစိတ်အခြေအနေကို သံလွင်ခက်သတင်းဌာနက ဆက်လက်အတည်ပြုနေဆဲဖြစ်သည်။
အထက်ပါဖြစ်စဉ်နှင့် ပတ်သက်၍ မည်သည့်အဖွဲ့က လုပ်ဆောင်သည်ကို ထုတ်ပြန်ထားခြင်း မရှိသေးပေ။
စစ်ကောင်စီက ရွေးကောက်ပွဲ ပြုလုပ်ရန် ပြင်ဆင်လာသလို စစ်ကိုင်းတိုင်း၊ မကွေးတိုင်း အပါအဝင် ဒေသတချို့တွင် ရွေးကောက်ပွဲကော်မရှင်ရုံးနှင့် လူဝင်မှုကြီးကြပ်ရေးရုံးတချို့လည်း မီးရှို့ခံနေရသည်။
မိုင်းထောင်ဖောက်ခွဲခြင်း၊ လက်နက်ကြီး၊ လက်နက်ငယ်များဖြင့် ပစ်ခတ်ခြင်းနှင့် မီးရှို့မှုများကြောင့် ၂၀၂၂ ခုနစ် ဇန်နဝါရီလမှ ၂၀၂၃ ခုနှစ် ဇန်နဝါရီလ အထိ တိုင်းဒေသကြီးနှင့် ပြည်နယ်အသီးသီးတွင်ရွေးကောက်ပွဲကော်မရှင်အဖွဲ့ခွဲရုံး ၁၃ ခုနှင့် ရုံးသုံးပစ္စည်းများ ပျက်စီးခဲ့သည်ဟု စစ်ကောင်စီက ထုတ်ပြန်ထားသည်။
အမျိုးသားညီညွတ်ရေးအစိုးရ အပါအဝင် တော်လှန်ရေးအင်အားစုများကလည်း စစ်ကောင်စီ၏ နိုင်ငံရေးထွက်ပေါက်ဖြစ်သည့် ရွေးကောက်ပွဲကို ကန့်ကွက်ကြရန် ပြည်သူများကို နှိုးဆော်ထားသည်။
၂၀၂၃ ခုနှစ်၊ ဇန်နဝါရီလ ၁၄ ရက်နေ့ကလည်း စစ်ကောင်စီကျင်းပမယ့် ရွေးကောက်ပွဲအတွက် မြောင်နယ်အတွင်း လူဦးရေစာရင်းကောက်ခံခဲ့သည့် အထွေထွေအုပ်ချုပ်ရေးဦးစီးဌာနမှ ဝန်ထမ်းလေးဦးကို မြောင်မြို့နယ်တော်လှန်ရေးတပ် – MRA က ဖမ်းဆီးကာ NUG အကြမ်းဖက်တိုက်ဖျက်ရေး ဥပဒေဖြင့် တရားစွဲဆိုထားသည်။
ပုံစာ – ရွေးကောက်ပွဲကျင်းပရန် လူဦးရေစာရင်း ကောက်ယူနေသည့် စစ်ကောင်စီ ထိန်းချုပ် ဌာနဆိုင်ရာပူးပါင်းအဖွဲ့များမြင်ကွင်း။
