ရှမ်းပြည်နယ်တောင်ပိုင်း၊ ဖယ်ခုံမြို့နယ်၊ လအိကျေးရွာအနီး ဘန်ကောက်စစ်ရှောင်စခန်းကို စစ်ကောင်စီက ယမန်နေ့ မေလ (၁၄)ရက်နေ့ ညပိုင်းတွင် ပေါင် (၅၀၀)ဗုံး (၂)လုံးကြဲချခဲ့ကြောင်း ဒေသခံများက ပြောကြားသည်။ဘန်ကောက်စစ်ရှောင်စခန်းဟောင်းကို စစ်ကောင်စီက ယမန်နေ့ မေလ (၁၄)ရက်နေ့ ည (၈)နာရီ (၄၀)မိနစ်ဝန်းကျင် အချိန်တွင် ဂျက်ဖိုက်တာဖြင့် ပေါင်(၅၀၀)ဗုံး (၂)လုံး ကြဲချခဲ့ပြီး အဆောက်အအုံအချို့ ပျက်စီးကာ လူထိခိုက်မှု မရှိပေ။
“လေယာဥ်က မဝဲတော့ပဲနဲ့ ၂ လုံးလုံး တစ်ခါထဲကြဲသွားတာ။ ပေါင် ၅၀၀ ဗုံးတွေချည်းပဲ။ အရင်ကလဲ ကျောင်းမှန်းသိရက် စစ်ရှောင်မှန်းသိရက်နဲ့ လာကြဲတာ။ အခုလို ထပ်ခါထပ်ခါ လာကြဲတာဆိုတော့ ပြည်သူလူထုကို စိတ်ပိုင်းဆိုင်ရာ ရုပ်ပိုင်းဆိုင်ရာ အမျိုးမျိုးခြိမ်းခြောက်နေတာပေါ့” ဟု ဒေသခံတစ်ဦးက ဆိုသည်။
ပြီးခဲ့သည့် ၂၀၂၄ ခုနှစ်၊နိုဝင်ဘာလ (၁၈)ရက်နေ့ကလည်း ဘန်ကောက်စစ်ရှောင်စခန်းကို စစ်ကောင်စီက ပေါင် (၅၀၀)ဗုံး (၂)လုံးကြဲချတိုက်ခိုက်ခဲ့မှုကြောင့် အသက် (၄၀)ကျော် အမျိုးသမီးတစ်ဦး ဗုံးစထိမှန် သေဆုံးခဲ့ရသည်။
ထို့ပြင် ၂၀၂၄ ခုနှစ်၊ စက်တင်ဘာလ (၅)ရက်နေ့ကလည်း အဆိုပါ ဘန်ကောက်စစ်ရှောင်စခန်းကို ပေါင် (၅၀၀) ဗုံး (၂)လုံး တိုက်ခိုက်ခဲ့မှုကြောင့် ကလေးငယ်အပါအဝင် စစ်ဘေးရှောင် (၉)ဦး သေဆုံးခဲ့ရပြီး (၂၀)ကျော် ထိခိုက်ဒဏ်ရာရရှိခဲ့သည်။
KPV News
KPV-Photo/ Nyein Mg
သတင်း – Karenni People’s Voice
