တိုက်ပွဲပြင်းထန်နေသည့် ရှမ်းပြည်နယ်မြောက်ပိုင်း နောင်ချိုမြို့နယ်၊ တောင်ခမ်းကျေးရွာရှိ (၉၀၂)တပ်စခန်းမှ တပ်သား (၃)ဦးသည် လက်နက်အပြည့်စုံဖြင့် တအာင်းတပ်မတော် TNLAတပ်ဖွဲ့ထံ အလင်းဝင်ခဲ့သည်ဟု TNLA က ထုတ်ပြန်သည်။
ပြီးခဲ့သည့် မတ်လ ၂၈ရက် နေ့လယ် (၃း၀၀)နာရီအချိန်တွင် TNLAတပ်ဖွဲ့ထံ လက်နက် သုံးလက်နှင့်အတူ ၎င်းတို့မှ လာရောက်အလင်းဝင်ခဲ့ခြင်းဖြစ်သည်။
၎င်းတို့ကိုဦးဆောင်သည့် ဗိုလ်ကြီးအဆင့်ရှိသူတစ်ဦးသည် တိုက်ပွဲအတွင်းကျဆုံးသွားခဲ့သောကြောင့် ဦးဆောင်သူမရှိသည့်အတွက် အလင်းဝင်ရောက်ခဲ့ခြင်းဖြစ်သည်ဟု TNLA ၏ ထုတ်ပြန်ချက်အရသိရသည်။
နောင်ချိုမြို့ကို TNLA ပူးပေါင်းတပ်ဖွဲ့က ပြီးခဲ့သည့် နှစ် ဇူလိုင်လ ဒုတိယအပတ်တွင် သိမ်းပိုက်ခဲ့ခြင်းဖြစ်သည်။
ထို့နောက် TNLA ပူးပေါင်းတပ်များသည် စစ်ရေးအရ ဗျူဟာကျပြီး ဆက်ပန်းဆက်သွယ်ရေးအရ အရေးပါသည့် နောင်ချိုမြို့တောင်ဘက်ရှိ တောင်ခမ်းကျေးရွာက စစ်ကောင်စီတပ်၏ အမြောက်စခန်းကွပ်ကဲမှုဌာနချုပ် (မစခ-၉၀၂)နှင့်လက်အောက်ခံ အမြောက်တပ်ရင်း သုံးရင်းဖြစ်သည့် အမတ(၃၅၄)၊ အမတ (၂၀၆)၊ အမ(၄၀၆)တို့ကိုတိုက်ခိုက်ခဲ့သည်။
ခုနှစ်လကျော်ကြာ တိုက်ပွဲပြင်းထန်နေသည့် တောင်ခမ်းဒေသကို စစ်ကောင်စီက လေကြောင်း ဒရုန်း အပါအဝင် လူသူ လက်နက် အင်အားဖြည့်တင်းပြီး ထိုးစစ်ဆင် တိုက်ခိုက်မှုများပြုလုပ်ကာ တိုက်ပွဲပြင်းထန်လျက်ရှိသည်။
