ကလေးအကျဉ်းထောင်တွင် ထောင်ဝင်စာပို့ရန်ခက်ခဲနေ

ကလေးအကျဉ်းထောင်တွင် ထောင်ဝင်စာပို့ရန်ခက်ခဲနေ

*******

ယမင်းဖူးပွင့်အောင်

မေ ၂၁၊ ၂၀၂၄။

စစ်ကိုင်းတိုင်း၊ ကလေးအကျဉ်းထောင်တွင် ထောင်ဝင်စာပေးပို့ရန်အခက်အခဲများရှိနေသည်ဟု အကျဉ်းထောင်နှင့် နီးစပ်သူများထံက သိရသည်။

ကလေးအကျဉ်းထောင်သည် မြို့နှင့် ၁၂ မိုင်ခန့်ကွာဝေးသည့်အတွက် စစ်ကောင်စီစစ်ဆေးရေးဂိတ်များ ကျော်ဖြတ်ရပြီး ထောင်ဝင်စာပေးပို့ရာတွင် ကန့်သတ်မှုများစွာလည်းရှိနေသည်ဟု အကျဉ်းသားကူညီသူ ၁ ဦးက သံလွင်ခက်ကိုပြောသည်။

၎င်းက “ ထောင်ဝင်စာက အလှူရှင်တွေကလှူတယ်ဆိုရင်တောင် အထဲမှာနေတဲ့အကျဉ်းသားရဲ့အချက်အလက်တွေ၊ နာမည်၊ အဖေနာမည်၊ ပုဒ်မရယ် ကျတဲ့နှစ်တွေရယ် မသိဘူးဆိုရင် ပို့လို့မရဘူး။ သွားတဲ့အချိန်မှာ သူတို့ဂိတ်တွေမနည်းဘူးဖြတ်ရတယ်လေ။  လူ ၁ ဦးကို ပါဆယ်ထုပ် ၂ ထုပ်ပဲပို့ခွင့်ပေးတယ်။ အိမ်က ကော်ဖီ ၁၅ ထုပ်ပေးရင် ၁၀ ထုပ်လောက်ပဲရတာတွေရှိတယ်။ အစားအ သောက်တွေကအစ အပြည့်တော့မရောက်ဘူး”ဟု ပြော သည်။

အကျဉ်းထောင်ထဲတွင် အစားအသောက်၊ ဆေးဝါးနှင့် လိုအပ်သည့် ထောက်ပံ့မှုများ မရရှိသောကြောင့် ထောင်ဝင်စာပြတ်လပ်သည့်အချိန်တွင် အခက်အခဲများစွာနှင့်ရင်ဆိုင်ရသည်ဟု နိုင်ငံရေးအကျဉ်းသားဟောင်း ၁ ဦးက သူ၏အတွေ့အကြုံကို ပြောသည်။

“အိမ်ကပို့မယ့်အလှည့်နဲ့ ထောင်ဝင်စာပိတ်တဲ့အချိန်နဲ့ တိုက်တိုက်ဆိုင်ဆိုင်ကြုံတော့ ထောင်ဝင်စာမရလိုက်ဘူး။ ဟင်းတွေဘာမှ စားစရာမရှိတော့ဘူး။ ကန်စွန်းရွက်အရိုးအရင့်ကို မည်းနေအောင်ပြုတ်ထားတာတွေ ဒါတွေနဲ့ဘယ်လိုမှစားလို့အဆင်မပြေဘူး။ ငပိဆိုလည်း ဝက်ကျွေးတဲ့ငပိတွေ၊ လုံးဝနံစော်ပြီး စားလို့မရဘူး” ဟုပြော သည်။

ပြီးခဲ့သည့် ဧပြီလက နှစ်သစ်ကူးလွတ်ငြိမ်းချမ်းသာခွင့်တွင် ကလေးအကျဉ်းထောင်က အကျဉ်းသား ၂၀ ခန့်သာ လွတ်မြောက်ခဲ့ပြီး နိုင်/ကျဉ်း ၁ ဦးမျှ ပါဝင်ခြင်းမရှိဟုလည်း ကလေးအကျဉ်းထောင်နှင့် နီးစပ်သူများထံက သိရသည်။

အကြောင်းအမျိုးမျိုးကြောင့် ရပ်ဝေးအကျဉ်းထောင်များနှင့် လမ်းပန်းဆက်သွယ်ရေးခက်ခဲသည့် အကျဉ်းထောင်များကို ပြောင်းရွှေ့ခံရသည့် နိုင်/ကျဉ်းမိသားစုဝင်များအနေဖြင့်လည်း ထောင်ဝင်စာပို့နိုင်သည့် အကြိမ်ရေ လျော့နည်းသွားသည်ဟု နိုင်ငံရေးအကျဉ်းသူ ၁ ဦး၏ အစ်မဖြစ်သူ မဝေဝေ(အမည်လွှဲ) က ပြောသည်။

၎င်းက “အရင်က အင်းစိန်ထောင်မှာ ၁ နှစ်ခွဲလောက်နေရတယ်။ အမိန့်ချပြီးတော့ နေရာမရှိတော့လို့ဆိုပြီး သာယာဝတီထောင်ကို ပြောင်းရတယ်။ ကားခတင် ၁ သိန်းခွဲလောက်ရှိတော့ ၁ လ ၁ ခေါက်လောက်ပဲသွားနိုင်တယ်။ ပစ္စည်းပို့တဲ့နေရာမှာလည်း အကန့်အသတ်ရှိတော့ ၁ ခေါက်ပဲ ပို့နိုင်တာ သိပ်တော့အဆင်မပြေဘူးပေါ့” ဟုပြောသည်။

၂၀၂၄ ခုနှစ် ဇန်နဝါရီ ၄ ရက်တွင် ၇၆ နှစ်မြောက် လွတ် လပ်ရေးနေ့အထိမ်းအမှတ်အဖြစ် စစ်ကောင်စီက ကလေးမြို့အကျဉ်းထောင်က အကျဉ်းသား ၁၀၀ ကျော် လွှတ်ပေးခဲ့သော်လည်း နိုင်ငံရေးအကျဉ်းသား ၁ ဦးမျှပါဝင်ခဲ့ခြင်းမရှိပေ။

စစ်တပ်က အာဏာသိမ်းပြီးနောက် ယခုအချိန်အထိ နိုင် ငံရေးအကျဉ်းသား စုစုပေါင်း ၂၆,၇၀၀ ဦးဖမ်းဆီးခံခဲ့ရပြီး ၂၀,၄၇၃ ဦး ထိန်းသိမ်းခံနေရဆဲဖြစ်ကာ ထိန်းသိမ်းခံနေရသူများအနက်မှ ၉,၀၀၀ ဦးမှာ ထောင်ဒဏ်ချမှတ်ခံ ထားရသည်ဟု နိုင်ငံရေးအကျဉ်းသားများ ကူညီစောင့်ရှောက် ရေးအသင်း AAPP ကထုတ်ပြန်ထားသည်။

****

Telegram – > https://t.me/ThanLwinKhetNews/4651

YouTube -> https://youtu.be/b23CL15_vH0

Website -> https://thanlwinkhet.net/?p=10127