ဧရာဝတီမြစ်ကမ်းဘေးရှိ တပ်စခန်းနှစ်ခုအား KIA ပူးပေါင်းတပ်သိမ်းပိုက်
***********
ထွယ်
မေ ၇၊ ၂၀၂၄။
ဗန်းမော်ခရိုင်ရှိ စစ်ကောင်စီ၏တပ်စခန်းများအား တပြိုင်နက် ထိုးစစ်ဆင်တိုက်ခိုက်နေသည်ဟု ဒေသခံများနှင့် ရှေ့တန်းရဲဘော်များထံက သိရသည်။
ကချင်လွတ်မြောက်ရေးတပ်မတော် – KIA နှင့် ပူးပေါင်းတပ်သည် ယနေ့နံနက် ၅ နာရီခန့်ကစတင်၍ ဗန်းမော် မြို့နယ်ရှိ စင်းခန်းတပ်စခန်းနှင့် မိုးမောက်မြို့တွင် တစ်ခုတည်းကျန်ရှိသည့် စစ်ကောင်စီ၏ခြေမြန်တပ်ရင်း ခမရ – ၄၃၇ အပါအဝင် မံစီမြို့နယ်ရှိ ဝလောင်လ – Wa Lawng La တပ်စခန်းကို တပြိုင်နက် ထိုးစစ်ဆင် တိုက်ခိုက် နေခြင်းဖြစ်သည်။
စင်းခန်းကျေးရွာသည် ကချင်ပြည်နယ်၊ ဗန်းမော်မြို့အနောက်တောင်ဘက် ဗန်းမော်မြို့နယ်နှင့် ရွှေကူမြို့နယ်အစပ် ဧရာဝတီမြစ်ကမ်းဘေးရှိကျေးရွာဖြစ်ပြီး မြစ်၏အနောက်ဘက်ရှိ စစ်ကောင်စီ၏ခြေလျင်တပ်ရင်း ခလရ – ၅၆ တပ် နှင့် မြစ်၏အရှေ့ဘက် စင်းခန်းကျေးရွာရှိ တာဝါတိုင်စခန်းတို့ကို ယနေ့နံနက် ၇ နာရီခွဲခန့်က တိုက်ခိုက်သိမ်းပိုက် နိုင်ခဲ့ပြီဟု ရှေ့တန်းရဲဘော် ၁ ဦးက သံလွင်ခက်ကို ပြောသည်။
၎င်းက “ကျွန်တော်တို့ဘက်က RPG နဲ့ ပစ်ပေမယ့် သူတို့ဘက်က လုံးဝမပစ်ဘဲ စခန်းစွန့်ခွာသွားကြတာ။ လော လောဆယ် ရှင်းလင်းရေးလုပ်နေတုန်းပါ။ မိုင်းတွေ တအားထောင်ထားတယ်” ဟု ပြောသည်။
စစ်ကောင်စီ၏ ခြေလျင်တပ်ရင်း ခလရ – ၅၆ တပ်ကို ရှင်းလင်းရေးပြုလုပ်စဉ် စစ်ကောင်စီတပ်၏ ကျည်ဆံအချို့နှင့် ဗုံးသီးအချို့အပါအဝင် ဆန်အိတ်များ သိမ်းပိုက်ရရှိခဲ့သည်ဟု ၎င်းက ဆက်လက်ပြောဆိုသည်။
စင်းခန်းကျေးရွာသည် စင်းခန်းကျေးရွာအုပ်စုတွင်တည်ရှိပြီး ၂၀၁၄ သန်းခေါင်စာရင်းအရ လူဦးရေ စုစုပေါင်း ၆,၈၀၀ ကျော်နေထိုင်သည့် ကျေးရွာဖြစ်သည်။
စင်းခန်းကျေးရွာဒေသခံများကို စစ်ကောင်စီတပ်နှင့် ကချင်လွတ်လပ်ရေးတပ်မတော် – KIA နှစ်ဖက်တပ်ဖွဲ့လုံးက အရေးပေါ်ပြောင်းရွှေ့ခိုင်းသည်မှာ ၁ ပတ်ခန့်ရှိပြီဖြစ်သည်။
ထို့ပြင် မံစီမြို့နယ်ရှိ ဝလောင်လ – Wa Lawng La တပ်စခန်းကိုလည်း KIA ပူးပေါင်းတပ်က ယနေ့နံနက်က တပြိုင်နက်ထိုးစစ်ဆင်တိုက်ခိုက်နေပြီး လက်နက်ကြီးသံများနှင့် ဗုံးသံများသည် မိုင်းခေါင်ကျေးရွာထိပင် ကြားနေရ သည်ဟု မိုင်းခေါင်ဒေသခံ အမျိုးသမီး ၁ ဦးက ပြောသည်။
၎င်းက “အကြီးသံရော အသေးသံရော မနက်မိုးလင်းကတည်းက အသံတွေကြားနေရတာ။ တိုက်နေကြတုန်း ထင်ပါတယ်။ အခုတောင် အသံတွေကြားတုန်း” ဟုပြောသည်။
ကချင်လွတ်လပ်ရေးတပ်မတော် – KIA နှင့် ပူးပေါင်းတပ်ဖွဲ့ဝင်များသည် ယခုနှစ် မတ်လ ၇ ရက်ကတည်းက ကချင် ပြည်နယ်အတွင်းရှိ စစ်ကောင်စီတပ်စခန်းများကို တပြိုင်နက်ထိုးစစ်ဆင်တိုက်ခိုက်နေပြီး လက်ရှိ အချိန်ထိ မြို့ ၄ မြို့နှင့် တပ်စခန်း ၈၀ ခန့်ကို တိုက်ခိုက်သိမ်းပိုက်ထားပြီဖြစ်သည်။
ပုံစာ – စင်းခန်းစခန်းသိမ်းပြီးနောက် တွေ့ရှိရသည့် KPDF ရဲဘော်များ။
