ဘူးသီးတောင် စကခ – ၁၅ ကို AA သိမ်းပိုက်ဟု သတင်းများထွက်ပေါ်
*************
ယမင်းဖူးပွင့်အောင်
မေ ၄၊ ၂၀၂၄။
ရခိုင်ပြည်နယ် ဘူးသီးတောင်မြို့နယ်ရှိ စစ်ကောင်စီစစ်ဆင်ရေးကွပ်ကဲမှုဌာနချုပ် – စကခ ၁၅ ကို အာရက္ခတပ် တော် – AA က တိုက်ခိုက်သိမ်းပိုက်လျက်ရှိသည်ဟု ဒေသခံများထံက သိရသည်။
အဆိုပါ စကခ-၁၅ နှင့် လက်အောက်ခံစခန်းများကို AA က ပြီးခဲ့သည့်ဧပြီလကစ၍ ထိုးစစ်ဆင်တိုက်ခိုက်နေပြီး ယမန်နေ့တွင် သိမ်းပိုက်နိုင်ခဲ့သည်ဟု သတင်းများထွက်ပေါ်နေခြင်းဖြစ်သည်။
AA နှင့် စစ်ရေးနီးစပ်သူ ၁ ဦးက “ဘူးသီးတောင် စကခ ၁၅ ကို သိမ်းနိုင်တယ်လို့ကြားတယ်။ အလုံးစုံတော့ မဟုတ်ဘူး။ နည်းနည်းတော့ကျန်သေးတာပေါ့။ ခုထိလည်း လေယာဉ်နဲ့ စစ်ကောင်စီက တောက်လျှောက်လာပစ် နေတယ်” ဟု ဆိုသည်။
အမှတ် – ၁၅ စစ်ဆင်ရေးကွပ်ကဲမှုဌာနချုပ် – စကခ ၁၅ ၏ကွပ်ကဲမှုအောက်တွင် ခြေမြန်တပ်ရင်း – ခမရ ၈ ရင်း ရှိသည်ဟု သိရသည်။
ဘူးသီးတောင်မြို့နယ်တွင် အခြေချတပ်စွဲထားသည့် စကခ ၁၅ သည် ရခိုင်ပြည်နယ်အနောက်မြောက်ပိုင်း၏ အရေးကြီးဆုံးဌာနချုပ်ဖြစ်သည်ဟုလည်း ကျွမ်းကျင်သူများက သုံးသပ်ကြသည်။
အာရက္ခတပ်တော် – AA သည် စကခ ၁၅ လက်အောက်ခံ ခမရ – ၅၆၄ တပ်ရင်းဌာနချုပ်၊ အမ်းမြို့နယ်အတွင်းရှိ စကခ – ၅ လက်အောက်ခံ တောဟိန်းတောင်ဗျူဟာအပါအဝင် အနီးတဝိုက်ရှိ စစ်ကောင်စီစခန်းအချို့နှင့် မောင် တော၊ ကြိမ်ချောင်း နယ်ခြားစောင့်စခန်းများကို ထိုးစစ်ဆင်တိုက်ခိုက်လျက်ရှိသည်ဟု ဧပြီလ ၃ ရက်တွင် သတင်း ထုတ်ပြန်ထားသည်။
ဘူးသီးတောင်အခြေစိုက် ခမရ – ၅၆၄ တပ်ရင်းဌာနချုပ်ကိုလည်း ဧပြီလ ၅ ရက်နေ့တွင် AA က အပြီးသတ်တိုက်ခိုက်သိမ်းပိုက်နိုင်ခဲ့သည်။
၂၀၂၄ ဧပြီလကုန်အထိ စုစည်းထားသည့် အချက်အလက်များအရ စစ်ကောင်စီနှင့် လက်အောက်အဖွဲ့အစည်းများ၏ မီးရှို့ဖျက်ဆီးမှုကြောင့် ရခိုင်ပြည်နယ်၊ ဘူးသီးတောင်မြို့ပေါ်ရှိ နေအိမ်ပေါင်း ၂,၀၀၀ ကနေ ၃,၀၀၀ အတွင်း မီးရှို့ဖျက်ဆီးခံခဲ့ရသည်ဟု Data for Myanmar ကယမန်နေ့တွင် ထုတ်ပြန်ထားသည်။
ပုံစာ- AA တပ်ဖွဲ့ဝင်များ ။ (ဓာတ်ပုံ-APM)
****
Telegram – > https://t.me/ThanLwinKhetNews/4523
YouTube -> https://youtu.be/b23CL15_vH0
Website -> https://thanlwinkhet.net/?p=9760
