ချင်းပြည်နယ် ကျင်ဒွေးမြို့တွင် တိုက်ပွဲများဆက်လက်ပြင်းထန်နေ

ချင်းပြည်နယ် ကျင်ဒွေးမြို့တွင် တိုက်ပွဲများဆက်လက်ပြင်းထန်နေ

******

ထွယ်

ဧပြီ ၂၇၊ ၂၀၂၄။

ချင်းပြည်နယ်၊ ကန်ပက်လက်မြို့နယ် ကျင်ဒွေးမြို့တွင် Chin Defense Force – CDF၊   PDF ပူးပေါင်း တပ်များနှင့် စစ်ကောင်စီတပ်ဖွဲ့ဝင်များကြား တိုက်ပွဲပြင်းထန်စွာဖြစ်ပွားနေဆဲဟု သိရသည်။

ကျင်ဒွေးမြို့သိမ်းတိုက်ပွဲဖြစ်ပွားနေသည်မှာ ၄ လခန့်ရှိပြီဖြစ်ပြီး ၂၀၂၃ ခုနှစ်၊ ဒီဇင်ဘာ ၂၂ ရက်နေ့ကတည်းက စတင်၍ တိုက်ပွဲဖြစ်ပွားနေခြင်းဖြစ်သည်။

အဆိုပါမြို့သိမ်းတိုက်ပွဲကို အာရက္ခတပ်တော် – AA  တပ်ဖွဲ့ဝင်များလည်း ပူးပေါင်းပြီးတိုက်ခိုက်လျက်ရှိသည်ဟု ချင်းညီနောင်အဖွဲ့က ဧပြီလ ၂၃ ရက်တွင် ထုတ်ပြန်ခဲ့သည်။

ချင်းညီနောင်အဖွဲ့တွင် ချင်းကာကွယ်ရေးတပ်ဖွဲ့ – ကန်ပက်လက်၊ ချင်းအမျိုးသားကောင်စီ – မင်းတပ်နှင့် ချင်းအမျိုးသားအဖွဲ့ချုပ် – CNO/ CNDF အပါအဝင် ဇိုမီးဖက်ဒရယ်အစည်းအရုံး – ZFU၊ မရာနယ်မြေအုပ်ချုပ်ရေး ကောင်စီ – MTC/ MDF နှင့် ချင်းလဲန်းကာကွယ်ရေးတပ်ဖွဲ့ – မတူပီ၏ တပ်မဟာ – ၁ အစုအဖွဲ့တို့ဖြင့် စုဖွဲ့ထား သည်။

စစ်ကောင်စီတပ်သည် ၎င်းတို့စခန်းများ မကျရှုံးရေးအတွက် မြေပြင်စစ်ကြောင်းဖြင့်သာမက လေကြောင်းများဖြင့် လည်း အင်အားဖြည့်တင်းနေပြီး ပြင်းပြင်းထန်ထန်ခုခံလျက်ရှိသည်ဟု မင်းတပ်မြို့နယ်၊ ပြည်သူ့အုပ်ချုပ်ရေးအဖွဲ့ ပြောရေးဆိုခွင့်ရှိသူ ဆလိုင်းယောမာန် က သံလွင်ခက်ကို ပြောသည်။

၎င်းက “လေကြောင်းပစ်တာက အကြိမ် ၁၀၀ ကျော်ပြီ။ တချို့ရက်တွေဆိုရင် ၁ ရက်တည်းနဲ့အကြိမ် ၂၀ လောက်ပစ်တယ်။ လေကြောင်းကနေ ဟက်စကီးနဲ့ အင်အားလာဖြည့်တာ ၂ ကြိမ်ရှိပြီ” ဟု ပြောသည်။

ထို့ပြင် မကွေးတိုင်း၊ ပခုက္ကူမြို့ကနေလည်း စစ်ကားအစီး ၁၀၀ ကျော်ဖြင့် ကျောက်ထု – မင်းတပ်လမ်းများအတိုင်း လူအင်အားနှင့် ရိက္ခာအင်အားများဖြည့်တင်းလာရာ လမ်းခုလတ်တွင် ကာကွယ်ရေးတပ်ဖွဲ့ဝင်များက ကြားဖြတ်တိုက်ခိုက်နေသဖြင့် ကျင်ဒွေးမြို့သို့မရောက်ရှိနိုင်ခင်မှာပဲ စစ်ကြောင်းပြန်လည်ဆုတ်ခွာသွားရသည်ဟု ၎င်းက ဆက်ပြောသည်။

ချင်းပြည်နယ်တောင်ပိုင်း၊ ကန်ပက်လက်မြို့နယ်တွင် စစ်ရှောင်ပြည်သူလူဦးရေ ၆,၀၀၀ ကျော်ခန့်ရှိပြီး  ကျင်ဒွေးမြို့နှင့် အနီးဝန်းကျင်က ဒေသခံ ၂,၅၀၀ ကျော်သည်လည်း ကျင်ဒွေးမြို့တွင် တိုက်ပွဲပြင်းထန်နေသဖြင့် တိုက်ပွဲတိမ်းရှောင်နေသည်မှာ ၄ လခန့်ရှိပြီဟု ကန်ပက်လက်မြို့နယ်၏ လူသားစာနာတွဲဖက်တာဝန်ခံ ကိုဂျက်ကီက သံလွင်ခက်ကို ပြောသည်။

စစ်ကောင်စီတပ်သည် ကန်ပက်လက်မြို့နယ်ကို နေ့စဉ်လေကြောင်းဖြင့် ပစ်ခတ်တိုက်ခိုက်နေပြီး ကျင်ဒွေးမြို့အနီးတဝိုက်တွင်လည်း တိုက်ပွဲများ ပြင်းထန်နေသည်ဟု ကိုဂျက်ကီ က ပြောသည်။

ချင်းပြည်နယ်၊ ကန်ပက်လက်မြို့နယ်သည် မင်းတပ်ခရိုင်တွင်တည်ရှိပြီး ၎င်းမြို့နယ်၏ အရှေ့တွင် မကွေးတိုင်း၊ ဆောမြို့နှင့်ထိစပ်နေသည်။

************

Telegram – >  https://t.me/ThanLwinKhetNews/4469

YouTube -> https://youtu.be/DEtRcu9PBI4

Website -> https://thanlwinkhet.net/?p=9636