၂၀၂၄ ခုနှစ်တွင် အကျဉ်းသားသေဆုံးမှု မြင့်တက်လာနိုင်
***********
ယမင်းဖူးပွင့်အောင်
ဧပြီ ၉၊ ၂၀၂၄။
၂၀၂၄ ခုနှစ် ဇန်နဝါရီလ ၁ ရက်ကနေ မတ်လ ၃၁ ရက်အထိ ၃ လအတွင်း ဥပဒေမဲ့သတ်ဖြတ်ခြင်းခံရသူ နိုင်ငံရေး အကျဉ်းသား ၆ ဦးရှိပြီး ၂၀၂၃ ခုနှစ်နှင့်ယှဉ်လျှင် သေဆုံးမှု ၅ ဦးအထိ မြင့်တက်ခဲ့သည်ဟု အကျဉ်းသားကူညီ စောင့်ရှောက်သူများထံက သိရသည်။
၂၀၂၃ ခုနှစ် ဇန်နဝါရီလ ၁ ရက်ကနေ မတ်လ ၃၁ ရက်အထိ ၃လအတွင်း အကျဉ်းထောင်နှင့် အကျဉ်း ထောင်ပြင်ပတွင် စစ်ကောင်စီလက်အောက်ခံဝန်ထမ်းများကြောင့် သေဆုံးခဲ့သည့်အကျဉ်းသား ၁ ဦးသာရှိခဲ့ပြီး ယခုနှစ် ၃ လအတွင်း ၆ ဦးအထိရှိလာခဲ့ခြင်းဖြစ်သည်။
ပြီးခဲ့သည့်နှစ်တွင် သေဆုံးခဲ့သည့်အကျဉ်းသားများ၏မိသားစုကို အကြောင်းကြားသော်လည်း ယခုနှစ်တွင်မူ မိသားစုဝင်များအား အကြောင်းကြားစာပေးပို့ခြင်းမရှိဘဲ လိုက်လံစုံစမ်းမှသာ သေဆုံးသည်ကိုသိရှိရခြင်းဖြစ်သည် ဟု မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက်-PPNM ဦးဆောင်ကော်မတီဝင် ကိုသိုက်ထွန်းဦး က သံလွင်ခက်ကိုပြောသည်။
၎င်းက “ဒီနှစ်က ၂၀၂၃ ထက် ပိုပြီးဆိုးရွားလိမ့်မယ်။ သေဆုံးမှုအရေအတွက်က ဒီအချိုးအတိုင်းသာဆက်သွား မယ်ဆိုရင် ၁ နှစ်ကို ၅၈ ဦးဝန်းကျင်လောက်သေဆုံးလိမ့်မယ်လို့ ခန့်မှန်းရတယ်။ ဒါက ကောင်းတဲ့မှန်းဆမှုတော့ မဟုတ်ဘူး”ဟုပြောသည်။
၂၀၂၄ ခုနှစ်တွင် နိုင်ငံရေးအကျဉ်းသားများနှင့်ပတ်သက်၍ တစ်ထောင့်တစ်နေရာမှ အသံလွှင့်ထုတ်နိုင်ရေး လုပ်ဆောင်သွားမည်ဖြစ်ပြီး နိုင်/ကျဉ်းမိသားစုများအနေဖြင့် မကြာခဏ ထောင်ဝင်စာသွားတွေ့ကြရန်နှင့် ထောင် အနီးဝန်းကျင်၌ ထူးခြားမှုရှိပါက အကျဉ်းသားကူညီစောင့်ရှောက်သည့်အဖွဲ့အစည်းများကို သတင်းပို့ကြရန်လည်း အကျဉ်းသားကူညီစောင့်ရှောက်သူများက တိုက်တွန်းပြောဆိုထားသည်။
နိုင်ငံရေးအကျဉ်းသားများကွန်ရက် – PPNM ဦးဆောင်ကော်မတီဝင် ကိုသိုက်ထွန်းဦးက “သတင်းအမှောင်ချလာ တဲ့အတွက် မြေပြင်မှာ ဒီထက်ပိုပြီးသေဆုံးမှုတွေရှိနိုင်တယ်ဆိုတဲ့ ယူဆချက်ရှိတယ်။ လက်ရှိမှာ မြေပြင်စောင့် ကြည့်မှုမျိုးကို ပိုလုပ်တယ်။ အရင်လိုမျိုး သေဆုံးမှထုတ်ပြန်တာမျိုးမဟုတ်ဘဲ စခေါ်ထုတ်ပြီဆို ခေါ်ထုတ်တဲ့ အကြောင်းကို သတိပေးတယ်။ ဒီလိုလုပ်ခြင်းအားဖြင့် ကျူးလွန်ဖို့ကြံစည်ခဲ့တဲ့လူတွေ တွန့်ဆုတ်သွားနိုင်တယ် ပေါ့” ဟုပြောသည်။
ယခုနှစ်တွင် သေဆုံးခဲ့ရသည့် နိုင်ငံရေးအကျဉ်းသူဟောင်း မနိုဘယ်လ်အေးအပါအဝင် ၆ ဦးတို့ကို အကျဉ်းထောင် ပြင်ပတွင် ထွက်ပြေးရန်ကြိုးစားသည်ဟူသည့်အကြောင်းပြချက်နှင့် စစ်ကောင်စီတပ်ဖွဲ့ဝင်များက ပစ်သတ်ခဲ့သလို အကျဉ်းထောင်အတွင်း ရိုက်နှက်ခံရမှုကြောင့် သေဆုံးခဲ့ရခြင်းများလည်းရှိသည်။
အမျိုးသားညီညွတ်ရေးအစိုးရ-NUG လက်အောက်ခံ မြို့နယ်ပြည်သူ့ကာကွယ်ရေးအဖွဲ့၊ မြို့နယ်ပြည်သူ့အုပ်ချူပ် ရေးအဖွဲ့များအနေဖြင့် အကျဉ်းထောင်ဝန်ထမ်းနှင့် စစ်ကောင်စီခန့်အရာရှိများကို ဥပဒေအရ အပြစ်ပေးအရေးယူ ခြင်းများလုပ်ဆောင်ပေးစေလိုသည်ဟု အကျဉ်းသားကူညီစောင့်ရှောက်ရေးအဖွဲ့များက တိုက်တွန်းသည်။
၂၀၂၄ ခုနှစ် ဇန်နဝါရီလ ၁၂ ရက်ကနေ ဧပြီလ ၆ ရက်အတွင်း အကျဉ်းထောင်များတွင် ဆေးဝါးကုသမှု လုံ လောက်စွာမရရှိ၍ အသက် ၆၈ နှစ်နှင့် ၆၄ နှစ်သက်ကြီးရွယ်အို ၂ ဦးအပါအဝင် အကျဉ်းသား ၇ ဦး သေဆုံးခဲ့ရသည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း၏ မှတ်တမ်းနှင့် သုတေသနဌာန၏ စောင့်ကြည့်လေ့လာ မှုများအရ ၂ဝ၂၄ ခုနှစ်၊ ဇန်နဝါရီလကနေ မတ်လအထိ တိုင်းနှင့် ပြည်နယ်အသီးသီးရှိ အကျဉ်းထောင်တွင်း၌ နိုင်ငံရေးအကျဉ်းသား သေဆုံးမှုနှုန်း မြင့်တက်လာပြီး အေအေပီပီ က ကောက်ယူထားသော အချက်အလက်များ အရ နိုင်ငံရေးအကျဉ်းသူ ၂ ဦး နှင့် နိုင်ငံရေးအကျဉ်းသား ၈ ဦး စုစုပေါင်း ၁၀ ဦး သေဆုံးခဲ့ပြီး အများစုမှာ လုံ လောက်သော ဆေးကုသခွင့်မရရှိသောကြောင့် သေဆုံးခဲ့ကြသည်ဟု နိုင်ငံရေးအကျဉ်းသားများကူညီစောင့် ရှောက်ရေးအသင်း AAPP က ထုတ်ပြန်ထားသည်။
ပုံစာ – ဖျာပုံအကျဉ်းထောင်မှ နိုင်ကျဉ်းများကို တွေ့ရစဉ်။
ဓာတ်ပုံ – PPNM
