ဘက်တံဆိပ်ပြောင်းထားသည့် စစ်ကောင်စီတပ်ဖွဲ့ဝင်များ တိုက်ခိုက်ခံရ

ဘက်တံဆိပ်ပြောင်းထားသည့် စစ်ကောင်စီတပ်ဖွဲ့ဝင်များ တိုက်ခိုက်ခံရ
******

နန်းဆုပန်ခန့်
ဧပြီ ၉၊ ၂၀၂၄။

ကရင်ပြည်နယ်၊ မြဝတီမြို့တောင်ဘက်၊ မြဝတီ – ဝေါလေလမ်းမပေါ်မှာရှိ သေ့ဘောဘိုးကျေးရွာအတွင်းက စစ်ကောင်စီတပ်ဖွဲ့ဝင်များသည် ဒီမိုကရေစီအကျိုးပြု ကရင့်တပ်မတော် – DKBA ဘက်တံဆိပ်ဖြင့် လူအချိန်း အပြောင်းပြုလုပ်နေစဉ် ကရင်အမျိုးသားလွတ်မြောက်ရေးတပ်မတော် – KNLA ပူးပေါင်းတပ်ဖွဲ့က လက်နက်ကြီး ဖြင့်တိုက်ခိုက်ခဲ့သည်ဟု ကာကွယ်ရေးတပ်ဖွဲ့ဝင်များထံက သိရသည်။

ယမန်နေ့ ညနေ ၄ နာရီအချိန်ခန့်တွင် စစ်ကောင်စီတပ်သားများသည် ကဆောဝါးလေး (သုံးထပ်ကွေ့ ) မှ သေ့ ဘောဘိုးသို့သွားစဉ် တိုက်ခိုက်ခံခဲ့ရခြင်းဖြစ်သည်။

စစ်ကောင်စီတပ်ဖွဲ့ဝင် ၂၀ ကျော်သည် အိမ်စီးကားဖြစ်သည့် ကား Revo ၁ စီး၊ Remax ၁ စီး၊ Probox ၁ စီးဖြင့် သေ့ဘောဘိုးသို့သွားစဉ် ပစ်ခတ်ခံရခြင်းဖြစ်ပြီး ပစ်ခတ်ခံရမှုတွင် ထိခိုက်သေဆုံးမှုရှိသည်ဟု စစ်ရေးနှင့် နီးစပ် သည့်ဒေသခံ ၁ ဦးက သံလွင်ခက်ကိုပြောသည်။

၎င်းက “ ကား ၃ စီးနဲ့လာတယ်။ Probox ၁ စီးကျတော့ အထဲမှာ လက်နက်ကြီးတွေ၊ ကျည်တွေ ပါတဲ့အခါကျ တော့ အဲ့ဒီ Probox က ဓါတ်ဆီထိနေလို့ လမ်းမပေါ်မှာပဲ မီးလောင်သွားတယ်။ ကျည်တွေရော၊ သေနတ်တွေရော အကုန်လုံးမီးလောင်သွားတယ်။ မီးလောင်တဲ့ဘေးနားမှာကတော့ ၁ ယောက် မီးလောင်ပြီးသေသွားတယ်။ သူတို့ စခန်းရောက်တော့ အသည်းအသန် ၂ ယောက်တော့ ကြားရတယ်။ နည်းနည်းပါးပါးဒဏ်ရာရတာတွေကတော့ ရှိတယ်။ ကား ၂ စီးလွတ်သွားတဲ့အထဲမှာ ၁ စီးက ရှေ့ဘီးပေါက်သွားတယ် ” ဟု ဆိုသည်။

စစ်ကောင်စီတပ်ဖွဲ့ဝင်များသည် DKBA ဘက်တံဆိပ်ဖြင့် သေ့ဘောဘိုးစခန်းသို့ ဦးတည်ဝင်လာကာ သေ့ဘော ဘိုးနှင့် ဘလယ်ဒိုရွာကြားတွင် ပူးပေါင်းတပ်ဘက်က လက်နက်ကြီးများဖြင့်စတင်တိုက်ခိုက်ခဲ့ပြီးနောက် နှစ်ဖက် အပြန်အလှန်ပစ်ခတ်မှုဖြစ်ပွားခဲ့သည်။

ထိုသို့အပြန်အလှန်ပစ်ခတ်ရာတွင် ဘလယ်ဒို (ထိုင်းဘက်ခြမ်း) မှ ဘလယ်ဒို (မြန်မာဘက်ခြမ်း) သို့ တောင်ယာ လုပ်ပြီး ပြန်လာသည့် အသက် ၂၀ အရွယ် အမျိုးသား၁ ဦး သေဆုံးခဲ့ရသည်ဟု ဒေသခံအမျိုးသမီး ၁ ဦးက ဆို သည်။

၎င်းက “အဲဒီရွာသားကတော့ ဒီတိုက်ပွဲဖြစ်တဲ့အချိန်မှာ သူကလည်း တောင်ယာကနေပြန်လာတဲ့အချိန်ကျတော့ အဲ့ မှာရောပါသွားတာ။ တိုက်ပွဲဖြစ်တဲ့အချိန်မှာ စစ်ကောင်စီ ၂ ယောက်ကထွက်ပြေးရင်းနဲ့ အဲ့ဒီ ၂ ယောက်နောက်ကို သူလိုက်ရင်းနဲ့ အဲ့ဒီမှာထိသွားတာ၊ အဲ့ဒီရွာသားကတော့ သူများနောက်လိုက်ပြီးတော့ ချောင်းဘေးနားမှာပဲ လဲသွားတယ်။ သေသွားတာပေါ့နော် ” ဟု ဆိုသည်။

ပြီးခဲ့သည့် မတ်လကုန်ပိုင်းတွင် မြဝတီ – ဝေါလေ လမ်းမတကျောရှိ ဥကရိထစခန်း၊ ထီးကပလယ်စခန်းများက စစ်ကောင်စီတပ်ဖွဲ့ဝင်များနှင့် ကရင့်လက်နက်ကိုင်ပူးပေါင်းတပ်များအကြား တိုက်ပွဲဖြစ်ပွားခဲ့သည်။

လက်ရှိအချိန်တွင် သေ့ဘောဘိုးရွာသားများနှင့် စစ်ရှောင်များသည် လက်နက်ကြီးနှင့် လေကြောင်းတိုက်ခိုက်မည် ကိုစိုးရိမ်သည့်အတွက် ထွက်ပြေးနေကြရပြီး အခက်အခဲများကြုံတွေ့နေရသည်ဟု စစ်ရှောင်စခန်း တာဝန်ရှိသူ ကပြောသည်။

၎င်းက “ စစ်ရှောင်တွေကလည်း မိုးကလည်းရွာတော့မယ်။ အခုကတော့ ချောင်းဘေးမှာသွားပြီးတော့ အိပ်နေရ တယ်။ မိုးရွာရင်တော့ သူတို့ကတော့ ဒုက္ခရောက်ပြီ။ အမိုးအကာလည်းမရှိဘူးလေ၊ ချောင်းဘေးမှာဆိုတော့ “ ဟု ဆိုသည်။

လက်ရှိတွင် သေ့ဘောဘိုးရွာရှိစစ်ရှောင်စခန်းတွင် မဲကနယ်ရွာနှင့် ရသေ့ဂူရွာများမှ တိမ်းရှောင်လာသည့် အိမ်ထောင်စု ၇၄ စု ရှိပြီး လူဦးရေ ၂၃၉ ဦး ရှိသည်ဟု စစ်ရှောင်စခန်း တာဝန်ရှိသူများထံက သိရသည်။

ဓါတ်ပုံ – ပေးပို့

ပုံစာ – လက်နက်ကြီးထိမှန်မှုကြောင့် မီးလောင်ခဲ့သည့် စစ်ကောင်စီတပ်ဖွဲ့ဝင်များ မောင်းနှင်လာသည့် probox ကား။