ဘူးသီးတောင်ခြေမြန်တပ်ရင်း ဒုတပ်ရင်းမှူးဖမ်းဆီးခံရ
******
ခင်သရဖီဦး
ဧပြီ ၈၊ ၂၀၂၄။
ရက္ခိုင့်တပ်တော် AA ထံ လက်နက်ချအညံ့မခံဘဲထွက်ပြေးသွားသည့် ဒုတပ်ရင်းမှူး ၁ ဦးအား AA က အရှင် ဖမ်းမိထားသည်ဟု ယမန်နေ့ ဧပြီလ ၇ ရက်တွင်ထုတ်ပြန်သည်။
ဖမ်းဆီးရမိသူသည် ဘူးသီးတောင် ၊ စကခ ၁၅ လက်အောက်ခံ၊ ခမရ – ၅၆၅ တပ်ရင်းက ဒုတပ်ရင်းမှူး ဗိုလ်မှူး ဇော်ဇော်အောင် ဖြစ်သည်။
စကခ ၁၅ လက်အောက်ခံ၊ ခမရ – ၅၆၅ တပ်ရင်းက ဒုတပ်ရင်းမှူး ဗိုလ်မှူး ဇော်ဇော်အောင် ကြည်း /၄၁၁၄၇ အား ဧပြီလ ၅ ရက်၊ ညနေ ၄ နာရီခန့်တွင် ဘူးသီးတောင်မြို့နယ်၊ ဘဒနာကျေးရွာအနီးတွင် ဒဏ်ရာများဖြင့် ဖမ်းမိခဲ့ခြင်း ဖြစ်သည်ဟု ထုတ်ပြန်ချက်၌ဖော်ပြထားသည်။
” DSA အပတ်စဉ် ၄၇ ၊ အသက် ၄၀ အရွယ် အဆိုပါ ဒုတပ်ရင်းမှူးသည် ဘူးသီးတောင်အခြေစိုက် အကြမ်းဖက် စစ်ကောင်စီ၏ ခမရ ၅၆၄ တပ်ရင်းဌာနချုပ်အား ရက္ခိုင့်တပ်တော်က ထိုးစစ်ဆင်တိုက်ခိုက်သည့် စခန်းသိမ်း တိုက်ပွဲတွင် လက်နက်ချအညံ့မခံဘဲထွက်ပြေးနေကြသော စစ်ကောင်စီတပ်ဖွဲ့ဝင်များထဲက ၁ ဦးဖြစ်သည်” ဟု AA က ဆိုသည်။
ဖမ်းမိထားသည့် ဗိုလ်မှူး ဇော်ဇော်အောင် အား လက်ရှိတွင် AA က ဆေးကုသပေးလျက်ရှိသည်။
“ဒဏ်ရာများဖြင့်ဖမ်းဆီးရမိသော ဒုတပ်ရင်းမှူး ဗိုလ်မှူး ဇော်ဇော်အောင် အား ရက္ခိုင့်တပ်တော် ဆေးတပ်ဖွဲ့က လူသားချင်းစာနာစွာဖြင့် ဆေးကုသပေးလျက်ရှိသည်” ဟု AA ၏ ထုတ်ပြန်ချက်အရ သိရသည်။
ကျန်ရှိနေသည့် ခမရ ၅၆၄ စခန်းက လက်နက်ချအညံ့မခံဘဲ ထွက်ပြေးနေသော စစ်ကောင်စီတပ်ဖွဲ့ဝင်များ ကိုလည်း လိုက်လံချေမှုန်းသွားမည်ဟု AA ကဆိုသည်။
” ခမရ – ၅၆၄ စခန်းက လက်နက်ချအညံ့မခံဘဲထွက်ပြေးနေသော အကြမ်းဖက်စစ်ကောင်စီတပ်ဖွဲ့ဝင်များအား ရက္ခိုင့်တပ်တော်က လိုက်လံတိုက်ခိုက်ချေမှုန်းလျက်ရှိရာ ၂၀၂၄ ခုနှစ်၊ ဧပြီလ ၇ ရက်အထိ အကြမ်းဖက် စစ်ကောင်စီတပ်ဖွဲ့ဝင် ၁၀ ဦးကျော်ကို ထပ်မံချေမှုန်းနိုင်ခဲ့ပြီး အခြားလွတ်မြောက်နေသူများကိုလည်း ဆက်လက် လိုက်လံတိုက်ခိုက်ချေမှုန်းလျက်ရှိသည်” ဟု ထုတ်ပြန်ချက်တွင် ဖော်ပြထားသည်။
ရက္ခိုင့်တပ်တော် AA အနေဖြင့် မောင်တော၊ မြေပုံ၊ အမ်း၊ ဘူးသီးတောင်၌ကျန်ရှိနေသေးသည့် စစ်ကောင်စီ၏ စခန်းများအား ဆက်လက်သိမ်းပိုက်နိုင်ရေး ထိုးစစ်ဆင်တိုက်ခိုက်လျက်ရှိကြောင်း AA က ထုတ်ပြန်ထားသည်။
ပုံစာ – ဖမ်းဆီးခံထားရသော စစ်ကောင်စီဒုတပ်ရင်းမှူးအား AA ကဆေးကုသပေးနေစဥ်။
