တိုက်ပွဲတိမ်းရှောင်နေသည့် ကချင်ဒေသခံ ၂ ဦး လက်နက်ကြီးထိမှန်သေဆုံး

တိုက်ပွဲတိမ်းရှောင်နေသည့် ကချင်ဒေသခံ ၂ ဦး လက်နက်ကြီးထိမှန်သေဆုံး

******

ထွယ်

မတ် ၂၂၊ ၂၀၂၄။

ကချင်ပြည်နယ်၊ မိုးမောက်မြို့နယ်တွင် လက်နက်ကြီးကျရောက်ပေါက်ကွဲခဲ့သည့်အတွက် စစ်ဘေးတိမ်းရှောင်နေ သည့် ဒေသခံ ၂ ဦး သေဆုံးခဲ့သည်ဟု ဒေသခံများထံကသိရသည်။

ယမန်နေ့တွင် နွယ်လန်းကျေးရွာနှင့် နောင်းကွမ်ကျေးရွာ၌တိုက်ပွဲဖြစ်ပွားစဉ် ဟင်္သာကျေးရွာကို လက်နက်ကြီး ကျရောက်ပေါက်ကွဲခဲ့သည့်အတွက် အမျိုးသမီး ၂ ဦးသေဆုံးခဲ့ခြင်းဖြစ်သည်။

သေဆုံးသွားသည့်အမျိုးသမီး ၂ ဦးသည် အသက် ၂၀ ကျော်အရွယ်နှင့် အသက် ၇၀ ကျော်အရွယ်များဖြစ်ကြပြီး ၎င်းတို့မှာ မိုးမောက်မြို့နယ်၊ မင်းဂျမ်းကျေးရွာမှ ဟင်္သာကျေးရွာသို့ တိုက်ပွဲတိမ်းရှောင်နေကြသူများဖြစ်သည်ဟု လူမှုကူညီရေးဆောင်ရွက်နေသူများထံက သိရသည်။

လက်နက်ကြီးကျရောက်ပေါက်ကွဲမှုကြောင့် အမျိုးသမီး ၂ ဦးသေဆုံးခဲ့သည့်အပြင် အသက် ၃ နှစ်ကျော်အရွယ် ယောက်ျားလေး ၁ ဦး နှင့် အမျိုးသမီး ၄ ဦး ထိခိုက်ဒဏ်ရာရရှိခဲ့သည် လူမှုကူညီရေးဆောင်ရွက်နေသူ ၁ ဦးက သံလွင်ခက်သတင်းဌာနကို ပြောသည်။

၎င်းက “ ၁ ယောက်ကတော့ ဒီနေ့ခွဲခန်းဝင်ပြီ။ ဒီနေ့ခွဲစိတ်ခန်းဝင်တဲ့ ၁ ယောက်က ရင်ဘတ်မှာထိထားတဲ့ ၁ ယောက်ပါ။ တချို့တော့ ခြေထောက်မှာထိထားတာ” ဟု ပြောသည်။

လက်နက်ကြီးစထိမှန်ခဲ့သည့် ဟင်္သာကျေးရွာ ဒေသခံ ၅ ဦးသည် လက်ရှိတွင် ဗန်းမော်ပြည်သူ့ဆေးရုံကြီး၌ ဆေးကုသမှုခံယူနေသည်ဟု သိရသည်။

ဟင်္သာကျေးရွာသည် ယမန်နေ့ကတိုက်ပွဲဖြစ်ပွားခဲ့သည့် နွယ်လန်းကျေးရွာ၏ မိုးလဲချောင်းတစ်ဖက်ကမ်းတွင် တည်ရှိပြီး လက်ရှိတိုက်ပွဲပြင်းထန်နေသည့် နွယ်လန်းကျေးရွာနှင့် မင်းဂျမ်းကျေးရွာက ဒေသခံတချို့ တိုက်ပွဲတိမ်း ရှောင်နေသည့် ကျေးရွာလည်းဖြစ်သည်။

ကချင်ပြည်နယ်၊ မိုးမောက်မြို့နယ်တွင် ယခုမတ်လ ၇ ရက် မြစ်ကြီးနား – ဗန်းမော် လမ်းမပေါ်က  စစ်ကောင်စီ၏ တပ်စခန်းများကို KIA နှင့် ပူးပေါင်းတပ်က တစ်ပြိုင်တည်း ထိုးစစ်ဆင်တိုက်ခိုက်ချိန်ကတည်းက တိုက်ပွဲပြင်းထန်နေပြီး နွယ်လန်းကျေးရွာနှင့် ၂၅ မိုင်ခန့်ဝေးသည့် မိုးမောက်မြို့ရှိ စစ်ကောင်စီ၏ ခြေမြန်တပ်ရင်း ခမရ – ၄၃၇ တပ်ရင်းကလည်း နေ့စဉ်လက်နက်ကြီးဖြင့် ပစ်ခတ်လျက်ရှိသည်ဟု မိုးမောက်မြို့ဒေသခံများက ပြော သည်။

စစ်ကောင်စီ၏ ခြေမြန်တပ်ရင်း ခမရ – ၄၃၇ တပ်ရင်းကပစ်ခတ်သည့် လက်နက်ကြီးကြောင့် ယခု မတ်လအတွင်း မိုးမောက်မြို့က ဒေသခံ ၂ ဦးထိခိုက်ဒဏ်ရာရရှိခဲ့သည်ဟု မိုးမောက်မြို့ ဒေသခံများထံက သိရသည်။

************

Telegram– > https://t.me/newstlk/3935

YouTube – > https://youtu.be/6X9AvN2FnIw?si=BGNM7eyxs7ZtJG7d

Website – > https://thanlwinkhet.net/?p=8597