မြဝတီမြို့အနီးရှိ စစ်ကောင်စီတပ်ရင်းများကို ကာကွယ်ရေးတပ်များ ဆက်လက်ထိုးစစ်ဆင်

မြဝတီမြို့အနီးရှိ စစ်ကောင်စီတပ်ရင်းများကို ကာကွယ်ရေးတပ်များ ဆက်လက်ထိုးစစ်ဆင်

********************************

နန်းဆုပန်ခန့်

မတ် ၁၅၊ ၂၀၂၄။

ကရင်ပြည်နယ်၊ မြဝတီမြို့အနီး ကျန်ရှိနေသေးသည့် စစ်ကောင်စီတပ်ရင်းများကို ကရင်အမျိုးသားလွတ်မြောက်ရေးတပ်မတော် – KNLA နှင့် ပြည်သူ့ကာကွယ်ရေးတပ်မတော် – PDF ပူးပေါင်းတပ်များက ဆက်လက်ထိုးစစ်ဆင်လျက်ရှိသည်ဟု ဒေသခံနှင့် မြေပြင်ရဲဘော်များထံက သိရသည်။

မြဝတီမြို့အနီး သင်္ဃန်းညီနောင်ဒေသတွင်းရှိ စစ်ကောင်စီလက်အောက်ခံ စစ်ဆင်ရေးကွပ်ကဲမှုဌာနချုပ် စကခ ၁၂ လက်အောက်ခံ ကျန်ရှိနေသည့် ခမရ-၃၅၆၊ ၃၅၇ တပ်ရင်း နှင့် ဗျူဟာကုန်းတပ်များကို KNLA နှင့် ပူးပေါင်းတပ်က ဆက်လက်ထိုးစစ်ဆင်နေရာ ယနေ့နံနက် ၄ နာရီကစတင်၍ ညနေပိုင်းအထိ တိုက်ပွဲများပြင်းထန်နေသည်ဟု ကာကွယ်ရေးရဲဘော်များထံက သိရသည်။

ကာကွယ်ရေးရဲဘော် ၁ ဦးက “ အဲ့ဘက်မှာကျန်တာကတော့ ၃၅၇ ရယ် ဗျူဟာကုန်းရယ်ပေါ့။ သူတို့ကုန်းပေါ်မှာ လူမရှိတော့ဘူး။ ကုန်းကနေသူတို့လူတွေပြေးသွားတော့ အပေါ်ကလေယာဉ်တွေနဲ့ကော၊ ဒရုန်းတွေနဲ့ကော လက်နက်ကြီးတွေနဲ့ကော ထုတာ ” ဟု ဆိုသည်။

ယနေ့နံနက်အစောပိုင်းကစ၍ စစ်ကောင်စီဘက်က တိုက်လေယာဉ်ဖြင့် ၃ ကြိမ်တိုင်တိုင် လာရောက်ပစ်ခတ်ခဲ့ပြီး Y-12 ထောက်ပို့လေယာဉ်ဖြင့်လည်း ဗုံးသီးများကြဲချခဲ့သည်ဟု မြေပြင်ရဲဘော် ၁ ဦးကပြောသည်။

၎င်းက “ တိုက်လေယာဉ်က ၃ ကြိမ်လာတယ်။ Y-12 ရော ကြဲတယ်၊ လေယာဉ်က ၁ ကြိမ်လာရင် ၁ လုံးပဲ ကြဲချတယ်။ Y-12 က ၁ ခါကြဲရင် တပြိုင်တည်း ၁၀ လုံးကြဲတယ်” ဟု ဆိုသည်။

ယနေ့နံနက်ပိုင်း တိုက်ပွဲဖြစ်ပွားချိန်တွင် စစ်ကောင်စီက လေကြောင်းပစ်ကူများအပြင် လက်နက်ကြီးများဖြင့်လည်း အများအပြားပစ်ကူပေးတိုက်ခိုက်ခဲ့ရာ မြဝတီမြို့တွင်းနှင့် ထိုင်း – မြန်မာနယ်စပ် မဲဆောက်မြို့သို့လည်း ပေါက်ကွဲသံများ ယနေ့မနက်အစောပိုင်းကစ၍ ကြားနေရသည်ဟု ဒေသခံများထံက သိရသည်။

စစ်ကောင်စီ၏ လေကြောင်းပစ်ကူနှင့် လက်နက်ကြီးပစ်ကူများကြောင့် သင်္ဃန်းညီနောင်ကျေးရွာအနီး ဝှေ့ရှမ်းကျေးရွာ ဒေသခံ ၂ ဦးထက်မနည်း သေဆုံးမှုရှိခဲ့သည်ဟု ဒေသခံများထံက သိရသည်။

သင်္ဃန်းညီနောင်ရှိ စကခ ၁၂ လက်အောက် ခမရ – ၃၅၅ ကို မတ်လ ၇ ရက် နံနက်ပိုင်းတွင် စတင်ထိုးစစ်ဆင်ခဲ့ပြီးနောက်  KNLA နှင့် ပူးပေါင်းတပ်က လက်ရှိအချိန်၌ ခမရ – ၃၅၅ တပ်ရင်း၊ သင်္ဃန်းညီနောင်ရဲစခန်းနှင့် တာဝါတိုင်စခန်းကုန်းအား သိမ်းပိုက်ထားနိုင်ခဲ့သည်။

ဓာတ်ပုံ – ကော်ဘရာစစ်ကြောင်း တပ်ခွဲ ၄။

ပုံစာ – တိုက်ပွဲအတွင်း မြင်တွေ့နေရသည့် ကော်ဘရာ စစ်ကြောင်းက ရဲဘော် ၁ ဦး။

************

အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။

Telegram – >  https://t.me/newstlk/3775

YouTube – > https://youtu.be/6X9AvN2FnIw?si=BGNM7eyxs7ZtJG7d

Website – >   https://thanlwinkhet.net/?p=8379