စစ်ကောင်စီ၏ဗုံးကြဲမှုကြောင့် ဆီဆိုင်မြို့နယ်က ဘုန်းကြီးကျောင်းဆောင်များပျက်စီး
************************
ယမင်းဖူးပွင့်အောင်
မတ် ၁၅၊ ၂၀၂၄။
ရှမ်းပြည်နယ်တောင်ပိုင်း ဆီဆိုင်မြို့နယ်တွင် စစ်ကောင်စီ၏ ဗုံးကြဲတိုက်ခိုက်မှုကြောင့် ဘုန်းကြီးကျောင်းဆောင်များ ထိခိုက်ပျက်စီးခဲ့သည်ဟု ပအိုဝ်းအမျိုးသားလွတ်မြောက်ရေးတပ်မတော်- PNLA က ထုတ်ပြန်သည်။
စစ်ကောင်စီက ဆီဆိုင်မြို့ရှိ ဘုရားစေတီကုန်းများပေါ်တွင် လက်နက်ကြီးများတပ်ဆင်ကာ မြို့အတွင်းသို့ နေ့စဉ်ပစ်ခတ်နေခြင်းဖြစ်သည်ဟု PNLA ပြောရေးဆိုခွင့်ရှိသူ ခွန်ရိန်းယံက သံလွင်ခက်ကို ပြောသည်။
“စစ်ကောင်စီက တင့်ကားတွေပါသုံးပြီး ထိုးစစ်ဆင်နေတယ်။ ပြီးတော့ ဆီဆိုင်ရဲ့ အရှေ့မြောက်ဘက်မှာရှိတဲ့ ဘုရားစေတီကုန်းပေါ်မှာ လက်နက်ကြီးတွေတပ်ဆင်ပြီး မြို့ထဲကိုလည်း နေ့တိုင်းပစ်ထည့်နေတာ။ စစ်ကောင်စီရဲ့ ရက်စက်မှုကတော့ လက်ရှိအချိန်မှာ အဲ့လိုမျိုးရှိနေပါတယ်” ဟုဆိုသည်။
ဆီဆိုင်မြို့နယ် ထမ်းယံကျေးရွာရှိ ဘုန်းတော်ကြီးကျောင်းကို ယနေ့နေ့လယ် ၁ နာရီခွဲခန့်တွင် စစ်ကောင်စီက ပေါင် ၅၀၀ ဗုံး ၂ လုံးဖြင့် ကြဲချတိုက်ခိုက်ခဲ့သည်။
အဆိုပါ တိုက်ခိုက်မှုကြောင့် ဘုန်းကြီးကျောင်းဝင်းအတွင်းရှိ ကျောင်းကြီးအပါအဝင် ကျောင်းဆောင် ၂ ဆောင် ထိခိုက်ပျက်စီးသွားကာ သာမဏေကိုရင် ၂ ပါးလည်း ထိခိုက်ဒဏ်ရာရရှိခဲ့သည်ဟု PNLA ၏ ထုတ်ပြန်ချက်တွင်ပါရှိသည်။
ထို့ပြင် ဘုန်းကြီးကျောင်းနှင့်နီးကပ်သည့် နေအိမ်များက ပြတင်းပေါက်များ၊ တံခါးများ ထိခိုက်ပျက်စီးခဲ့သည်။
ယမန်နေ့ကလည်း ဘုရားပင့်ဆောင်လာသည့်ဒေသခံများ၏ယာဉ်တန်းကို စစ်ကောင်စီက လက်နက်ကြီးဖြင့် ပစ်ခတ်ခဲ့သဖြင့် ဒေသခံအချို့ထိခိုက်ဒဏ်ရာရရှိခဲ့သည်။
PNLA တပ်ဖွဲ့များ ဝင်ရောက်လှုပ်ရှားခြင်းမရှိသည့် ဟိုပုံးမြို့နယ် နမ့်ဟူးကျေးရွာကိုလည်း စစ်ကောင်စီက မတ်လ ၁၂ ရက်တွင် မီးရှို့ဖျက်ဆီးခဲ့သည်။
ဓာတ်ပုံ – PNLA
************
အောက်ဖော်ပြပါလင့်များတွင် သတင်းမှန်များ လွတ်လပ်မြန်ဆန်စွာ ဖတ်ရှုနိုင်ပါပြီ။
Telegram – > https://t.me/newstlk/3774
YouTube – > https://youtu.be/6X9AvN2FnIw?si=BGNM7eyxs7ZtJG7d
Website – > https://thanlwinkhet.net/?p=8376
